ຂ່າວເດັ່ນ-ປະເດັນດັງ

ເຫດຜົນການສືບຕໍ່ປະຕິບັດມາດຕະການປ້ອງກັນ, ຄວບຄຸມ ແລະ ສະກັດກັ້ນການລະບາດ ຂອງພະຍາດໂຄວິດ-19 ຕື່ມອີກ 15ວັນ

      ເຖິງແມ່ນວ່າການຈັດຕັ້ງປະຕິບັດຄໍາສັ່ງ ຂອງນາຍົກລັດຖະມົນຕີ, ຄໍາສັ່ງ ຂອງເຈົ້າຄອງນະຄອນຫຼວງວຽງຈັນ, ແຈ້ງການ ຂອງຫ້ອງວ່າການນາຍົກລັດຖະມົນຕີ ກໍຄືມາດຕະການຕ່າງໆ ທີ່ຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ຂັ້ນສູນກາງ ແລະ ທ້ອງຖິ່ນວາງອອກໄດ້ເປັນຢ່າງດີ, ແຕ່ເນື່ອງຈາກວ່າ ສະພາບການລະບາດໃນຊຸມຊົນທົ່ວປະເທດ ຍັງສືບຕໍ່ເພີ່ມຂຶ້ນ ແລະ ຂະຫຍາຍເປັນວົງກວ້າງເກືອບທຸກແຂວງ ທຽບໃສ່ໄລຍະຜ່ານມາ, ສະເລ່ຍໃນທົ່ວປະເທດ ເພີ່ມຂຶ້ນເຖິງ 48,06%; ສະນັ້ນ, ຫ້ອງວ່າການສໍານັກງານນາຍົກລັດຖະມົນຕີ ຈຶ່ງໄດ້ອອກແຈ້ງການ ສະບັບເລກທີ 1260/ຫສນຍ, ລົງວັນທີ 30 ກັນຍາ 2021 ສືບຕໍ່ປະຕິບັດມາດຕະການປ້ອງກັນ, ຄວບຄຸມ ແລະ ສະກັດກັ້ນການລະບາດ ຂອງພະຍາດໂຄວິດ-19 ອອກໄປຕື່ມອີກ 15 ວັນ ເລີ່ມແຕ່ເວລາ 00:00 ໂມງ ວັນທີ 1 ຕຸລາ ຫາເວລາ 24:00 ໂມງ ຂອງວັນທີ 15 ຕຸລາ 2021 ເຊິ່ງຫຼັກການ ແລະ ເຫດຜົນ ຂອງການກໍານົດມາດຕະການຕ່າງໆ ຂອງລັດຖະບານມີດັ່ງນີ້:

     ໜຶ່ງ: ລັດຖະບານໄດ້ພິຈາລະນາຖີ່ຖ້ວນ ແລະ ວາງເປົ້າໝາຍ ການປ້ອງກັນ ແລະ ສະກັດກັ້ນການລະບາດ ຂອງພະຍາດໂຄວິດ-19 ຢູ່ ສປປ ລາວ ເຮັດແນວໃດໃຫ້ພົນລະເມືອງລາວ ກໍຄືຊາວຕ່າງດ້າວ ທີ່ອາໄສຢູ່ດິນແດນລາວຕິດເຊື້ອໜ້ອຍທີ່ສຸດ ແລະ ຖ້າເສຍຊີວິດ ກໍ່ໃຫ້ມີໜ້ອຍທີ່ສຸດ.

     ສອງ: ພະຍາຍາມນຳພາປະຊາຊົນບັນດາເຜົ່າ ຫັນປ່ຽນແບບແຜນການດຳລົງຊີວິດປົກກະຕິ ກ່ອນການລະບາດ ຂອງພະຍາດ ໄປສູ່ການດຳລົງຊີວິດປົກກະຕິແບບໃໝ່ ພາຍຫຼັງການລະບາດ ຂອງພະຍາດໂຄວິດ-19.

    ສາມ: ການດຳລົງຊີວິດປົກກະຕິແບບໃໝ່ ຕ້ອງສອດຄ່ອງກັບສະພາບ ແລະ ຈຸດພິເສດ ຂອງປະເທດເຮົາ ໂດຍລັດຖະບານໄດ້ຮຽນຮູ້ບົດຮຽນ ຂອງຕ່າງປະເທດ, ເພື່ອນມິດສາກົນ, ຮັບຟັງຄຳເຫັນທີ່ສ້າງສັນ ຂອງປະຊາຊົນໃນແງ່ມຸມດ້ານຕ່າງໆ, ໄດ້ພິຈາລະນາວ່າ: ຕ້ອງພະຍາຍາມສູງສຸດ ເພື່ອໃຫ້ມີການສົມດູນ ແລະ ກົມກຽວກັນ ລະຫວ່າງ ມາດຕະການດ້ານການແພດ, ມາດຕະການດ້ານການບໍລິຫານ ແລະ ມາດຕະການດ້ານເສດຖະກິດ, ໂດຍຄຳນຶງເຖິງຜົນກະທົບທາງລົບ ຕໍ່ການພັດທະນາເສດຖະກິດ ແລະ ການດໍາລົງຊີວິດ ຂອງປະຊາຊົນເປັນບັນຫາສໍາຄັນ, ເຊິ່ງຄະນະພັກ, ອໍານາດການປົກຄອງຂັ້ນຕ່າງໆ ຈະໄດ້ຄົ້ນຄ້ວາຜັນຂະຫຍາຍ ແລະ ຫັນເປັນແຜນການຈັດຕັ້ງປະຕິບັດຕົວຈິງ ໃຫ້ສອດຄ່ອງກັບສະພາບຈຸດພິເສດ ຂອງທ້ອງຖິ່ນໃນແຕ່ລະໄລຍະ; ໂດຍສະເພາະ ຢູ່ນະຄອນຫຼວງວຽງຈັນ ເຊິ່ງເປັນສະຖານທີ່ ທີ່ມີການລະບາດໃນຊຸມຊົນຫຼາຍກວ່າທ້ອງຖິ່ນອື່ນ, ສະນັ້ນ ຄະນະພັກ, ຄະນະນໍາ ຂອງນະຄອນຫຼວງວຽງຈັນ ຈະຕ້ອງໄດ້ເອົາໃຈໃສ່ ຄົ້ນຄວ້າເຊື່ອມຊຶມແຈ້ງການສະບັບດັ່ງກ່າວໃຫ້ລະອຽດ ເພື່ອຈັດຕັ້ງຜັນຂະຫຍາຍ ເຂົ້າໃນຂອບເຂດນະຄອນຫຼວງວຽງຈັນ ໃຫ້ສອດຄ່ອງ ແລະ ເໝາະສົມ ເພື່ອສະກັດກັ້ນການແຜ່ລະບາດ ຂອງພະຍາດໃຫ້ຫຼຸດຜ່ອນລົງໄວເທົ່າໃດຍິ່ງດີ.

ບົດໂດຍ: ບກ

ບົດຄວາມໜ້າສົນໃຈ

Leave a Reply

Your email address will not be published. Required fields are marked *