ວຽກງານໂຄສະນາອົບຮົມ

ເນື້ອໃນການພົບປະ 2 ຄະນະໂຄສະນາອົບຮົມ ລາວ-ຫວຽດນາມ

     ປີ 2021 ເປັນປີມ້ວນທ້າຍ ຂອງການຈັດຕັ້ງປະຕິບັດສັນຍາຮ່ວມມື ລະຫວ່າງຄະນະໂຄສະນາອົບຮົມສູນກາງພັກ ປະຊາຊົນປະຕິວັດລາວ ກັບ ຄະນະໂຄສະນາສຶກສາສູນກາງກອມມູນິດຫວຽດນາມໃນໄລຍະ 5 ປີ ( 2017-2020) ເພື່ອສືບຕໍ່ເສີມຂະຫຍາຍການຮ່ວມມື ທີ່ເປັນມູນເຊື້ອ ຂອງສອງຄະນະໂຄສະນາອົບຮົມ; ດັງນັ້ນ ໃນວັນທີ 27 ພຶດສະພາ 2021 ສອງຄະນະໂຄສະນາອົບຮົມ ຈຶ່ງໄດ້ພົບປະແບບທາງໄກ (video conference) ເພື່ອພ້ອມກັນຕີລາຄາໝາກຜົນ ຂອງການຮ່ວມມືໃນໄລຍະ 5 ປີຜ່ານມາ ແລະ ປຶກສາຫາລືແຜນການຮ່ວມມື ໃນ 5 ປີ ຕໍ່ໜ້າ, ຝ່າຍນໍາໂດຍ ສະຫາຍ ຄຳພັນ ເຜີຍຍະວົງ ເລຂາທິການສູນກາງພັກ ຫົວໜ້າຄະນະໂຄສະນາອົບຮົມສູນກາງພັກ ປະຊາຊົນປະຕິວັດລາວ, ມີຮອງຫົວໜ້າຄະນະໂຄສະນາອົບຮົມສູນກາງພັກ, ຮອງຫົວໜ້າຄະນະພົວພັນຕ່າງປະເທດສູນກາງພັກ ແລະ ຕາງໜ້າບັນດາກົມຈໍານວນໜຶ່ງເຂົ້າຮ່ວມ, ສ່ວນຝ່າຍ ສສ.ຫວຽດນາມ ນໍາໂດຍ ສະຫາຍ ຫງວຽນຈ໋ອງ ເຫງ້ຍ ເລຂາທິການສູນກາງພັກ, ຫົວໜ້າຄະນະໂຄສະນາສຶກສາສູນກາງພັກກອມມູນິດຫວຽດນາມ, ສະຫາຍ ເລຫ້າຍຈູງ ຫົວໜ້າຄະນະພົວພັນຕ່າງປະເທດສູນກາງພັກ, ຮອງຫົວໜ້າຄະນະໂຄສະນາສຶກສາສູນກາງພັກ ແລະ ມີບັນດາຫົວໜ້າກົມ ຈໍານວນໜຶ່ງເຂົ້າຮ່ວມ.

      ກອງປະຊຸມພົບປະທາງໄກໃນຄັ້ງນີ້ ຖືວ່າເປັນຄັ້ງທໍາອິດ ຂອງທັງສອງສະຫາຍ ຫົວໜ້າຄະນະໂຄສະນາອົບຮົມ ພາຍຫຼັງໄດ້ຮັບໜ້າທີ່ເປັນຫົວໜ້າຄະນະໂຄສະນາອົບຮົມ; ການພົບປະຄັ້ງນີ້ ທັງສອງຝ່າຍໄດ້ພ້ອມກັນຕີລາຄາສູງຕໍ່ໝາກຜົນ ຂອງການຮ່ວມມືໃນໄລຍະ 5 ປີຜ່ານມາ ເຊິ່ງສ່ວນໃຫຍ່ແມ່ນສາມາດຈັດຕັ້ງປະຕິບັດຕາມແຜນການຮ່ວມມື ຂອງທັງສອງຝ່າຍ, ບັນຫາທີ່ປະຕິບັດບໍ່ທັນໄດ້ແມ່ນຍ້ອນການລະບາດ ຂອງພະຍາດໂຄວິດ-19. ເພື່ອສືບຕໍ່ເສີມຂະຫຍາຍມູນເຊື້ອການຮ່ວມມືບົນຈິດໃຈ ມິດສະຫາຍອ້າຍນ້ອງທີ່ເຄີຍໃຫ້ການຊ່ວຍເຫຼືອເຊິ່ງກັນ ແລະ ກັນ ຢ່າງຈິງໃຈຕະຫຼອດມາໂດຍສະເພາະ: ແມ່ນການແລກປ່ຽນບົດຮຽນທາງດ້ານວິຊາການ; ເພື່ອແນໃສ່ເຮັດໃຫ້ສອງຄະນະໂຄສະນາອົບຮົມສາມາດປະຕິບັດໜ້າທີ່ການເມືອງ ຂອງຕົນເປັນຢ່າງດີນັ້ນ ທັງສອງຝ່າຍໄດ້ແຈ້ງໜ້າທີ່ຈຸດສຸມຂອງວຽກງານໂຄສະນາອົບຮົມໃນ 5 ປີຕໍ່ໜ້າ ແລະ ໄດ້ປຶກສາຫາລືເພື່ອສ້າງຄວາມເປັນເອກະພາບກ່ຽວກັບການກໍານົດເນື້ອໃນການຮ່ວມມືໃນ 5 ປີຕໍ່ໜ້າ ເພື່ອຈະໄດ້ລົງນາມໃນຮ່າງສັນຍາການຮ່ວມມື ທີ່ຈະໄດ້ເຊັນຮ່ວມກັນໃນອີກບໍ່ດົນນີ້.

 

 

ເນື້ອໃນຂ່າວໂດຍ: ທອນ ພົມທິກອນ

ຮູບພາບ: ກົມຂໍ້ມູນຂ່າວ-ສານ ຄອສພ

 

ບົດຄວາມໜ້າສົນໃຈ

Leave a Reply

Your email address will not be published. Required fields are marked *