ວຽກງານໂຄສະນາອົບຮົມ

ຫົວໜ້າ ຄອສພ ລົງມາຢ້ຽມຢາມ ແລະ ພົບປະໂອ້ລົມພະນັກງານ 2 ວາລະສານ

            ເພື່ອຊຸກຍູ້ການຜັນຂະຫຍາຍມະຕິກອງປະຊຸມໃຫຍ່ ຄັ້ງທີ V ຂອງອົງຄະນະພັກ ຄອສພ ໃຫ້ເປັນຮູບປະທຳຕົວຈິງ, ໃນຕອນບ່າຍຂອງວັນທີ 7 ກັນຍາ 2021 ທ່ານ ຄໍາພັນ ເຜີຍຍະວົງ ຄະນະເລຂາທິການສູນກາງພັກ, ເລຂາຄະນະພັກ, ຫົວໜ້າຄະນະໂຄສະນາອົບຮົມສູນກາງພັກ ໄດ້ລົງເຄື່ອນໄຫວຊຸກຍູ້ ແລະ ໃຫ້ກໍາລັງໃຈ ຕໍ່ພະນັກງານວາລະສານໂຄສະນາ ແລະ ວາລະສານອະລຸນໃໝ່ ເຊິ່ງເປັນກະບອກສຽງ ຂອງຄະນະໂຄສະນາອົບຮົມສູນກາງພັກ ແລະ ຂອງພັກ, ການລົງມາຢ້ຽມຢາມ ຂອງທ່ານ ຫົວໜ້າ ຄອສພ ໃນຄັ້ງນີ້ ນັບວ່າເປັນຄັ້ງທໍາອິດ ພາຍຫຼັງສໍາເລັດກອງປະຊຸມໃຫຍ່ ຄັ້ງທີ V ຂອງອົງຄະນະພັກ ຄອສພ.

     ໃນໂອກາດດັ່ງກ່າວ, ທ່ານ ໂພເມກ ວິໄລສັກ ຫົວໜ້າບັນນາທິການວາລະສານໂຄສະນາ ແລະ ທ່ານ ຄໍາສະໄຫວ ສີດາວົງ ຜູ້ອໍານວຍຄວບຄຸມວຽກງານຢ່າງຮອບດ້ານ ຊ່ວຍຄະນະບັນນາທິການວາລະສານອະລຸນໃໝ່ ໄດ້ຜັດປ່ຽນກັນຂຶ້ນລາຍງານ ສະພາບການເຄື່ອນໄຫວວຽກງານວິຊາສະເພາະ ຂອງວາລະສານໃນໄລຍະທີ່ຜ່ານມາ ເຊິ່ງໄດ້ຍົກໃຫ້ເຫັນຜົນງານ, ຂໍ້ສະດວກ ແລະ ຂໍ້ຫຍຸ້ງຍາກ ພ້ອມທັງຂໍ້ສະເໜີຈໍານວນໜຶ່ງ.

     ໃນຕອນທ້າຍ, ທ່ານ ຫົວໜ້າ ຄອສພ ກໍໄດ້ໂອ້ລົມ ແລະ ໃຫ້ທິດຊີ້ນໍາໃນການເຄື່ອນໄຫວວຽກງານວາລະສານໃນຕໍ່ໜ້າ ເຊິ່ງກອ່ນອື່ນ ທ່ານ ໄດ້ຕີລາຄາການປະຕິບັດໜ້າທີ່ ຂອງ 2 ວາລະສານ ໃນໄລຍະຜ່ານມາ ແມ່ນມີຄວາມພະຍາຍາມບຸກບືນສູ້ຊົນ ແລະ ມີຜົນສໍາເລັດຫຼາຍອັນ, ເປັນຕົ້ນແມ່ນ: ສະພາບແນວຄິດຂອງພະນັກງານມີຄວາມສະຫງົບ ອຸ່ນອຽນ ທຸ່ນທ່ຽງ, ມີຄວາມຮັບຜິດຊອບຕໍ່ໜ້າທີ່ວຽກງານ, ຫຼາຍວຽກງານໄດ້ມີຜົນສໍາເລັດຕາມແຜນການ, ອັນພົ້ນເດັ່ນແມ່ນ ວາລະສານໂຄສະນາໄດ້ສ້າງເວັບໄຊເປັນ ຂອງຕົນ ເພື່ອຫັນໄປສູ່ຄວາມທັນສະໄໝ. ເຖິງຈະມີຜົນສໍາເລັດຫຼາຍອັນ, ແຕ່ 2 ວາລະສານ ກໍຍັງມີຫຼາຍບັນຫາທີ່ຈະຕ້ອງໄດ້ປັບປຸງແກ້ໄຂ, ເປັນຕົ້ນແມ່ນ: ເນື້ອໃນຂອງວາລະສານບໍ່ເລິກເຊິ່ງ, ບໍ່ອຸດົມສົມບູນ, ການຈັດພິມບາງເທື່ອກໍຊັກຊ້າ, ຮູບແບບວາລະສານບໍ່ປ່ຽນແປງຫຼາຍ, ການປະດິດຄິດແຕ່ງ ແລະ ຄວາມຮູ້-ຄວາມສາມາດ ຂອງພະນັກງານ ມີຈໍາກັດ.

            ເພື່ອເຮັດໃຫ້ວຽກງານວາລະສານມີການຫັນປ່ຽນໄປສູ່ຄຸນນະພາບໃໝ່ ໃນຕໍ່ໜ້ານີ້ຈະຕ້ອງໄດ້ເອົາໃຈໃສ່ບາງບັນຫາດັ່ງນີ້:

     ໜຶ່ງ: ຕ້ອງປັບປຸງພາລະບົດບາດ, ສິດໜ້າທີ່ ຂອງວາລະສານອະລຸນໃໝ່ ແລະ ວາລະສານໂຄສະນາຄືນໃໝ່ ໃຫ້ຖືກຕ້ອງສອດຄ່ອງກັບສະພາບການໃນປັດຈຸບັນ, ພ້ອມກັນນັ້ນ ກໍຄົ້ນຄວ້າປັບປຸງກົງຈັກການຈັດຕັ້ງ, ສັບຊ້ອນບຸກຄະລາກອນຄືນໃໝ່ໃຫ້ເໝາະສົມກັບຄວາມຮູ້-ຄວາມສາມາດ ຂອງພະນັກງານ ໄປຄຽງຄູ່ກັບການປັບປຸງແບບແຜນວິທີເຮັດວຽກໃຫ້ມີວິທະຍາສາດ ເພື່ອເຮັດໃຫ້ການເຄື່ອນໄຫວວຽກງານ ມີປະສິດທິພາບ ສົມກັບຖານະເປັນວາລະສານ ຂອງພັກ.

     ສອງ: ປັບປຸງຮູບແບບ ແລະ ເນື້ອໃນຂອງວາລະສານ ເພື່ອສ້າງຄວາມສົນໃຈ ດຶງດູດສັງຄົມ, ໃນນັ້ນ ດ້ານຮູບແບບຕ້ອງມີຫຼາຍສີສັນ ຖືກກັບຈິດຕະສາດ ຂອງຄົນລາວ, ດ້ານເນື້ອໃນຕ້ອງພະຍາຍາມຊອກຮູ້ຄວາມຕ້ອງການ ຂອງສັງຄົມ ຈາກນັ້ນຈຶ່ງນໍາເອົາແນວທາງນະໂຍບາຍ ຂອງພັກ ມາຂຽນເປັນບົດຊີ້ແຈງ-ອະທິບາຍໃຫ້ສັງຄົມເຂົ້າໃຈ ແລະ ສາມາດນໍາໄປຈັດຕັ້ງຜັນຂະຫຍາຍໄດ້.

   ສາມ: ເອົາໃຈໃສ່ກໍ່ສ້າງຖັນແຖວພະນັກງານ ຂອງວາລະສານ ໃຫ້ມີຄວາມຮູ້-ຄວາມສາມາດ ຕອບສະໜອງກັບໜ້າທີ່ການເມືອງ ດ້ວຍການສົ່ງໄປບໍາລຸງ, ຖອດຖອນບົດຮຽນຢູ່ພາຍໃນ ແລະ ຕ່າງປະເທດ, ພ້ອມກັນນັ້ນ ກໍໃຫ້ຈັດການແຂ່ງຂັນຂຽນບົດໃນຫົວຂໍ້ຕ່າງໆ ເພື່ອຄັດເລືອກຜູ້ຂຽນດີ, ຂຽນເກັ່ງ, ນອກນັ້ນ ກໍໃຫ້ຄົ້ນຄວ້ານະໂຍບາຍນາມປາກກາທີ່ເໝາະສົມ ເພື່ອຊຸກຍູ້ເພື່ອນຮ່ວມງານ.

     ສີ່: ຄົ້ນຄວ້າສ້າງ ແລະ ພັດທະນາວາລະສານເອເລັກໂຕຣນິກ, ຫັນເປັນທັນສະໄໝ ເພື່ອເຮັດໃຫ້ການສຶກສາອົບຮົມແນວຄິດ ແລະ ການເຜີຍແຜ່ຂໍ້ມູນຂ່າວສານໄດ້ຢ່າງໄວວາ – ທັນກັບເຫດການ. ໄປຄຽງຄູ່ກັນນັ້ນ ກໍຕ້ອງພະຍາຍາມບຸກບືນ ສູ້ຊົນສ້າງລາຍຮັບ ໃຫ້ສາມາດກຸ້ມຕົນເອງທາງດ້ານງົບປະມານ.

     ຫ້າ: ແລກປ່ຽນບົດຮຽນກ່ຽວກັບວຽກງານວາລະສານ ກັບພາກສ່ວນຕ່າງໆ ນັບທັງພາຍໃນ ແລະ ຕ່າງປະເທດ ເພື່ອພັດທະນາວາລະສານໃຫ້ດີຂຶ້ນ.

    ຫົກ: ເພີ່ມທະວີການຊີ້ນໍາ-ນໍາພາ ຂອງຄະນະພັກ, ຄະນະນຳ ຄອສພ ຕໍ່ວຽກງານວາລະສານ ແລະ ປະກອບສ່ວນຂຽນບົດລົງວາລະສານໃຫ້ຫຼາຍ ເພື່ອເຮັດໃຫ້ເນື້ອໃນເລິກເຊິ່ງ ແລະ ບົດບາດ ກໍຈະໄດ້ຮັບການຍົກສູງຂຶ້ນເປັນກ້າວໆ.

ບົດ: ມີໄຊ, ພາບ: ດາວທະວີສຸກ

ບົດຄວາມໜ້າສົນໃຈ

Leave a Reply

Your email address will not be published. Required fields are marked *