ວຽກງານໂຄສະນາອົບຮົມ

ຫົວຫນ້າ ຄອສພ ຊີ້ນຳການກະກຽມເຂົ້າສູ່ພາກປະຕິບັດ

      ພາຍຫຼັງສຳເລັດ ກອງປະຊຸມໃຫຍ່ສະມາຊິກພັກ ຄັ້ງທີ V ຂອງອົງຄະນະພັກ ຄະນະໂຄສະນາອົບຮົມສູນກາງພັກ (ຄອສພ) ໃນວັນທີ 24 ສິງຫາ 2021 ແລະ ໃນຕອນບ່າຍຂອງວັນທີ 30 ສິງຫາ 2021 ຄະນະພັກຊຸດໃໝ່ ພ້ອມກັບບັນດາຫົວໜ້າກົມ ໄດ້ເປີດກອງປະຊຸມປຶກສາຫາລື ເພື່ອກຽມພ້ອມເຂົ້າສູ່ພາກປະຕິບັດຕົວຈິງ ໃນການຜັນຂະຫຍາຍມະຕິກອງປະຊຸມໃຫຍ່ຄັ້ງນີ້ ໃຫ້ເປັນຮູບປະທຳຕົວຈິງ.

          ໃຫ້ກຽດເປັນປະທານກອງປະຊຸມ ໂດຍ ທ່ານ ຄຳພັນ ເຜີຍຍະວົງ ຄະນະເລຂາທິການສູນກາງພັກ, ເລຂາຄະນະພັກ, ຫົວໜ້າຄະນະໂຄສະນາອົບຮົມສູນກາງພັກ ເຊິ່ງທ່ານໄດ້ລາຍງານ ການຕີລາຄາຂອງກົມການເມືອງສູນກາງພັກ ຕໍ່ຜົນສຳເລັດກອງປະຊຸມໃຫຍ່ ສະມາຊິກພັກ ຄັ້ງທີ V ຂອງອົງຄະນະພັກ ຄອສພ ເຫັນວ່າມີຜົນສຳເລັດເປັນຢ່າງດີ ແລະ ໄດ້ໃຫ້ທິດຊີ້ນຳບາງບັນຫາດັ່ງນີ້:

     – ລາຍງານການເມືອງພາກຕີລາຄາ ຍັງບໍ່ທັນແຈ້ງ ການຕີລາຄາກ່ຽວກັບແນວຄິດ-ການເມືອງ ຂອງຊັ້ນຄົນຕ່າງໆ ໂດຍສະເພາະນ້ຳໃຈຮັກຊາດ ເປັນເຈົ້າຕົນເອງຍັງບໍ່ທັນສູງ.

   – ການໃສ່ຮ້າຍປ້າຍສີຂອງກຳລັງປໍລະປັກ ຕໍ່ການນຳພາຂອງພັກ, ການຄຸ້ມຄອງຂອງລັດ ແລະ ການພັດທະນາລະບອບໃໝ່ຂອງພວກເຮົາຍັງຮ້າຍແຮງ ແຕ່ການຕອບໂຕ້ຍັງຊັກຊ້າ, ບໍ່ທັນການ ແລະ ບໍ່ທັນໜັກແໜ້ນ.

     – ການກຳສະພາບແນວຄິດຈິດໃຈຂອງຊັ້ນຄົນຕ່າງໆ ໃນສັງຄົມບໍ່ລະອຽດເລິກເຊິ່ງ ພາໃຫ້ການແກ້ໄຂສະພາບແນວຄິດໃຫ້ເປົ້າໝາຍຕ່າງໆ ບໍ່ທັນໄດ້ດີ ແລະ ການຕີລາຄາບໍ່ທັນຊັດເຈນ.

     – ການຄົ້ນຄວ້າທາງດ້ານທິດສະດີໃໝ່ ເພື່ອກຳນົດແນວທາງໃຫ້ສອດຄ່ອງ ແລະ ເປີດຊຸດຮຽນໃຫ້ເປົ້າໝາຍຕ່າງໆ ຍັງບໍ່ທັນເຮັດໄດ້.

     – ລະດັບຄວາມຮູ້-ຄວາມສາມາດ ຂອງພະນັກງານໂຄສະນາອົບຮົມ ບໍ່ທັນສູງ.

          ສັງລວມແລ້ວ: ການເປັນເສນາທິການໃຫ້ແກ່ກົມການເມືອງ ແລະ ຄະນະເລຂາທິການສູນກາງພັກ ຂອງຄະນະໂຄສະນາອົບຮົມສູນກາງພັກ ບໍ່ທັນສູງ ແລະ ບໍ່ທັນເປັນຄັງຫົວສະໝອງໃຫ້ແກ່ພັກ: ການປະກອບພື້ນຖານວັດຖຸ, ເຕັກນິກ, ງົບປະມານ,ພາຫະນະຮັບໃຊ້ຕ່າງໆ ຍັງບໍ່ທັນສົມຄູ່ກັບພາລະບົດບາດ ສຳລັບພາກທິດທາງ-ໜ້າທີ່ ໃນຕໍ່ໜ້າ ໃຫ້ເບິ່ງຄືນທິດທາງຈະແກ້ໄຂໃນຕໍ່ໜ້າ ແມ່ນຫຍັງແທ້ ແລະ ກຳນົດໃຫ້ແຈ້ງແຕ່ລະເນື້ອໃນ-ເປົ້າໝາຍ ຂອງການສຶກສາອົບຮົມ.

       ຈາກການຕີລາຄາຢ່າງກົງໄປກົງມາຂອງກົມການເມືອງສູນກາງພັກ ຕໍ່ວຽກງານໂຄສະນາອົບຮົມ ທ່ານຫົວໜ້າ ຄອສພ ຈຶ່ງໄດ້ໃຫ້ທິດຊີ້ນຳຕໍ່ກອງປະຊຸມ ແລະ ສະເໜີວຽກຈຸດສຸມຮີບດ່ວນ ເພື່ອໃຫ້ຄະນະພັກ ແລະ ຫົວໜ້າກົມມີຄຳເຫັນ ເຊິ່ງມີບັນດາໜ້າວຽກດັ່ງນີ້:

     – ປັບປຸງຄືນບັນດາເອກະສານ ກອງປະຊຸມໃຫຍ່ສະມາຊິກພັກ ຄັ້ງທີ V ຂອງອົງຄະນະພັກ ຄອສພ ໃຫ້ໄປຕາມການຕີລາຄາຂອງກົມການເມືອງສູນກາງພັກ ແລະ ປັງປຸງໃຫ້ແລ້ວ ພາຍໃນກາງເດືອນກັນຍາ 2021 ແລ້ວຈັດພິມເປັນປຶ້ມ.

     – ຄົ້ນຄວ້າຜັນຂະຫຍາຍ ຄຳເຫັນຊີ້ນຳຂອງສະຫາຍເລຂາທິການໃຫຍ່, ປະທານປະເທດ ຕໍ່ກອງປະຊຸມໃຫຍ່ສະມາຊິກພັກ ຄັ້ງທີ V ຂອງອົງຄະນະພັກ ຄອສພ ວຽກອັນໃດທີ່ພົວພັນກັບກົມໃດ ແມ່ນກົມນັ້ນຕ້ອງຕື່ນຕົວ ຈັດຕັ້ງຜັນຂະຫຍາຍເຂົ້າໃນວຽກງານຕົວຈິງ ໂດຍສ້າງເປັນແຜນການ, ແຜນງານ ແລະ ໂຄງການຄັກແນ່.

      – ວິເຄາະວິໄຈ, ອະທິບາຍຊີ້ແຈງ ແລະ ເຜີຍແຜ່ ຄຳເຫັນຂອງສະຫາຍເລຂາທິການໃຫຍ່, ປະທານປະເທດ ຕໍ່ເຫດການແລະ ບັນດາກອງປະຊຸມສຳຄັນຕ່າງໆ ເພື່ອໃຫ້ສັງຄົມເຂົ້າໃຈ.

    – ໃຫ້ແຕ່ລະກົມຄົ້ນຄ້ວາ ກຳນົດໜ້າທີ່ອັນຮີບດ່ວນ ຈະເຮັດຫຍັງແດ່? ລວມທັງການກະກຽມແຜນຜັນຂະຫຍາຍ ມະຕິກອງປະຊຸມໃຫຍ່ຄັ້ງທີ V ຂອງອົງຄະນະພັກ ຄອສພ ແລະ ການປັບປຸງກົງຈັກການຈັດຕັ້ງໃຫ້ກະທັດຮັດ-ໜັກແໜ້ນ.

     – ຄົ້ນຄວ້າປັບປຸງພື້ນຖານວັດຖຸເຕັກນິກແນວໃດ ໃນວຽກງານໂຄສະນາອົບຮົມ ນັບທັງສູນກາງ ແລະ ທ້ອງຖິ່ນ.

     – ຄົ້ນຄວ້າກ່ຽວກັບການນຳໃຊ້ພາຫະນະ, ເຄື່ອງມືແນວໃດ ເພື່ອສ້າງຄວາມເຂັ້ມແຂງໃຫ້ແກ່ການເຄື່ອນໄຫວ ວຽກງານໂຄສະນາອົບຮົມຂອງພັກ.

     – ຄົ້ນຄວ້າອອກຄຳແນະນຳ ຕໍ່ບັນຫາທີ່ພົ້ນເດັ່ນຕ່າງໆ ເປັນຕົ້ນການລະບາດຂອງພະຍາດໂຄວິດ-19, ການຈັດຕັ້ງປະຕິບັດວາລະແຫ່ງຊາດ ແລະ ອື່ນໆ.

   – ມອບໃຫ້ກົມອົບຮົມ ສົມທົບກັບຄະນະສະເພາະກິດ ຕ້ານພະຍາດໂຄວິດ-19 ຂັ້ນສູນກາງ ຈັດຕັ້ງການສຶກສາອົບຮົມ ໃຫ້ສັງຄົມຍົກສູງ ສະຕິລະວັງຕົວແນວໃດ? ແລະ ມອບໃຫ້ກົມໂຄສະນາ ສົມທົບກັບສະພາແຫ່ງຊາດ ຈັດຕັ້ງສຳມະນາເພື່ອສ້າງກົດໝາຍກ່ຽວກັບພັກ.

     – ກຽມເງື່ອນໄຂທຸກຢ່າງ ເພື່ອເປີດກອງປະຊຸມແນວຄິດທົ່ວປະເທດ.

       ທັງໝົດເນື້ອໃນທີ່ກອງປະຊຸມຕັ້ງຂຶ້ນ ແມ່ນເພື່ອກະກຽມໃຫ້ແກ່ການຜັນຂະຫຍາຍ ມະຕິກອງປະຊຸມໃຫຍ່ສະມາຊິກພັກ ຄັ້ງທີ V ຂອງອົງຄະນະພັກ ຄອສພ ແລະ ສ້າງຄວາມເປັນເອກະພາບ ເພື່ອນຳໄປຄົ້ນຄວ້າຢ່າງລະອຽດ ແລະ ຕົກລົງຮັບຮອງ ໃນກອງປະຊຸມຄະນະພັກ ຄອສພ ຄັ້ງທີ 2 ທີ່ຈະໄຂຂຶ້ນ ໃນວັນທີ 20 ກັນຍາ 2021 ນີ້.

ບກ

ບົດຄວາມໜ້າສົນໃຈ

Leave a Reply

Your email address will not be published. Required fields are marked *