ເບີ່ງໂລກກວ້າງ

ສ.ອາເມຣິກາ ເດີນໜ້າ ຫວັງຟື້ນຟູຄວາມສໍາພັນ ກັບ ສປ ຈີນ

     ຄືດັ່ງທີ່ພວກເຮົາຮູ້ ຄວາມຂັດແຍ່ງລະຫວ່າງ ສອງປະເທດມະຫາອໍານາດ ສ.ອາເມຣິກາ ກັບ ສປ ຈີນ ມີມາແຕ່ດົນຈົນກາຍເປັນສົງຄາມການຄ້າລະຫວ່າງສອງປະເທດ; ພາຍຫຼັງ ທ່ານ ໂຈ ໄບເດັນ ຂຶ້ນເປັນປະທານາທິບໍດີຄົນໃໝ່ ຂອງ ສ.ອາເມຣິກາ ກໍໄດ້ຫັນປ່ຽນຍຸດທະສາດໃໝ່ ຫວັງຟື້ນຟູຄວາມສໍາພັນກັບ ສປ ຈີນ ແລະ ໃນວັນທີ 10 ກັນຍາ 2021, ທ່ານ ໂຈ ໄບເດນ ປະທານາທິບໍດີ ສ.ອາເມຣິກາ ໄດ້ສົນທະນາ ທາງໂທລະສັບ ກັບ ທ່ານ ສີ ຈິ້ນຜິງ ປະທານປະເທດແຫ່ງ ສປ ຈີນ ເພື່ອຟື້ນຟູຄວາມສໍາພັນຂອງສອງປະເທດ ພາຍຫຼັງສາຍພົວພັນມີຄວາມເຄັ່ງຕຶງເປັນເວລາດົນນານ. ການສົນທະນາຄັ້ງນີ້ ເປັນຄັ້ງທີ 2 ທີ່ ປະທານາທິບໍດີ ໂຈ ໄບເດນ ຂຶ້ນຮັບຕໍາແໜ່ງ ເຊິ່ງການສົນທະນາຄັ້ງທໍາອິດ ແມ່ນມີຂຶ້ນ ໃນວັນທີ 11 ກຸມພາ 2021 ແຕ່ລົ້ມເຫຼວ.

     ການສົນທະນາ ຂອງຜູ້ນໍາທັງສອງປະເທດສ.ອາເມຣິກາ ແລະ ສປ ຈີນ ໃຊ້ເວລາ 90 ນາທີ, ຜູ້ນໍາທັງສອງ ໄດ້ປຶກສາຫາລືກັນຫຼາຍບັນຫາ ຢ່າງເລິກເຊິ່ງ ແລະ ກົງໄປກົງມາ ເພື່ອຊອກຫາທາງອອກ ແລະ ມີຜົນປະໂຫຍດຮ່ວມກັນ. ທ່ານ ສີ ຈິ້ນຜິງ ໄດ້ເວົ້າວ່າ: ສິ່ງທີ່ເປັນອຸປະສັກຂອງຄວາມສໍາພັນລະຫວ່າງ ສປ ຈີນ ແລະ ສ.ອາເມຣິກາ ນັ້ນແມ່ນມາຈາກນະໂຍບາຍຂອງ ສ.ອາເມຣິກາ ທີ່ມີຕໍ່ ສປ ຈີນ ທັງທາງດ້ານການຄ້າ, ເຕັກໂນໂລຢີ, ສິດທິມະນຸດ ແລະ ຕົ້ນຕໍແມ່ນການລະບາດຂອງພະຍາດໂຄວິດ-19, ແຕ່ວ່າ 2 ປະເທດ ສາມາດຈັດການບັນຫາດັ່ງກ່າວນັ້ນໄດ້ ດ້ວຍການຫັນໜ້າເຂົ້າຫາກັນປຶກສາຫາລືກັນຊອກຫາທາງອອກທີ່ເໝາະສົມ. ນອກຈາກນັ້ນ ທ່ານ ສີ ຈິ້ນຜິງ ຍັງໄດ້ກ່າວຕື່ມວ່າ: 2 ປະເທດຄວນປຶກສາກັນກ່ຽວກັບການປ່ຽນແປງຂອງສະພາບດິນຟ້າອາກາດ, ການປ້ອງກັນໂຣກລະບາດ ແລະ ການຟື້ນຟູເສດຖະກິດໂລກ ບັນຫາສໍາຄັນຕ້ອງເຄົາລົບຄວາມເຫັນທີ່ແຕກຕ່າງກັນ.

     ທ່ານ ໂຈ ໄບເດນ ໄດ້ເວົ້າວ່າ: ການປຶກສາຫາລືຄັ້ງນີ້ ເປັນສ່ວນໜຶ່ງໃນຄວາມພະຍາຍາມຢ່າງຕໍ່ເນື່ອງຂອງ ສ.ອາເມຣິກາ ເພື່ອຫວັງຟື້ນຟູຄວາມສໍາພັນ ແລະ ການຈັດການການແຂ່ງຂັນລະຫວ່າງ ສ.ອາເມຣິກາ ແລະ ສປ ຈີນ ຢ່າງມີຄວາມຮັບຜິດຊອບ ເພາະທັງສອງປະເທດຕ່າງກໍບໍ່ໄດ້ຮັບຜົນປະໂຫຍດຫຍັງຈາກຄວາມຂັດແຍ່ງ, ຝ່າຍ ສ.ອາເມຣິກາ ປາຖະໜາຢາກປຶກສາຫາລື ແລະ ແລກປ່ຽນຢ່າງກົງໄປກົງມາ ກັບ ສປ ຈີນ ໃນຫຼາຍບັນຫາ ເພື່ອກໍານົດຂອບເຂດການຮ່ວມມືກັນ ພ້ອມທັງຫຼີກລ່ຽງການສື່ສານ, ການວິໄຈ ທີ່ຜິດພາດ ແລະ ຄວາມຂັດແຍ່ງໂດຍບໍ່ເຈດຕະນາ ລວມເຖິງການຟື້ນຟູຄວາມສໍາພັນ ລະຫວ່າງ ສ.ອາເມຣິກາ-ສປ ຈີນ ໃຫ້ກັບສູ່ສະພາບປົກກະຕິ.

 

ຫົງລຶດີ

ບົດຄວາມໜ້າສົນໃຈ

Leave a Reply

Your email address will not be published. Required fields are marked *