ເບີ່ງໂລກກວ້າງ

ສປ ຈີນ​ ມີແຜນສະໜອງວັກຊີນປ້ອງກັນໂຄວິດ-19 ໃຫ້ປະຊາກອນໂລກຈໍານວນ2 ຕື້ໂດສ ໂດຍຜ່ານໂຄງການໂຄແວັກ

     ຍ້ອນພະຍາດໂຄວິດ-19 ໄດ້ແຜ່ລະບາດໄປທົ່ວໂລກ, ບັນດາສະຖາບັນການແພດຂອງຫຼາຍປະເທດ ໄດ້ມີຄວາມພະຍາຍາມໃນການຄົ້ນຫາ ແລະ ຜະລິດວັກຊີນອອກມາເພື່ອປ້ອງກັນການແຜ່ລະບາດຂອງພະຍາດໂຄວິດ-19. ໃນນັ້ນ ສປ ຈີນ​ ຖືວ່າແມ່ນປະເທດໜຶ່ງທີ່ປະສົບຜົນສໍາເລັດໃນການຄົ້ນຫາ ແລະ ຜະລິດວັກຊີນເພື່ອປ້ອງກັນໂຄວິດ-19 ຍີ່ຫໍ້ Sinopham ແລະ Sinovac ເຊິ່ງອົງການອານາໄມໂລກກໍ່ໄດ້ຮັບຮອງວັກຊີນປ້ອງກັບໂຄວິດ-19 ຂອງຈີນ ແລະ ມີການນໍາໃຊ້ຢູ່ຫຼາຍປະເທດໃນໂລກເຫັນວ່າມີປະສິດທິພາບສູງ.

     ທ່ານ Zheng Zhongwei, ຜູ້ອໍານວຍການສູນພັດທະນາວິທະຍາສາດ ແລະ ເຕັກໂນໂລຢີການແພດ ຄະນະກໍາມະການສາທາລະນະສຸກແຫ່ງຊາດຂອງຈີນ (NHC) ໄດ້ກ່າວວ່າ:​  ປັດຈຸບັນ ສປ ຈີນ ສາມາດໃນການຜະລິດວັກຊີນໂຄວິດ-19 ໄດ້ປະມານ 5 ຕື້ໂດສ​ ຕໍ່ປີ, ເຊິ່ງສາມາດຕອບສະໜອງຕາມຄວາມຮຽກຮ້ອງຕ້ອງການໃນການສັກຢາປ້ອງກັນພະຍາດຢູ່ທັງພາຍໃນ ແລະ ທົ່ວໂລກ. ມາຮອດວັນທີ 4 ກັນຍານີ້, ສປ ຈີນ ໄດ້ສັກວັກຊີນໃຫ້ພົນລະເມືອງ ຂອງຕົນຢູ່ພາຍໃນປະເທດໄດ້ຈໍານວນ 2,01 ຕື້ໂດສ ເຊິ່ງຖືວ່າເປັນຈໍານວນຕົວເລກທີ່ສູງທີ່ສຸດໃນໂລກ ແລະ ຈໍານວນດັ່ງກ່າວກວມເຖິງ 37,6% ຂອງຈໍານວນວັກຊີນທີ່ໄດ້ສັກປະຊາກອນໃນທົ່ວໂລກ.

     ທ່ານ Zheng ກ່າວຕື່ມອີກວ່າ: ໃນໄລຍະຜ່ານມາ ສປ ຈີນ ໄດ້ສະໜອງວັກຊີນປ້ອງກັນໂຄວິດ-19 ໃຫ້ບັນດາປະເທດຕ່າງໆຫຼາຍແສນໂດສ ແລະ ໄດ້ສະໜອງວັກຊີນປ້ອງກັນໂຄວິດ-19​ ໂດຍຜ່ານໂຄງການໂຄແວັກໄປແລ້ວຈໍານວນ 1 ຕື້ໂດສ ແລະ ຍັງມີແຜນການສືບຕໍ່ສົ່ງຕື່ມອີກ 1 ຕື້ໂດສ ລວມເປັນ 2 ຕື້ໂດສ ຕາມທີ່ໃຫ້ສັນຍາໄວ້.

ຮຽບຮຽງໂດຍ: ສອນທິ

ບົດຄວາມໜ້າສົນໃຈ

Leave a Reply

Your email address will not be published. Required fields are marked *