ພື້ນຖານແນວຄິດ-ທິດສະດີ ຂອງພັກ

ສະມາຊິກສະພາ ເປັນຫ່ວງການປະຕິບັດວາລະແຫ່ງຊາດ ແລະ ບາງຄໍາເຫັນຂອງທ່ານນາຍົກ

        ກອງປະຊຸມສະໄໝວິສາມັນ ເທື່ອທີ 1  ຂອງສະພາແຫ່ງຊາດ ຊຸດທີ IX ໄດ້ດໍາເນີນໃນລະຫວ່າງວັນທີ 5-10 ສິງຫາ 2021, ສໍາເລັດລົງຕາມຄາດໝາຍທີ່ວາງໄວ້ ທີ່ຫ້ອງປະຊຸມສະພາແຫ່ງຊາດ, ນະຄອນຫຼວງວຽງຈັນ ພາຍໃຕ້ການເປັນປະທານຂອງ ທ່ານ ໄຊສົມພອນ ພົມວິຫານ ປະທານສະພາແຫ່ງຊາດ ໂດຍເປັນກຽດເຂົ້າຮ່ວມຂອງ ທ່ານ ທອງລຸນ ສີສຸລິດ ເລຂາທິການໃຫຍ່, ປະທານປະເທດແຫ່ງ ສປປ ລາວ, ມີບັນດາການນໍາຂັ້ນສູງ ແລະ ສະມາຊິກສະພາແຫ່ງຊາດເຂົ້າຮ່ວມຢ່າງພ້ອມພຽງ. ກອງປະຊຸມໄດ້ສຸມໃສ່ປຶກສາຫາລື ແລະ ພິຈາລະນາຮັບຮອງເອົາຫຼາຍບັນຫາ ໃນນັ້ນໄດ້ຄົ້ນຄ້ວາ ປະກອບຄໍາເຫັນຫຼາຍແມ່ນ ວາລະແຫ່ງຊາດ ກ່ຽວກັບການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ແລະ ວາລະແຫ່ງຊາດວ່າດ້ວຍການແກ້ໄຂຢາເສບຕິດ.

           ສອງວາລະແຫ່ງຊາດດັ່ງກ່າວ ແມ່ນວຽກບູລິມະສິດ ຈໍາເປັນ ແລະ ຮີບດ່ວນ ທີ່ຖືກນໍາມາຄົ້ນຄວ້າໃນກອງປະຊຸມຄັ້ງນີ້ ເຊິ່ງ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ລັດຖະມົນຕີກະຊວງແຜນການ ແລະ ການລົງທຶນ ໄດ້ຂຶ້ນລາຍງານ ວາລະແຫ່ງຊາດ ກ່ຽວກັບການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການ ເງິນຕໍ່ກອງປະຊຸມ ເຊິ່ງທ່ານ ໄດ້ຍົກໃຫ້ເຫັນວ່າ: ຄວາມຫຍຸ້ງຍາກທາງດ້ານເສດຖະກິດ-ການ ເງິນ ຂອງປະເທດເຮົາ ແມ່ນໄດ້ສະສົມແກ່ຍາວມາເປັນເວລາດົນ ຍັງບໍ່ໄດ້ຮັບການແກ້ໄຂຢ່າງຂາດຕົວ ເປັນຕົ້ນ ແມ່ນບັນຫາໜີ້ສິນ, ການປັບປຸງສະພາບແວດລ້ອມການດຳເນີນທຸລະກິດ ແລະ ບັນຫາອື່ນໆທີ່ກ່ຽວພັນ; ໃນຂະນະທີ ບັນຫາຢາເສບຕິດກໍເປັນອີກໜຶ່ງບັນຫາ ທີ່ຍັງແກ້ໄຂບໍ່ຕົກ ແລະ ສະສົມແກ່ຍາວມາຮອດປະຈຸບັນ ເຊິ່ງ ທ່ານ ພົນໂທ ວິໄລ ຫຼ້າຄໍາຟອງ ກໍາມະການກົມການເມືອງສູນກາງພັກ, ລັດຖະມົນຕີກະຊວງປ້ອງກັນຄວາມສະຫງົບ ໄດ້ຂຶ້ນລາຍງານວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ເຊິ່ງທ່ານໄດ້ຍົກໃຫ້ເຫັນວ່າ: ໃນປະເທດເຮົາ ຕາມຂໍ້ມູນເບື້ອງຕົ້ນ ມີຜູ້ຕິດຢາເສບຕິດສະເລ່ຍ ປະມານ 0,94% ຂອງພົນລະເມືອງທັງໝົດ  ແລະ ປັດຈຸບັນ ບັນຫາຢາເສບຕິດຍັງມີທ່າອ່ຽງເພີ່ມທະວີຄວາມຮຸນແຮງ ແລະ ແຜ່ກະຈ່າຍອອກເປັນວົງກວ້າງ; ສະນັ້ນ, ລັດຖະບານ ຈຶ່ງໄດ້ຍົກເອົາການແກ້ໄຂບັນຫາຄວາມຫຍຸ້ງຍາກທາງດ້ານເສດຖະກິດ-ການເງິນ ແລະ ການແກ້ໄຂບັນຫາຢາເສບຕິດ ຂຶ້ນເປັນວາລະແຫ່ງຊາດ ໂດຍໄດ້ກໍານົດເວລາທີ່ແນ່ນອນ ເປັນເວລາ ສອງປີເຄິ່ງ ນັບແຕ່ປີ 2021-2023.

        ຕໍ່ບັນຫາດັ່ງກ່າວ, ບັນດາສະມາຊິກສະພາແຫ່ງຊາດ ແຕ່ລະເຂດ ກໍໄດ້ປະກອບຄໍາຄິດຄໍາເຫັນຢ່າງພາວະວິໃສ ດ້ວຍຄວາມຮັບຜິດຊອບທາງດ້ານການເມືອງສູງ ເຊິ່ງລວມມີ 3 ຈຸດໃຫຍ່ ເປັນຕົ້ນແມ່ນ ທາງດ້ານເນື້ອໃນ ຂອງ 2 ວາລະດັ່ງກ່າວ ຕ້ອງມີການກໍານົດໃຫ້ຈະແຈ້ງຮັດກຸມ ວຽກຈຸດສຸມທີ່ຮີບດ່ວນຕົ້ນຕໍແທ້ໆ; ບັນຫາທີສອງ ແມ່ນກ່ຽວກັບໄລຍະເວລາຂອງການຈັດຕັ້ງປະຕິບັດ 2 ວາລະແຫ່ງຊາດ ແມ່ນມີໄລຍະເວລາທີ່ສັ້ນ ເຊິ່ງຈຸດນີ້ ບັນດາສະມາຊິກສະພາແຫ່ງຊາດ ມີຄວາມເປັນຫ່ວງຫຼາຍຢ້ານບໍ່ບັນລຸຕາມຄາດໝາຍ ແລະ ຈຸດທີ 3 ແມ່ນເປັນຫ່ວງກ່ຽວກັບຄວາມສາມາດຊີ້ນໍາ-ບັນຊາ ໃນການຈັດຕັ້ງປະຕິບັດ, ການນໍານົດນະໂຍບາຍ, ກົນໄກ, ກົງຈັກການຈັດຕັ້ງ ແລະ ບຸກຄະລາກອນ ທີ່ຈະຮັບໃຊ້ໜ້າທີ່ດັ່ງກ່າວໃຫ້ເກີດຜົນຕົວຈິງ.

        ຕໍ່ຄໍາຄິດເຫັນ ແລະ ຄໍາຖາມເຈາະຈີ້ມທີ່ ບັນດາສະມາຊິກສະພາແຫ່ງຊາດ ໄດ້ຕັ້ງຂຶ້ນນັ້ນ, ທ່ານ ນາຍົກລັດຖະມົນຕີ ພັນຄໍາ ວິພາວັນ ໄດ້ຊີ້ແຈ້ງໃຫ້ຄວາມກະຈ່າງແຈ້ງ ຄື: ສໍາລັບຈຸດທີ 1 ທາງດ້ານເນື້ອໃນນັ້ນ ແມ່ນຈະນໍາໄປປັບປຸງໃຫ້ຮັດກຸມ ແລະ ແທດເໝາະກວ່າເກົ່າ ທັງດ້ານເນື້ອໃນຮ່າງວາລະ ແລະ ແຜນປະຕິບັດງານ; ຈຸດທີ 2 ໄລຍະເວລາຂອງການຈັດຕັ້ງປະຕິບັດ 2 ປີເຄິ່ງນີ້ ແມ່ນມີຄວາມເໝາະສົມແລ້ວ ຖ້າວ່າເວລາຍາວກວ່ານີ້ ກໍຈະບໍ່ແມ່ນວາລະ ມັນຈະກາຍເປັນແຜນ 5 ປີ ແລະ ບັນຫາດັ່ງກ່າວກໍຈະແກ່ຍາວອອກໄປຕຶ່ມ, ເຫດຜົນທີ່ເລືອກ 2 ປີເຄິ່ງ ກໍແມ່ນເພື່ອຈະສ້າງການຫັນປ່ຽນແຕ່ຫົວທີ ເພື່ອໃຫ້ທິດທາງການແກ້ໄຂ 2 ບັນຫາດັ່ງກ່າວເດີນໄປໃນຖ່ວງທ່າທີ່ດີ; ຈຸດທີ 3 ກົນໄກການບັນຊາການຈັດຕັ້ງປະຕິບັດນີ້ ເຊິ່ງບັນດາສະມາຊິກສະພາສ່ວນຫຼາຍ ຢາກໃຫ້ຕັ້ງຄະນະສະເພາະກິດຂຶ້ນມາ ຈຸດນີ້ ລັດຖະບານເຫັນວ່າຍັງບໍ່ຈໍາເປັນ ເພາະຂອດຕັດສິນສຸດທ້າຍກໍແມ່ນນາຍົກລັດຖະມົນຕີ ສະນັ້ນ ການຕັ້ງຄະນະສະເພາະກິດ ເຫັນວ່າບໍ່ມີຄວາມຈໍາເປັນ ເພາະວ່າຄະນະນໍາແຕ່ລະຂັ້ນຕ້ອງບັນຊາຕາມພາລະໜ້າທີ່ ແລະ ຂົງເຂດຂອງຕົນຢູ່ແລ້ວ, ສ່ວນບຸກຄະລາກອນ ແລະ ນະໂຍບາຍຕ່າງໆ ລັດຖະບານກໍຈະໄດ້ດັດປັບໃຫ້ເໝາະສົມ, ສະນັ້ນ ຈຶ່ງຮຽກຮ້ອງ ຄະນະພັກ, ຄະນະນໍາແຕ່ລະຂັ້ນ ແລະ ຜູ້ທີ່ຮັບຜິດຊອບໜ້າທີ່ວຽກງານດັ່ງກ່າວນີ້ ຈົ່ງເຊີດຊູຄວາມຮັບຜິດຊອບໜ້າທີ່ການເມືອງ ປະຕິບັດໜ້າທີ່ຢ່່າງຈິງຈັງຈິງໃຈ ເພື່ອພ້ອມກັນສ້າງການຫັນປ່ຽນທີ່ດີ; ຕິດພັນກັບການຈັດຕັ້ງປະຕິບັດ 2 ວາລະແຫ່ງຊາດດັ່ງກ່າວ; ປັດຈຸບັນຄັງສະສົມແຫ່ງຊາດມີໜ້ອຍ ເນື່ອງຈາກວ່າ ເສດຖະກິດມະຫາພາກມີຄວາມບອບບາງ, ຖານການຜະລິດມີໜ້ອຍ, ການເກັບລາຍຮັບມີການຮົ່ວໄຫຼ, ເຮັດແນວໃດຈະເຮັດໃຫ້ຄັງສະສົມເພີ່ມຂຶ້ນ ອັນທີ່ໜຶ່ງແມ່ນມາຈາກການຜະລິດ, ການຄ້າ ແລະ ການສົ່ງອອກສິນຄ້າ ທັງພາກລັດ ແລະ ເອກະຊົນ, ຫັນການເກັບລາຍຮັບໃຫ້ເປັນທັນສະໄໝ ເພື່ອອັດການຮົ່ວໄຫຼຂອງການເກັບລາຍຮັບ; ອັນທີ່ສອງ ແມ່ນໄດ້ມາຈາກການປະຢັດ ເປັນຕົ້ນແມ່ນ ອັນທີ່ຈະໄດ້ຈັດຕັ້ງປະຕິບັດໄວໆນີ້ແມ່ນບັນຫາການຄຸ້ມຄອງ ແລະ ນໍາໃຊ້ລົດຂອງລັດ ເຊິ່ງຈະໄດ້ຫັນໄປສູ່ການນໍາໃຊ້ແບບປະຢັດທີ່ເໝາະສົມ.

ຂ່າວ: ຫົງລຶດີ

ພາບ: ສະພາແຫ່ງຊາດ

ບົດຄວາມໜ້າສົນໃຈ

Leave a Reply

Your email address will not be published. Required fields are marked *