ບົດຮຽນທາງດ້ານທິດສະດີ ແລະ ພຶດຕິກຳ

ສະພາທິດສະດີສູນກາງພັກລາວ-ຫວຽດນາມ ຮ່ວມກັນ ສະຫຼຸບຕີລາຄາໝາກຜົນຂອງການຮ່ວມມືໃນໄລຍະ 5 ປີຜ່ານມາ

           ກອງປະຊຸມແບບທາງໄກ ຂອງ 2 ສະພາທິດສະດີສູນກາງພັກ ລາວ-ຫວຽດນາມ ໄດ້ຈັດຂຶ້ນໃນຕອນບ່າຍ ຂອງໃນວັນທີ 17 ກັນຍາ 2021 ຢູ່ທີ່ຫ້ອງປະຊຸມຂອງຄະນະພົວພັນຕ່າງປະເທດສູນກາງພັກ; ຝ່າຍລາວນໍາໂດຍ ສະຫາຍ ປອ ຄໍາພັນ ເຜີຍຍະວົງ, ຄະນະເລຂາທິການສູນກາງພັກ, ຫົວໜ້າຄະນະໂຄສະນາອົບຮົມສູນກາງພັກ, ປະທານສະພາທິດສະດີສູນກາງພັກປະຊາຊົນ ປະຕິວັດລາວ ແລະ ຝ່າຍ ສສ ຫວຽດນາມ ນໍາໂດຍສະຫາຍ ຫງວຽນ ຊວັນ ຖັງ, ກໍາມະການກົມການເມືອງສູນກາງພັກ, ອໍານວຍການສະຖາບັນການເມືອງແຫ່ງຊາດໂຮ່ຈີມິງ, ປະທານສະພາທິດສະດີສູນກາງພັກກອມມູນິດຫວຽດນາມ, ມີຜູ້ຕາງໜ້າຈາກອົງການຈັດຕັ້ງທີ່ກ່ຽວຂ້ອງຂັ້ນສູນກາງ ແລະ ສະມາຊິກສະພາທິດສະດີສູນກາງພັກ ທັງສອງຝ່າຍເຂົ້າຮ່ວມ.

             ຈຸດປະສົງຂອງກອງປະຊຸມ ແມ່ນເພື່ອສະຫຼຸບຕີລາຄາໝາກຜົນການຮ່ວມມື ໃນວຽກງານທິດສະດີ ຂອງພັກໃນໄລຍະ 5 ປີຜ່ານມາ ຂອງ 2 ສະພາທິດສະດີສູນກາງພັກ ລາວ-ຫວຽດນາມ ເຊິ່ງທັງສອງຝ່າຍໄດ້ຜັດປ່ຽນກັນ ສະຫຼຸບຕີລາຄາການຮ່ວມມືແລກປ່ຽນ ທາງດ້ານທິດສະດີ, ການຄົ້ນຄວ້າວິທະຍາສາດ ແລະ ໃຫ້ຄໍາປຶກສາດ້ານນະໂຍບາຍແກ່ສູນກາງພັກ ແລະ ກໍໄດ້ຍົກໃຫ້ເຫັນຜົນສໍາເລັດຫຼາຍດ້ານ ທີ່ສອງຝ່າຍຮ່ວມກັນຍາດມາໄດ້ໄລຍະ 5 ປີຜ່ານມາ (2016-2021) ເປັນຕົ້ນ: ການບໍາລຸງກໍ່ສ້າງພະນັກງານຂັ້ນນໍາພາ-ຄຸ້ມຄອງ ລະຫວ່າງສອງພັກ; ການແປບົດນິພົນ ໂຮ່ຈີມິງຄົບຊຸດ ຈາກພາສາຫວຽດເປັນພາສາລາວ ໄດ້ທັງໝົດຈຳນວນ 15 ເຫຼັ້ມ ແລະ ວັດຈະນານຸກົມ ໂຮ່ຈີມິງວິທະຍາ 1 ເຫຼັ້ມ ດ້ວຍທຶນຊ່ວຍເຫຼືອຂອງຫວຽດນາມ ແລະ ທຶນປະກອບສ່ວນຂອງຝ່າຍລາວ ເຊິ່ງສອງຝ່າຍ ໄດ້ຈັດພິທີເປີດໂຄງການດັ່ງກ່າວຢ່າງເປັນທາງການ ໃນວັນທີ 10/5/2016; ສອງຝ່າຍໄດ້ມີການຮ່ວມມື, ​ເຄື່ອນ​ໄຫວ​ວຽກ​ງານ​ຄົ້ນ​ຄວ້າ​ທິດ​ສະ​ດີ ແລະ​ ແລກປ່ຽນ​ບົດ​ຮຽນ​ຕ່າງໆ ຢ່າງ​ມີ​ວິ​ທະ​ຍາ​ສາດ, ເປັນຕົ້ນແມ່ນ ການຈັດກອງປະຊຸມສໍາມະນາທິດສະດີ ລະຫວ່າງ ສອງພັກລາວ-ຫວຽດນາມ, ການແລກປ່ຽນຄະນະຜູ້ແທນຂັ້ນສູງ ແລະ ການແລກປ່ຽນຂໍ້ມູນຂ່າວສານທາງດ້ານທິດສະດີ; ມາເຖິງປັດຈຸບັນ ສອງຝ່າຍໄດ້ຜັດປ່ຽນກັນ ເປັນເຈົ້າພາບຈັດກອງປະຊຸມສໍາມະນາທິດສະດີສອງພັກລາວ-ຫວຽດນາມ ຈໍານວນ 7 ຄັ້ງ, ມີການແລກປ່ຽນຂໍ້ມູນຂ່າວສານດ້ານທິດສະດີ ໂດຍມີການສົ່ງບົດຂ່າວ ທິດສະດີ ແລະ ພຶດຕິກໍາ,   ໝາກຜົນການຄົ້ນຄວ້າ, ບົດຂຽນທີ່ພົວພັນເຖິງທິດສະດີການເມືອງນໍາກັນ. ສະພາທິດສະດີສູນກາງພັກກອມມູນິດຫວຽດນາມ ໄດ້ສົ່ງປຶ້ມໝາກຜົນຂອງກອງປະຊຸມສໍາມະນາທິດສະດີ ຄັ້ງທີ 3 ລະຫວ່າງສອງພັກພາຍໃຕ້ຫົວຂໍ້ ການພັດທະນາເສດຖະກິດຕະຫຼາດ ຕາມທິດສັງຄົມນິຍົມຢູ່ຫວຽດນາມ ແລະ ລາວ ໃຫ້ສະພາທິດ​ສະ​ດີ​ສູນ​ກາງ​ພັກ​ປະ​ຊາ​ຊົນ​ ປະ​ຕິ​ວັດ​ລາວ ລວມທັງ​ໝົດ 920 ເຫຼັ້ມ (ພາສາລາວ ແລະ ພາ​ສາຫວຽດນາມ). ນອກນັ້ນ, ຝ່າຍຫວຽດນາມ ຍັງໄດ້ໃຫ້ການຊ່ວຍເຫຼືອບໍາລຸງ ແລະ ກໍ່ສ້າງພະນັກງານຂັ້ນຕ່າງໆໃຫ້ແກ່ ພັກປະຊາຊົນ ປະຕິວັດລາວ ເຊິ່ງເຫັນວ່າການບໍາລຸງກໍ່ສ້າງດັ່ງກ່າວ ໄດ້ຮັບປະສິດທິຜົນເປັນຢ່າງດີ; ຄຽງຄູ່ກັບການຕີລາຄາ ໝາກຜົນທີ່ສອງຝ່າຍຮ່ວມກັນຍາດມາໄດ້ນັ້ນ ຜູ້ແທນຂອງສອງຝ່າຍ ຍັງໄດ້ຜັດປ່ຽນກັນ ປະກອບຄໍາຄິດຄໍາເຫັນ, ປຶກສາຫາລື ທິດທາງການຮ່ວມມືໄລຍະ 5 ປີຕໍ່ໜ້າ (2021-2026) ເຊິ່ງສອງຝ່າຍ ຍັງໄດ້ເຫັນດີສືບຕໍ່​ຍົກ​ລະ​ດັບ​ການຮ່ວມມື ແລ​ກ​ປ່ຽນ​ບົດ​ຮຽນ​ດ້ານ​ທິດ​ສະດີຂຶ້ນຕື່ມອີກ ແລະ ພ້ອມກັນສືບຕໍ່ກະກຽມຈັດກອງປະຊຸມສໍາມະນາ ທິດສະດີສອງພັກ ຄັ້ງທີ 8 ຄາດວ່າຈະຈັດຂຶ້ນໃນທ້າຍປີນີ້.

             ກອງປະຊຸມຄັ້ງນີ້ ຖືວ່າເປັນກອງປະຊຸມຮູບແບບໃໝ່ ຂອງການພົວພັນຮ່ວມມື ຂອງສອງຝ່າຍ ນອກຈາກສະຫຼຸບຕີລາຄາໝາກຜົນ ຂອງການຮ່ວມມືໃນໄລຍະ 5 ປີຜ່ານມາ ແລະ ກໍານົດທິດທາງການຮ່ວມມືໃນຕໍ່ໜ້າແລ້ວ ຍັງໄດ້ເປັນເອກະພາບກັນ ໃນການຜັນຂະຫຍາຍຂໍ້ຕົກລົງ ລະຫວ່າງ ການນໍາຂັ້ນສູງ ຂອງສອງພັກ ລາວ ແລະ ຫວຽດນາມ ທາງດ້ານວຽກງານແນວຄິດ, ທິດສະດີ, ພຶດຕິກໍາ ແລະ ບໍາລຸງກໍ່ສ້າງພະນັກງານ, ເພື່ອເສີມສ້າງສາຍພົວພັນມິດຕະພາບທີ່ຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ​, ສອງລັດ ລາວ- ຫວຽດນາມ ໃຫ້ນັບມື້ຈະເລີນງອກງາມຍິ່ງໆຂຶ້ນ.

ພາບ ແລະ ຂ່າວ ໂດຍ: ສອນທິ

ບົດຄວາມໜ້າສົນໃຈ

Leave a Reply

Your email address will not be published. Required fields are marked *