ຂ່າວເດັ່ນ-ປະເດັນດັງ

ສປຊ ຮັບຮອງຮ່າງຍັດຕິວ່າດ້ວຍ ການຫຼຸດພົ້ນອອກຈາກປະເທດດ້ອຍພັດທະນາ ຂອງ ສປປ ລາວ ແລະ ອີກ 2 ປະເທດ

     ໃນວັນທີ 24 ພະຈິກ 2021, ກອງປະຊຸມສະມັດຊາໃຫຍ່ ສປຊ ສະໄໝສາມັນ ຄັ້ງທີ 40 (40th Plenary meeting) ໄດ້ພິຈາລະນາ ແລະ ຮັບຮອງເອົາບົດລາຍງານຂອງ ສະພາເສດຖະກິດ-ສັງຄົມ ຫົວຂໍ້ທີ 9 ຮ່າງຍັດຕິ ສະບັບເລກທີ A/76/L.6/Rev.1 ວ່າດ້ວຍການຫຼຸດພົ້ນອອກຈາກສະຖານະພາບປະເທດດ້ອຍພັດທະນາ ຂອງ 3 ປະເທດຄື: ບັງກລາເດັດ, ສປປ ລາວ ແລະ ເນປານ (Graduation of Bangladesh, Lao PDR and Nepal from the Least Developed Country Category).

     ຍັດຕິດັ່ງກ່າວ ສະເໜີໂດຍ ຫ້ອງການຜູ້ຕາງໜ້າຂັ້ນສູງ ສໍາລັບກຸ່ມປະເທດ LDCs, LLDCs & SIDS (OHRLLS) ໂດຍຜ່ານກໍາມະການເສດຖະກິດ ແລະ ການເງິນ (ກໍາມະການ 2) ຂອງສະມັດຊາໃຫຍ່, ເນື້ອໃນຜົນການປະເມີນ ຂອງຄະນະກຳມະການນະໂຍບາຍເພື່ອການພັດທະນາ (CDP) ໃນເດືອນ ກຸມພາ 2021 ທີ່ສະເໜີໃຫ້ທັງ 3 ປະເທດ ຫຼຸດພົ້ນອອກຈາກສະຖານະພາບດ້ອຍພັດທະນາ ແລະ ມີໄລຍະເວລາໃນການຂ້າມຜ່ານແບບໂລ່ງລ່ຽນຕື່ມອີກ 5 ປີ (ປົກກະຕິ 3 ປີ). ໝາຍຄວາມວ່າ ໃນປີ 2024, ຄະນະກຳມະການ CDP ຈະພິຈາລະນາຄືນ ເຖິງຄວາມຈໍາເປັນໃນການຂະຫຍາຍໄລຍະຂ້າມຜ່ານໃຫ້ 3 ປະເທດ ຖ້າຍັງປະສົບບັນຫາໃນການຟື້ນຟູລະບົບເສດຖະກິດ ທີ່ເກີດຈາກການແຜ່ລະບາດ ຂອງພະຍາດໂຄວິດ-19. ການຮັບຮອງເອົາຮ່າງຍັດຕິ ແມ່ນຈະໄດ້ຮັບຄວາມເຫັນດີເປັນເອກະສັນ ຈາກບັນດາສະມາຊິກອົງການ ສປຊ ທັງໝົດ.

     ໃນໂອກາດທີ່ມີຄວາມໝາຍສຳຄັນດັ່ງກ່າວ ທ່ານເອກອັກຄະລັດຖະທູດ, ຜູ້ຕາງໜ້າຖາວອນ ແຫ່ງ ສປປ ລາວ ປະຈໍາ ສປຊ ໄດ້ສະແດງຄວາມຂອບໃຈມາຍັງທຸກພາກສ່ວນ ທີ່ໃຫ້ການຊ່ວຍເຫຼືອໃນການກະກຽມ ຈົນເຖິງຂະບວນການຮັບຮອງເອົາຍັດຕິດັ່ງກ່າວ. ພ້ອມນັ້ນ ທ່ານຍັງໄດ້ເນັ້ນວ່າ ການຫຼຸດພົ້ນອອກຈາກສະຖານະພາບປະເທດດ້ອຍພັດທະນາ ຕ້ອງຄໍານຶງເຖິງຄຸນນະພາບ ແລະ ຄວາມຍືນຍົງ ເພື່ອຮັບປະກັນວ່າປະເທດຈະບໍ່ກັບຄືນໄປຢູ່ໃນສະຖານະພາບເກົ່າ.

 

ບົດ: ບ.ກ ການເມືອງ

ຂໍ້ມູນຈາກ: Permanent Mission of the Lao PDR to the United Nations.

 

ບົດຄວາມໜ້າສົນໃຈ

Leave a Reply

Your email address will not be published. Required fields are marked *