ບົດຮຽນທາງດ້ານທິດສະດີ ແລະ ພຶດຕິກຳ

ພ້ອມກັນຍົກສູງສະຕິ ເພື່ອຮັບມືກັບໄພທໍາມະຊາດ ທີ່ອາດຈະເກີດຂຶ້ນໄດ້

          ໄປຄວບຄູ່ກັບການຍົກສູງສະຕິ ຄວາມຮັບຜິດຊອບ ຕໍ່ການຈັດຕັ້ງປະຕິບັດ ມາດຕະການ ປ້ອງກັນ ແລະ ຄວບຄຸມ ການລະບາດ ຂອງພະຍາດ ໂຄວິດ-19 ທີ່ພວມລະບາດເປັນວົງກວ້າງ ຢູ່ປະເທດເຮົາ, ການກຽມພ້ອມຮັບມືກັບໄພທໍາມະຊາດ ທີ່ອາດຈະເກີດຂຶ້ນ ກໍແມ່ນບັນຫາໜຶ່ງທີ່ບໍ່ຄວນຖືເບົາ; ປັດຈຸບັນພວກເຮົາພວມຢູ່ໃນຊ່ວງໄລຍະລະດູຝົນ ເຊິ່ງຈະມີລົມພະຍຸຝົນຟ້າຄະນອງ ເປັນແຕ່ລະໄລຍະຢູ່ບາງພາກ ຂອງປະເທດເຮົາ, ໃນແຕ່ລະປີປະເທດເຮົາ ກໍໄດ້ຮັບຜົນກະທົບຈາກໄພທໍາມະຊາດເປັນຈໍານວນບໍ່ໜ້ອຍ. ໃນຕົ້ນເດືອນກັນຍາ ທີ່ຜ່ານມາບັນດາແຂວງທາງພາກໃຕ້ ໂດຍສະເພາະແມ່ນເມືອງສາລະວັນ ຂອງແຂວງສາລະວັນ ກໍຖືກລົມພາຍຸເຂດຮ້ອນໂກເຊີນ ພັດຜ່ານເຮັດໃຫ້ປະຊາຊົນ 4 ບ້ານໄດ້ຮັບຜົນກະທົບ, ເຮືອນຂອງປະຊາຊົນ ຈໍານວນ 90 ຫຼັງໄດ້ຮັບຄວາມເສຍຫາຍ, ໃນນັ້ນ ເສຍຫາຍໜັກ 25 ຫຼັງ, ເຫດການດັ່ງກ່າວເຮັດໃຫ້ມີຜູ້ເສຍຊີວິດ 1 ຄົນ, ບາດເຈັບສາຫັດ 2 ຄົນ, ເຈັບເລັກໜ້ອຍ 6 ຄົນ ແລະ ມີປະຊາຊົນຂາດທີ່ຢູ່ອາໄສ ຈໍານວນ 139 ຄົນ. ພາຍຫຼັງເຫດການດັ່ງກ່າວ ທ່ານ ໂພໄຊ ໄຊຍະສອນ ເຈົ້າແຂວງໆສາລະວັນ ພ້ອມດ້ວຍອໍານາດການປົກຄອງແຂວງ ແລະ ເມືອງ ກໍໄດ້ລົງໄປຢ້ຽມຢາມຊຸກຍູ້ໃຫ້ກໍາລັງໃຈປະຊາຊົນ, ພ້ອມດຽວກັນນັ້ນ ກໍໄດ້ມອບເງິນ ແລະ ວັດຖຸສິ່ງຂອງຈໍານວນໜຶ່ງໃຫ້ຄອບຄົວຜູ້ທີ່ໄດ້ຮັບຜົນກະທົບ.

         ວັນທີ 22 ກັນຍາ 2021 ກົມອຸຕຸນິຍົມ ແລະ ອຸທົກກະສາດ ໄດ້ອອກແຈ້ງການເຕືອນໃຫ້ລະວັງຝົນຕົກໜັກ ຫາໜັກແຮງ ແລະ ມີລົມພັດແຮງ ຢູ່ບໍລິເວນບັນດາແຂວງພາກກາງ ແລະ ພາກໃຕ້ ໃນລະຫວ່າງ ວັນທີ 24-25 ກັນຍາ 2021 ເຊິ່ງຈະເຮັດໃຫ້ມີນໍ້າຖ້ວມກະທັນຫັນ, ນໍ້າຖ້ວມອັ່ງ, ນໍ້າໄຫຼຊຸ ແລະ ດິນເຈື່ອນ ຢູ່ບາງທ້ອງຖິ່ນ; ເພື່ອປ້ອງກັນບໍ່ໃຫ້ມີຜົນກະທົບຫຼາຍ ອໍານາດການປົກຄອງ ກໍຄືພາກສ່ວນກ່ຽວຂ້ອງ ແລະ ບັນດາສື່ມວນຊົນ ຕ້ອງເປັນເຈົ້າການໂຄສະນາ, ເຜີຍແຜ່ອະທິບາຍຄວາມຮ້າຍແຮງ ໃຫ້ປະຊາຊົນໄດ້ຮັບຮູ້ຢ່າງໄວວາ, ທົ່ວເຖິງ ແລະ ກະກຽມຄວາມພ້ອມດ້ານຕ່າງໆ ເພື່ອຊ່ວຍເຫຼືອຜູ້ໄດ້ຮັບຜົນກະທົບ, ເບື້ອງປະຊາຊົນ ພາຍຫຼັງຮັບຮູ້ຂ່າວກໍຕ້ອງມີສະຕິ, ບໍ່ຖືເບົາ, ຄວນກະກຽມເພື່ອຮັບມື ເປັນຕົ້ນແມ່ນ: ການຍົກຍ້າຍວັດຖຸສິ່ງຂອງ ແລະ ສັດລ້ຽງໄປໄວ້ບ່ອນສູງ ແລະ ເຫັນວ່າມີຄວາມປອດໄພ. ໄພທໍາມະຊາດ ແມ່ນໄພອັນຕະລາຍທີ່ເກີດຂຶ້ນຕາມທໍາມະຊາດ ເຊິ່ງພວກເຮົາບໍ່ສາມາດຫຼີກລ່ຽງໄດ້, ແຕ່ຖ້າພວກເຮົາ ຫາກມີສະຕິ ກຽມພ້ອມຮັບມື ກັບສີ່ງທີ່ອາດຈະເກີດຂຶ້ນ, ຖ້າຫາກເກີດຂຶ້ນຈິງ ຜົນກະທົບ ຫຼື ຄວາມເສຍຫາຍ ກໍ່ຈະໜ້ອຍກວ່າການຂາດສະຕິ.

 

ບົດໂດຍ: ພັດ ລໍວັນໄຊ- ພາບ: ນັກຂ່າວ ແຂວງສາລະວັນ.

ບົດຄວາມໜ້າສົນໃຈ

Leave a Reply

Your email address will not be published. Required fields are marked *