ຂ່າວເດັ່ນ-ປະເດັນດັງ

ປຶກສາຫາລື ການກະກຽມເປີດກອງປະຊຸມແນວຄິດ ທົ່ວປະເທດ ຄັ້ງທີ V

       ໂດຍ​ປະ​ຕິ​ບັດ​ຕາມ​ການ​ຊີ້​ນຳ ຂອງ​ກົມ​ການ​ເມືອງ​ສູນ​ກາງ​ພັກ ກ່ຽວ​ກັບ​ການ​ດຳ​ເນີນກອງ​ປະ​ຊຸມ​ ວຽກ​ງານ​ການ​ເມືອງ-ແນວ​ຄິດ ທົ່ວ​ປະ​ເທດ ຄັ້ງ​ທີ V ໂດຍມອບ​ໃຫ້ ຄະ​ນະ​ໂຄ​ສະ​ນາ​ອົບ​ຮົມ​ສູນ​ກາງ​ພັກ (ຄອ​ສ​ພ) ເປັນ​ເຈົ້າ​ພາບ ​ຈັດ​ກອງ​ປະ​ຊຸມສຳ​ຄັນ​ດັ່ງ​ກ່າວນີ້, ດັ່ງ​ນັ້ນ ໃນ​ຕອນ​ບ່າຍ ຂອງວັນ​ທີ 17 ພະ​ຈິກ 2021 ຄະ​ນະ​ໂຄ​ສະ​ນາ​ອົບ​ຮົມ​ສູນ​ກາງ​ພັກ ຈຶ່ງ​ໄດ້​ເຊີນ​ເອົາ​ພ​າກ​ສ່ວນ​ທີ່​ກ່ຽວ​ຂ້ອງ ແລະ ຄະ​ນະ​ນຳ​ໃນ ຄອ​ສ​ພ ເຂົ້າ​ຮ່ວມ​ປະ​ຊຸມ ຢູ່​ທີ່ ຫ້ອງ​ປະ​ຊຸມ​ໃຫຍ່ ຄອ​ສ​ພ ເພື່ອ​ປຶກ​ສາ​ຫາ​ລື​ ການ​ກະ​ກຽມ​ໃຫ້​ແກ່ກອງ​ປະ​ຊຸມ ວຽກ​ງານ​ການ​ເມືອງ-ແນວ​ຄິດ ທົ່ວ​ປະ​ເທດ ຄັ້ງ​ທີ V.

          ເປັນ​ກຽດ​ເຂົ້າ​ຮ່ວມ​ທັງ​ເປັນ​ປະ​ທານກອງ​ປະ​ຊຸມ ໂດຍ​ທ່ານ ບຸນ​ທອງ​ ຈິດ​ມະ​ນີ ຜູ້​ປະ​ຈຳ​ການ​ຄະ​ນະ​ເລ​ຂາ​ທິ​ການ​ສູນ​ກາງ​ພັກ, ຮອງ​ປະ​ທານ​ປະ​ເທດ; ທ່ານ ຄຳ​ພັນ ເຜີຍ​ຍະ​ວົງ ຄະ​ນະ​ເລ​ຂາ​ທິ​ການ​ສູນ​ກາງ​ພັກ, ຫົວ​ໜ້າ ຄອ​ສ​ພ, ປະ​ທານ​ສະ​ພາ​ທິດ​ສະ​ດີ​ສູນ​ກາງ​ພັກ; ມີ​ລັດ​ຖະ​ມົນ​ຕີ​ກະ​ຊວງ​ຖະ​ແຫຼງ​ຂ່າວ-ວັດ​ທະ​ນະ​ທຳ ແລະ ທ່ອງ​ທ່ຽວ, ກະ​ຊວງ​ສຶກ​ສາ​ທິ​ການ ແລະ ກີ​ລາ, ຫົວ​ໜ້າ​ສະ​ຖາ​ບັນ​ວິ​ທະ​ຍາ​ສາດ​ສັງ​ຄົມ​ແຫ່ງ​ຊາດ, ຫົວ​ໜ້າ​ສະ​ຖາ​ບັນ​ການ​ເມືອງ ແລະ ການ​ປົກ​ຄອງ​ແຫ່ງ​ຊາດ, ຮອງ​ປະ​ທານ​ສູນ​ກາງ​ແນວ​ລາວ​ສ້າງ​ຊາດ, ຮອງ​ຄະ​ນະ​ຈັດ​ຕັ້ງ​ສູນ​ກາງ​ພັກ ແລະ ຄ​ະ​ນະ​ພັກ, ຫົວ​ໜ້າ​ກົມ ໃນ ຄອ​ສ​ພ ເຂົ້າ​ຮ່ວມ.

          ກອງ​ປ​ະ​ຊຸມ ທ່ານ ຄຳ​ພັນ ເຜີຍ​ຍະ​ວົງ ໄດ້​ລາຍ​ງານ​ສະ​ພາບ​ການ​ກະ​ກຽມ​ດຳ​ເນີນກອງ​ປະ​ຊຸມ ຢ່າງ​ຮອບ​ດ້ານ ເພື່ອ​ໃຫ້​ຜູ້​ເຂົ້າ​ຮ່ວມ​ປະ​ກອບ​ຄຳ​ເຫັນ; ໃນ​ນີ້ ໄດ້​ຮັບ​ຮອງ​ເອົາ​ໂຄ​ງ​ຮ່າງ​ບົດ​ລາຍ​ງານ​ຕໍ່​ກອງ​ປະ​ຊຸມ, ຮ່າງ​ມະ​ຕິ​ຕົກ​ລົງ ວ່າ​ດ້ວຍ​ການ​ແຕ່ງ​ຕັ້ງ​ຄະ​ນະ​ຮັບ​ຜິດ​ຊອບກອງ​ປະ​ຊຸມ ແລະ ມະ​ຕິ​ຕົກ​ລົງ ວ່າ​ດ້ວຍ​ການ​ແບ່ງ​ຄວາມ​ຮັບ​ຜິດ​ຊອບ ໂດຍ​ແມ່ນ ທ່ານ ບ​ຸນ​ທອງ ຈິດ​ມະ​ນີ ເປັນ​ຫົວ​ໜ້າ, ທ່ານ ຄຳ​ພັນ ພົມ​ມະ​ທັດ ເປັນ​ຮອງ, ທ່ານ ຄຳ​ພັນ ເຜີຍ​ຍະ​ວົງ ເປັນ​ຮອງ ທັງ​ເປັນ​ຜູ້​ປະ​ຈຳ​ການ ແລະ ຍັງ​ມີ​ລັດ​ຖະ​ມົນ​ຕີ, ຫົວ​ໜ້າ​ສະ​ຖາ​ບັນ ອີກ​ຈຳ​ນວນ​ໜຶ່ງ; ນອກນີ້ ກອງ​ປະ​ຊຸມ ຍັງ​ໄດ້​ຮັບ​ຮອງ​ເອົາ​ການ​ແຕ່ງ​ຕັ້ງ​ໜ່ວຍ​ງານ​ຮັບ​ຜິດ​ຊອບ​ການ​ກະ​ກຽມ ຂອງ ຄອ​ສ​ພ ແລະ ໄດ້​ຮັບ​ຟັງ​ການ​ຊີ້​ນຳ ຂອງ​ປະ​ທານກອງ​ປະ​ຊຸມ ເຊິ່ງ​ທ່ານ ໄດ້​ເນັ້ນ​ໃຫ້​ຄະ​ນະ​ຮັບ​ຜິ​ດ​ຊອບ ຕ້ອງ​ໄດ້​ຍົກ​ສູງ​ຄວາມ​ຮັບ​ຜິ​ດ​ຊອບ ຂອງ​ຕົນ, ປະ​ຕິ​ບັດ​ໜ້າ​ທີ່​ຕາມ​ການມອບ​ໝາຍ​ໃຫ້​ສຳ​ເລັດ​ຕາມ​ແຜນ​ການ.

          ກອງ​ປະ​ຊຸມ ໄດ້​ເປັນ​ເອ​ກະ​ພາບ​ທີ່​ຈະ​ຈັດ​ກອງ​ປະ​ຊຸມ​ຢ່າງ​ເປັນ​ທາງ​ການ ໃນ​ລະ​ຫວ່າງ ວັນ​ທີ 15-30 ທັນ​ວາ 2021 ນີ້.

 

ຂ່າວ: ບ. ດວງ​ມະ​ໂນ.

 ພາບ: ຫົງ​ລື​ດີ

ບົດຄວາມໜ້າສົນໃຈ

Leave a Reply

Your email address will not be published. Required fields are marked *