ວຽກງານໂຄສະນາອົບຮົມ

ທິດຊີ້ນຳ ຂອງ ຄອສພ ກ່ຽວກັບການນຳພາແນວຄິດ ໃນໄລຍະປ້ອງກັນ ໂຄວິດ-19

        ນັບຕັ້ງແຕ່ແຕ່ທ້າຍປີ 2019 ເປັນຕົ້ນມາ ພະຍາດໂຄວິດ -19 ໄດ້ເກີດຂຶ້ນ ແລະ ແຜ່ລະບາດໄປທົ່ວໂລກຢ່າງໄວວາ ແລະ ສົ່ງຜົນກະທົບອັນໃຫຍ່ຫຼວງ ຕໍ່ກັບເສດຖະກິດ-ສັງຄົມ ແລະ ການດໍາລົງຊີວິດ ຂອງປະຊາຊົນໃນຫຼາຍປະເທດໃນທົ່ວໂລກ, ພ້ອມທັງສັງຫານຊີວິດຄົນເຮົາໄປແລ້ວ ຫຼາຍລ້ານຄົນ ແລະ ຍັງມີທ່າອ່ຽງເພີ່ມຂຶ້ນທຸກມື້. ຕໍ່ກັບບັນຫາດັ່ງກ່າວ ພັກ-ລັດຖານບານແຫ່ງ ສປປ ລາວ ກໍໄດ້ຖືເອົາການຕ້ານ, ສະກັດກັ້ນ, ຄວບຄຸມ ແລະ ປ້ອງກັນພະຍາດໂຄວິດ-19 ເປັນໜ້າທີ່ສຳຄັນ ແລະ ຮີບດ່ວນ ຄືໃນພາວະສົງຄາມ ເຊິ່ງໄດ້ວາງມາດຕະການໃນການຕ້ານ, ສະກັດກັ້ນ, ຄວບຄຸມ ແລະ ປ້ອງກັນການລະບາດ ຂອງພະຍາດໂຄວິດ-19 ໃນແຕ່ລະໄລຍະຢ່າງຖືກຕ້ອງກັບສະພາບຄວາມເປັນຈິງ ຂອງປະເທດເຮົາເປັນຕົ້ນແມ່ນ: ໄດ້ອອກຄຳສັ່ງເລກທີ 15/ນຍ, ລົງວັນທີ 22 ເມສາ 2021 ວ່າດ້ວຍການເພີ່ມທະວີມາດຕະການສະກັດກັ້ນ, ຄວບຄຸມ ແລະ ກຽມຄວາມພ້ອມຮອບດ້ານ ເພື່ອຕ້ານພະຍາດໂຄວິດ -19; ຄຳສັ່ງແນະນຳ ຂອງຄະນະເລຂາທິການສູນກາງພັກ ສະບັບເລກທີ87/ຄລສພ, ລົງວັນທີ 25 ເມສາ 2021 ວ່າດ້ວຍການເພີ່ມທະວີຄວາມຮັບຜິດຊອບ ຂອງຄະນະພັກແຕ່ລະຂັ້ນໃນການສືບຕໍ່ສະກັດກັ້ນ, ປ້ອງກັນ, ຄວບຄຸມ ແລະ ແກ້ໄຂພະຍາດໂຄວິດ-19.

     ເພື່ອສືບຕໍ່ຈັດຕັ້ງຜັນຂະຫຍາຍ ຄໍາສັ່ງເລກທີ 15/ຍນ, ຄໍາສັ່ງແນະນໍາເລກທີ 87/ຄລສພ ; ເພື່ອສ້າງຄວາມເປັນເອກະພາບ ແລະ ເປັນບ່ອນອີງໃຫ້ແກ່ຄະນະພັກ, ຄະນະນໍາທຸກຂັ້ນ ນໍາໄປຈັດຕັ້ງປະຕິບັດໄປໃນທາງດຽວກັນ; ດັ່ງນັ້ນ, ຄະນະໂຄສະນາອົບຮົມສູນກາງພັກ ຈຶ່ງໄດ້ອອກເອກະສານແນະນຳໃຫ້ ຄະນະພັກ,ຄະນະນໍາ ແຕ່ລະຂັ້ນ ຕ້ອງໄດ້ເພີ່ມທະວີຊີ້ນໍາ-ນໍາພາວຽກງານການເມືອງ-ແນວຄິດ ມີຄືດັ່ງນີ້:

1). ໂຄສະນາສຶກສາອົບຮົມ ການເມືອງ-ແນວຄິດ ກ່ຽວກັບການຍົກສູງສະຕິຕື່ນຕົວ, ເປັນເຈົ້າການປະກອບສ່ວນທາງດ້ານສະຕິປັນຍາ ແລະ ກຳລັງແຮງດ້ານວັດຖຸ ຂອງປວງຊົນ, ທຸກຊັ້ນຄົນໃນສັງຄົມ ໃນການປະຕິບັດຄໍາສັ່ງເລກທີ15/ນຍ ແລະ ຄຳສັ່ງແນະນຳເລກທີ 87/ຄລສພ, ກໍຄືບັນດາແຈ້ງການຂອງຫ້ອງວ່າການສຳນັກງານນາຍົກ, ຂອງສະເພາະກິດລະດັບຊາດ, ຄະນະສະເພາະກິດຂອງພາກສ່ວນຕ່າງໆ ທັງສູນກາງ ແລະ ທ້ອງຖິ່ນຢ່າງເຂັ້ມງວດ ແລະ ມີປະສິດທິຜົນສູງ.

 2). ປຸກລະດົມໃຫ້ພະນັກງານ, ທະຫານ, ຕຳຫຼວດ, ນັກຮຽນ, ນັກສຶກສາ, ກຳມະກອນ, ປະຊາຊົນບັນດາເຜົ່າ ຍົກສູງສະຕິຕື່ນຕົວ ແລະ ເປັນເຈົ້າການໃນການຕໍ່ສູ້ຕ້ານກັບການໂຄສະນາບິດເບືອນ ໃສ່ຮ້າຍປາຍສີ, ສ້າງຂ່າວປອມ, ຂ່າວບໍ່ມີມູນຄວາມຈິງທີ່ອອກຜ່ານສື່ອອນລາຍ, ເຟດບຸກ, ສື່ອິນເຕີເນັດ ເພື່ອສ້າງຄວາມປັ່ນປ່ວນ, ສ້າງຄວາມບໍ່ສະຫງົບໃຫ້ສັງຄົມ.

 3). ໂຄສະນາສຶກສາອົບຮົມ ໃຫ້ມີນ້ໍາໃຈຮັກຊາດ,ຈິດໃຈເອກະລາດ, ເປັນເຈົ້າຕົນເອງ, ກຸ້ມຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ; ສົ່ງເສີມມູນເຊື້ອດຸໝັ່ນ, ອົດທົນ ແລະ ປະດິດສ້າງ ໃນການອອກແຮງງານຂອງປະຊາຊົນ ເປັນຕົ້ນ ແມ່ນການປູກຝັງລ້ຽງສັດ, ນ້ຳໃຈປະຢັດມັດທະຍັດ ເພື່ອປັບປຸງການດຳລົງຊີວິດຂອງພະນັກງານ ແລະ ປະຊາຊົນໃຫ້ດີຂຶ້ນ.

 4). ໂຄສະນາສຶກສາອົບຮົມ ໃຫ້ມີມູນເຊື້ອຄວາມສາມັກຄີເປັນເອກະພາບໃນທົ່ວພັກ, ທົ່ວລັດ ແລະ ປວງຊົນທັງຊາດຮ່ວມແຮງ, ຮ່ວມໃຈໃນການຕ້ານ, ສະກັດກັ້ນ, ປ້ອງກັນ, ຄວບຄຸມ ແລະ ແກ້ໄຂພະຍາດໂຄວິດ-19.

   5). ເພີ່ມທະວີຄວາມສາມັກຄີ, ການພົວພັນຮ່ວມມືຮອບດ້ານກັບ ສສ ຫວຽດນາມ ແລະ ສປ ຈີນ ບົນຈິດໃຈຄູ່ຮ່ວມມືຍຸດທະສາດຮອບດ້ານໝັ້ນຄົງຍາວນານ, ການພົວພັນກັບປະເທດເພື່ອນບ້ານໃກ້ຄຽງ, ບັນດາປະເທດໃນອາຊຽນ ແລະ ປະເທດເພື່ອນມິດ, ອົງການຈັດຕັ້ງສາກົນ, ອົງການຈັດຕັ້ງສັງຄົມ ເພື່ອພ້ອມກັນສະກັດກັ້ນການແພ່ລະບາດ ພະຍາດໂຄວິດ-19.

   6). ປຸກລະດົມພະນັກງານ, ລັດຖະກອນ, ທະຫານ, ຕຳຫຼວດ, ກຳມະກອນ, ນັກຮຽນນັກສຶກສາ ແລະ ປະຊາຊົນ ເຂົ້າຮ່ວມຂະບວນການສັກຢາວັກຊິນ ເພື່ອປ້ອງກັນການເຈັບເປັນ ແລະ ເສຍຊີວິດຈາກການຕິດເຊື້ອພະຍາດໂຄວິດ-19, ທັງເປັນການປະກອບສ່ວນຊ່ວຍໃນການຕ້ານ, ສະກັດກັ້ນ, ປ້ອງກັນ, ຄວບຄຸມການແຜ່ລະບາດຂອງເຊື້ອພະຍາດໂຄວິດ-19.

ຂ່າວ ໂດຍ: ພັດ ລໍວັນໄຊ

ທ່ານສາມາດ ດາວໂຫຼດ ໄດ້ທີ່ ຂໍ້ມູນຈໍາເປັນ

ບົດຄວາມໜ້າສົນໃຈ

Leave a Reply

Your email address will not be published. Required fields are marked *