ແນວຄິດ ໄກສອນ ພົມວິຫານ

ຄຸນທາດການເມືອງອັນໂດດເດັ່ນຂອງ ປະທານ ໄກສອນ ພົມວິຫານ

       ຄຸນທາດການເມືອງແມ່ນມາດຖານໜຶ່ງທີ່ສໍາຄັນທັງແມ່ນປັດໃຈພື້ນຖານໃນການກໍານົດທາດແທ້ ຂອງພະນັກງານ ແລະ ສະມາຊິກພັກ; ການຝຶກຝົນຫຼໍ່ຫຼອມຄຸນທາດການເມືອງ ນອກຈາກການຄົ້ນຄວ້າ ແລະ ກໍາແໜ້ນບັນດາມະຕິ, ຄໍາສັ່ງ ຂອງພັກ-ລັດແລ້ວ ການຝຶກຝົນຫຼໍ່ຫຼອມຕົນເອງໃນວຽກງານຕົວຈິງ ແລະ ການຮຽນຮູ້ຄວາມເປັນແບບຢ່າງອັນດີງາມ ຂອງບັນດາທ່ານຜູ້ນໍາ ເປັນຕົ້ນແມ່ນ ປະທານ ໄກສອນ ພົມວິຫານ ກໍແມ່ນຄວາມຈໍາເປັນ ຂອງພະນັກງານ, ສະມາຊິກພັກ ແລະ ປະຊາຊົນເຮົາ.

          ປະທານ ໄກສອນ ພົມວິຫານ ແມ່ນວິລະບູລຸດ ຂອງຊາດລາວ, ເປັນລູກຮັກຜູ້ປະເສີດ ຂອງປະຊາຊົນລາວ ແລະ ເປັນແວ່ນແຍງອັນໃສແຈ້ງໃຫ້ແກ່ປວງຊົນລາວທັງຊາດ; ຄຸນທາດການເມືອງອັນໂດດເດັ່ນ ຂອງປະທານ ໄກສອນ ພົມວິຫານ ແມ່ນເປັນຄົນຮັກປະເທດຊາດ ແລະ ຮັກປະຊາຊົນຢ່າງດູດດື່ມ, ມີຄວາມຊື່ສັດ, ຈົງຮັກພັກດີ ຕໍ່ປະເທດຊາດ ແລະ ຕໍ່ປະຊາຊົນ, ຕະຫຼອດຊີວິດ ຂອງເພີ່ນແມ່ນຍອມເສຍສະຫຼະທຸກສິ່ງທຸກຢ່າງ ເພື່ອອຸທິດໃຫ້ແກ່ການປະຕິວັດ, ເພີ່ນດໍາລົງຊີວິດແບບລຽບງ່າຍ, ປະຢັດ ແລະ ຊື່ສັດບໍລິສຸດ, ໃນຖານະເປັນຜູ້ນໍາສູງສຸດ ຂອງພັກ-ລັດ ເພີ່ນມີຄວາມເຂັ້ມງວດ ຕໍ່ຕົນເອງບໍ່ສວຍໃຊ້ຖານະຕໍາແໜ່ງ ເພື່ອຫາຜົນປະໂຫຍດທີ່ບໍ່ຊອບທໍາມາໃຫ້ແກ່ຕົນເອງ ແລະ ຄອບຄົວ, ເພີ່ນເວົ້າວ່າ: ຢາກປົດປ່ອຍປະເທດຊາດໄດ້ ຕ້ອງເຮັດການປະຕິວັດ, ມີນໍ້າໃຈຮັກຊາດ, ມີຄວາມເສຍສະຫຼະອັນສູງສົ່ງ”  ນອກຈາກນັ້ນ ເພີ່ນຍັງເວົ້າວ່າ: “ປະເທດຊາດຍັງທຸກຍາກ, ດັ່ງນັ້ນ ຕ້ອງປະຢັດ, ປະຢັດແຮງງານ, ວັດຖຸອຸປະກອນ, ທຶນຮອນ, ຕ້ອງປະຢັດໃນການຜະລິດ ແລະ ໃນການໃຊ້ສອຍ” “ການປະຢັດແມ່ນຮັກຊາດ”; ເພີ່ນເປັນຄົນຍຶດໝັ້ນໃນແນວທາງ ແລະ ອຸດົມການ ຂອງພັກ ໃນໄລຍະແຫ່ງການນໍາພາຂະບວນການຕໍ່ສູ້ປົດປ່ອຍຊາດທີ່ເຕັມໄປດ້ວຍຄວາມທຸກຍາກລໍາບາກຮ້ອຍແປດພັນປະການ, ບາງໄລຍະກໍເອົາຊີວິດເກືອບບໍ່ລອດ, ແຕ່ເພີ່ນກໍບໍ່ເຄີຍຫວັ່ນໄຫວຄອນແຄນແຕ່ຢ່າງໃດ, ຍາມໃດກໍຍຶດໝັ້ນໃນຄວາມເປັນເຈົ້າການ, ເສີມຂະຫຍາຍມານະຈິດປະຕິວັດບຸກ, ກໍາແໜ້ນຍຸດທະສາດ ແລະ ວາງຍຸດໂທບາຍໃຫ້ສອດຄ່ອງນໍາພາການຕໍ່ສູ້ຍາດເອົາໄຊຊະນະເທື່ອລະກ້າວຈົນສາມາດຍາດໄດ້ໄຊຊະນະຢ່າງສົມບູນ; ເພີ່ນເປັນຄົນມັກຄົ້ນຄວ້າຮໍ່າຮຽນສະແຫວງຫາຄວາມຮູ້ ເພື່ອຍົກລະດັບການຊີ້ນໍາ ນໍາພາ; ປະທານ ໄກສອນ ພົມວິຫານ ເປັນປັນຍາຊົນທີ່ສະຫຼຽວສະຫຼາດມັກການຄົ້ນຄວ້າຮໍ່າຮຽນ, ມີຫົວຄິດປະດິດສ້າງໃນການປັບປຸງແນວທາງນະໂຍບາຍ ຂອງພັກ, ເພີ່ນໄດ້ຕັ້ງໜ້າຄົ້ນຄວ້າບັນດານິພົນ ຂອງທ່ານ ມາກ, ເລນິນ, ໂຮ່ຈີມິນ ແລະ ປື້ມ ຂອງບັນດາຜູ້ນໍາປະຕິວັດໂລກ, ນອກຈາກຄົ້ນຄວ້າຢູ່ໃນປຶ້ມຕໍາລາແລ້ວ ເພີ່ນຍັງເອົາໃຈໃສ່ຮໍ່າຮຽນນໍາໝູ່ຄະນະ, ຊອກຮູ້ຮໍ່າຮຽນນໍາບັນດາຊ່ຽວຊານຕ່າງປະເທດເປັນແຕ່ລະບັນຫາສະເພາະ, ຮຽນນໍາມະຫາຊົນ ແລະ ຮຽນນໍາປະຊາຊົນ, ຍ້ອນແນວນັ້ນ ເພີ່ນຈິ່ງມີຄວາມຮູ້ ຕໍ່ບັນຫາຕ່າງໆຢ່າງເລິກເຊິ່ງ ແລະ ເປັນພື້ນຖານໃຫ້ແກ່ການກໍານົດແນວທາງ ຂອງການປະຕິວັດໃນແຕ່ລະໄລຍະຖືກຕ້ອງ, ເພີ່ນເວົ້າວ່າ: “ອ່ານຫຼາຍເທົ່າໃດກໍຍິ່ງມີຄຸນປະໂຫຍດຫຼາຍຂຶ້ຶ້ນເທົ່ານັ້ນ”; ປະທານ ໄກສອນ ພົມວິຫານ ຍາມໃດກໍຖືຜົນປະໂຫຍດ ຂອງຊາດ ແລະ ຂອງປະຊາຊົນມາກ່ອນສະເໝີ, ບໍວ່າໃນເວລາຕໍ່ສູ້ກູ້ຊາດ ຫຼືໄລຍະການປົກປັກຮັກສາ ແລະ ສ້າງສາພັດທະນາປະເທດຊາດ ເຖິງແມ່ນວ່າວຽກງານຈະໜັກ, ອິດເມື່ືອຍປານໃດກໍຕາມ ປະທານກໍບໍ່ເຄີຍຈົມວ່າ, ກົງກັນຂ້າມເພີ່ນກັບສຸມຈິດໃຈ, ສຸມກໍາລັງວັງຊາ ແລະ ສະຕິປັນຍາເຂົ້າໃນການປະຕິບັດໜ້າທີ່ວຽກງານຢ່າງບໍ່ທໍ້ຖອຍ ເພີ່ນເວົ້າວ່າ: “ຄວາມສຸກ ແລະ ຜົນປະໂຫຍດ ຂອງເພີ່ນແມ່ນຕິດພັນກັບຄວາມສຸກ ແລະ ຜົນປະໂຫຍດ ຂອງປະຊາຊົນ ກໍຄື ຂອງລວມ ແລະ ປະເທດຊາດ”.

          ໃນໄລຍະປັດຈຸບັນ ການຝຶກຝົນຫຼໍ່ຫຼອມຄຸນທາດການເມືອງ ແມ່ນມີຄວາມສໍາຄັນເປັນຢ່າງຍິ່ງ, ພະ ນັກງານ, ສະມາຊິກພັກ ຖ້າຫາກຂາດຄຸນທາດການເມືອງ ຫຼືຄຸນທາດການເມືອງບໍ່ໜັກແໜ້ນແນ່ນອນວ່າ ຈະບໍສາມາດນໍາພາປະເທດຊາດໄປຕາມຈຸດໝາຍທີ່ກໍານົດໄວ້ໄດ້, ໃນຍຸກສະໄໝແຫ່ງການເຊື່ອມໂຍງສາກົນ ເຊິ່ງມີທັງຂໍ້ສະດວກ, ຂໍຫຍຸ້ງຍາກ ແລະ ສິ່ງທ້າທາຍ, ມີທັງການຮ່ວມມືກັນ ແລະ ການຍາດແຍ່ງແຂ່ງຂັນກັນດ້ວຍຫຼາຍຮູບ, ຫຼາຍສີທີ່ເລິກແລບແນບນຽນກວ່າເກົ່າ, ຖ້າພວກເຮົາບໍ່ມີຄຸນທາດການເມືອງໜັກແໜ້ນກໍຈະຖືກຫັນ ປ່ຽນໂດຍບໍ່ຮູ້ສຶກຕົວ. ດ້ວຍເຫດນັ້ນ ພວກເຮົາຈົ່ງພ້ອມກັນຮໍ່າຮຽນເອົາແບບຢ່າງອັນໃສແຈ້ງ ຂອງປະທານ ໄກສອນ ພົມວິຫານ ເພື່ອສ້າງຕົວເອງໃຫ້ເປັນພະນັກງານ, ສະມາຊິກພັກ, ເປັນລັດຖະກອນ ແລະ ປະຊາຊົນຜູ້ທີ່ດີ, ຊື່ສັດບໍລິສຸດ ແລະ ໄດ້ຮັບຄວາມໄວ້ເນື້ອເຊື່ອໃຈຈາກປະຊາຊົນ.

 

 ວ.ພົມພັກດີ

Leave a Reply

Your email address will not be published. Required fields are marked *