ຂ່າວເດັ່ນ-ປະເດັນດັງ

ຄອສພ ນຳເອົາປຶ້ມເອກະສານກອງປະຊຸມໃຫຍ່ ຄັ້ງທີ XI ຂອງພັກ ໄປມອບໃຫ້ ສສກ

        ຄະນະໂຄສະນາອົບຮົມສູນກາງພັກ ໄດ້ຮັບການມອບໝາຍຈາກລັດຖະບານ ໃຫ້ຈັດພິມປຶ້ມ ເອກະສານກອງປະຊຸມໃຫຍ່ ຄັ້ງທີ XI ຂອງພັກ ແລະ ຈັດຕັ້ງການແຈກຢາຍ ໃຫ້ບັນດາກະຊວງ, ອົງການ ແລະ ທ້ອງຖິ່ນ ເພື່ອຄົ້ນຄວ້າເຊື່ອມຊຶມ ແລະ ຜັນຂະຫຍາຍເຂົ້າໃນວຽກງານຕົວຈິງຂອງຕົນ ໃຫ້ເປັນຮູບປະທຳຕົວຈິງ ແລະ ໄດ້ມອບໃຫ້ ວາລະສານອະລຸນໃໝ່ ເປັນຜູ້ຮັບຜິດຊອບດ້ານການຈັດພິມ ໂດຍແມ່ນ ລັດວິສາຫະກິດ ໂຮງພິມແຫ່ງລັດ ເປັນຜູ້ຈັດພິມ; ພາຍຫຼັງພິມສຳເລັດ ຄອສພ ກໍໄດ້ສ້າງແຜນຈຳໜ່າຍ.

 

          ດ່ັງນັ້ນ ໃນວັນທີ 2 ສິງຫາ 2021 ທ່ານ ລາວປາວຊົ່ງ ນະວົງໄຊ ກຳມະການສູນກາງພັກ, ຮອງຫົວໜ້າຄະນະໂຄສະນາອົບຮົມສູນກາງພັກ ພ້ອມດ້ວຍຄະນະຈັດພິມ ໄດ້ນຳເອົາປຶ້ມ ເອກະສານກອງປະຊຸມໃຫຍ່ ຄັ້ງທີ XI ຂອງພັກ ຈໍານວນ 1.000 ຫົວ ໄປມອບໃຫ້ ກະຊວງສຶກສາທິການ ແລະ ກີລາ (ສສກ) ເພື່ອແຈກຢາຍໃຫ້ພະນັກງານຫຼັກແຫ່ຼງ ໄປຄົ້ນຄວ້າເຊື່ອມຊຶມ ແລະ ເປັນບ່ອນອີງ ໃນການຈັດຕັ້ງປະຕິບັດເຂົ້າໃນວຽກງານຕົວຈິງ ໃຫ້ບັນລຸຜົນສຳເລັດ; ຕາງໜ້າ ສສກ ແມ່ນ ທ່ານ ພຸດ ສີມມາລາວົງ ກຳມະການສູນກາງພັກ, ລັດຖະມົນຕີ ກະຊວງສຶກສາທິການ ແລະ ກີລາ ເປັນຜູ້ຮັບ.

          ໃນໂອກາດດ່ັງກ່າວ ທ່ານ ພຸດ ສີມມາລາວົງ ກໍໄດ້ສະແດງຄວາມຂອບໃຈເປັນຢ່າງສູງ ມາຍັງ ຄະນະໂຄສະນາອົບຮົມສູນກາງພັກ ແລະ ຄະນະຈັດພິມ ທີ່ໄດ້ນຳເອົາເອກະສານທີ່ສຳຄັນ ແລະ ມີຄຸນຄ່າສູງ ມາມອບໃຫ້ ສສກ ເພື່ອເປັນບ່ອນອີງ ໃຫ້ແກ່ການນຳພາ-ຊີ້ນຳ ແລະ ຈັດຕັ້ງຜັນຂະຫຍາຍ ແນວທາງນະໂຍບາຍ ຂອງພັກ ຢູ່ໃນຂົງເຂດວຽກງານການສຶກສາ ແລະ ກີລາ ໃຫ້ບັນລຸຜົນສຳເລັດຕາມຄາດໝາຍທີ່ວາງໄວ້.

 

( ພາບ-ຂ່າວ ຫົງລືດີ ).

ບົດຄວາມໜ້າສົນໃຈ

Leave a Reply

Your email address will not be published. Required fields are marked *