ຂ່າວເດັ່ນ-ປະເດັນດັງ

ຄອສພ ຈັດຕັ້ງປາຖະກະຖາວັນລັດຖະທໍາມະນູນແຫ່ງຊາດ ຄົບຮອບ 30 ປີ

         ລັດຖະທໍາມະນູນ ໝາຍເຖິງນິຕິກໍາອັນສໍາຄັນ ຂອງຊາດ, ແມ່ນກົດໝາຍແມ່ໃນການຄຸ້ມຄອງລັດ, ຄຸ້ມຄອງສັງຄົມ ເຊິ່ງພົນລະເມືອງລາວທຸກຄົນ ຕ້ອງເຄື່ອນໄຫວ ແລະ ດໍາລົງຊີວິດ ຢູ່ໃຕ້ລັດຖະທໍາມະນູນ ແລະ ກົດໝາຍ; ປີ 2021 ນີ້ ເປັນປີ ຄົບຮອບ 30 ປີ ວັນປະກາດໃຊ້ລັດຖະທໍາມະນູນແຫ່ງຊາດ ເຊິ່ງກົມການເມືອງສູນກາງພັກ ໄດ້ແຕ່ງຕັ້ງຄະນະຮັບຜິດຊອບການສະເຫຼີມສະຫຼອງ ແລະ ຄະນະເລຂາທິການສູນກາງພັກ ກໍໄດ້ອອກຄໍາສັ່ງແນະນໍາ ກ່ຽວກັບການຈັດຕັ້ງສະເຫຼີມສະຫຼອງວັນສໍາຄັນດັ່ງກ່າວ.

          ດັ່ງນັ້ນ ໃນວັນທີ 4 ສິງຫາ 2021​ ຄະນະໂຄສະນາອົບຮົມສູນກາງພັກ ໄດ້ຈັດຕັ້ງພິທີປາຖະກະຖາວັນລັດຖະທໍາມະນູນແຫ່ງຊາດ ຄົບຮອບ 30 ປີ (15 ສິງຫາ 1991- 15 ສິງຫາ 2021) ຢູ່ທີ່ສະໂມສອນໃຫຍ່ ຄອສພ (ຫຼັກ 6) ໂດຍມີຄະນະນໍາບັນດາກະຊວງ, ອົງການຂັ້ນສູນກາງ, ນະຄອນຫຼວງ ແລະ ພະນັກງານຫຼັກແຫຼ່ງພາຍໃນ ຄອສພ ເຂົ້າຮ່ວມ, ໃຫ້ກຽດປາຖະກະຖາວັນສໍາຄັນດັ່ງກ່າວ ໂດຍ ທ່ານ ສຈ.ປອ ຈະເລີນ ເຢຍປາວເຮີ ກໍາມະການສູນກາງພັກ, ຮອງປະທານຄະນະປະຈໍາ, ຮອງປະທານສະພາແຫ່ງຊາດ, ປະທານກໍາມາທິການກົດໝາຍ, ຮອງຫົວໜ້າຄະນະຮັບຜິດຊອບການສະເຫຼີມສະຫຼອງ ວັນລັດຖະທໍາມະນູນແຫ່ງຊາດ ຄົບຮອບ 30 ປີ.

          ໃນໂອກາດດັ່ງກ່າວ ທ່ານ ສຈ.ປອ ຈະເລີນ ເຢຍປາວເຮີ ໄດ້ຍົກໃຫ້ເຫັນຄວາມໝາຍສໍາຄັນຂອງລັດຖະທໍາມະນູນ ແລະ ຜົນສໍາເລັດອັນພົ້ນເດັ່ນໃນການເສີມຂະຫຍາຍ ລະບອບປະຊາທິປະໄຕປະຊາຊົນ ໂດຍພາຍໃຕ້ລັດຖະທໍາມະນູນ ແລະ ກົດໝາຍ ແລະ ສະພາບການຈັດຕັ້ງປະຕິບັດລັດຖະທໍາມະນູນຂອງພົນລະເມືອງລາວ ຕະຫຼອດ 30 ປີຜ່ານມາ; ​ພ້ອມດຽວກັນນີ້ ທ່ານຍັງໄດ້ຮຽກຮ້ອງໃຫ້ຄະນະພັກ,​ ຄະນະນໍາແຕ່ລະກະຊວງ, ອົງການ ແລະ ທ້ອງຖິ່ນ ຈົ່ງນໍາເອົາເນື້ອໃນຈິດໃຈ ຄໍາສັ່ງແນະນໍາ ຂອງຄະນະເລຂາທິການສູນກາງພັກ ກ່ຽວກັບການຈັດຕັ້ງການສະເຫຼີມສະຫຼອງ ວັນລັດຖະທໍາມະນູນ ຄົບຮອບ 30​ ປີ ໄປຈັດຕັ້ງປະຕິບັດໃຫ້ເລິກເຊິ່ງ, ກວ້າງຂວາງ ແລະ ເປັນຂະບວນການຢ່າງຟົດຟື້ນ ໂດຍຕິດພັນກັບການປ້ອງກັນ ການລະບາດ ຂອງພະຍາດໂຄວິດ-19 ຢ່າງເຂັ້ມງວດ.

ຂ່າວໂດຍ: ທອນ ພົມທິກອນ / ພາບໂດຍ: ຫົງລຶດີ 

ບົດຄວາມໜ້າສົນໃຈ

Leave a Reply

Your email address will not be published. Required fields are marked *