ວຽກງານໂຄສະນາອົບຮົມ

ກຽມຄວາມພ້ອມໃຫ້ແກ່ກອງປະຊຸມໃຫຍ່ຄັ້ງທີ V ຂອງອົງຄະນະພັກ ຄອສພ

         ຄະນະໂຄສະນາອົບຮົມສູນກາງພັກ ເປັນພາກສ່ວນໜຶ່ງໃນ 19 ພາກສ່ວນ ທີ່ກົມການເມືອງສູນກາງພັກ ຕົກລົງໃຫ້ດໍາເນີນກອງປະຊຸມໃຫຍ່ອົງຄະນະພັກ ຂອງຕົນ ພາຍຫຼັງສໍາເລັດ ກອງປະຊຸມໃຫຍ່ຄັ້ງທີ XI ຂອງພັກ.

      ໂດຍປະຕິບັດຕາມແຈ້ງການ ຂອງຄະນະເລຂາທິການສູນກາງພັກ ສະບັບເລກທີ33/ຄລສພ, ລົງວັນທີ 15/2/2021 ໃຫ້ກະກະຊວງ, ອົງການ ທີ່ຍັງບໍ່ທັນໄດ້ດໍາເນີນກອງປະຊຸມໃຫຍ່ຂັ້ນຂອງຕົນ ໃຫ້ຮີບຮ້ອນສືບຕໍ່ກະກຽມດໍາເນີນກອງປະຊຸມ. ສໍາລັບ ຄອສພ ກໍໄດ້ກະກຽມ ແລະ ອອກຂໍ້ຕົກລົງແຕ່ງຕັ້ງຄະນະຮັບຜິດຊອບ ກະກຽມກອງປະຊຸມໃຫຍ່ຄັ້ງທີ V ຂອງອົງຄະນະພັກ ຄອສພ ເຊິ່ງປະກອບມີທັງໝົດ 4 ອະນຸກໍາມະການ ດັ່ງນີ້: ອະນຸກໍາມະການເນື້ອໃນ, ອະນຸກໍາມະການບຸກຄະລາກອນ, ອະນຸກໍາມະການເສດຖະກິດ-ບໍລິຫານ-ພິທີການ ແລະ ປ້ອງກັນ, ອະນຸກໍາມະການຂະບວນການ ແລະ ໂຄສະນາ; ມາຮອດປັດຈຸບັນ ການກະກຽມຄວາມພ້ອມ ແມ່ນສໍາເລັດໂດຍພື້ນຖານເປັນຕົ້ນ:  ບັນດາໜ່ວຍພັກທີ່ຂຶ້ນກັບ ຄອສພ ທັງໝົດ 9 ໜ່ວຍ ແມ່ນໄດ້ສໍາເລັດການດໍາເນີນກອງປະຊຸມໃຫຍ່ ຂອງໜ່ວຍພັກຕົນ, ແຕ່ລະໜ່ວຍພັກໂດຍລວມແລ້ວ ແມ່ນບັນລຸໄດ້ຕາມຈຸດປະສົງ ແລະ ຄາດໝາຍທີ່ວາງໄວ້;

ສໍາລັບເນື້ອໃນກອງປະຊຸມໃຫຍ່ເຊິ່ງປະກອບດ້ວຍ 3 ເອກະສານສໍາຄັນຄື: ລາຍງານການເມືອງ, ແຜນພັດທະນາວຽກງານໂຄສະນາອົບຮົມ ແລະ ບົດສໍາຫຼວດການນໍາພາ ຂອງອົງຄະນະພັກຊຸດເກົ່າ; ທັງ 3 ເອກະສານ ແມ່ນສໍາເລັດໂດຍພື້ນຖານແລ້ວ ແລະ ພວມສືບຕໍ່ທາບທາມບຸກຄະລາກອນເຂົ້າໃນໂຄງປະກອບ ຂອງອົງຄະນະພັກຊຸດໃໝ່ ແລະ ຄາດວ່າຈະໄດ້ດໍາເນີນກອງປະຊຸມໃຫຍ່ຄັ້ງ V ຂອງອົງຄະນະພັກ ຄອສພໃນເດືອນ ສິງຫາ 2021 ນີ້.

          ກອງປະຊຸມໃຫຍ່ຄັ້ງທີ V ຂອງອົງຄະນະພັກ ຄອສພ ທີ່ຈະໄດ້ໄຂຂຶ້ນໃນມໍ່ໆນີ້ ແມ່ນສຸດທີ່ມີຄວາມ ໝາຍ, ຄວາມສໍາຄັນ ແລະ ເປັນບາດລ້ຽວອັນໃໝ່ ທີ່ຈະເຮັດໃຫ້ວຽກງານໂຄສະນາອົບຮົມ ມີການປັບປຸງຢ່າງຮອບດ້ານທີ່ມີປະສິດທິຜົນສູງກວ່າເກົ່າ; ຢາກເຮັດໃຫ້ວຽກງານໂຄສະນາອົບຮົມ ຂອງພັກສາມາດບັນລຸໄດ້ຕາມຄາດໝາຍ ກໍຄື ‘‘ ສ້າງການຫັນປ່ຽນໃໝ່ຢ່າງແຂງແຮງ, ເລິກເຊິ່ງ ແລະ ຮອບດ້ານ’’ ນັ້ນ, ສະມາຊິກພັກທຸກສະຫາຍ ທີ່ສັງກັດຢູ່ໃນ ຄອສພ ຕ້ອງໄດ້ຍົກສູງຄວາມຮັບຜິດຊອບໃນການຄັດເລືອກເອົາບຸກຄະລາກອນເຂົ້າໃນໂຄງປະກອບ ຂອງອົງຄະນະພັກ ຄອສພ ຊຸດໃໝ່ ໃຫ້ໄດ້ຕາມມາດຖານ ແລະ ເງື່ອນໄຂທີ່ວາງໄວ້, ໃນນີ້ ຄວນເນັ້ນມາດຖານທາງດ້ານຄວາມຮູ້ – ຄວາມສາມາດ ແລະ ທັດສະນະຫຼັກໝັ້ນການເມືອງ; ຖ້າເລືອກເອົາຜູ້ທີ່ຂາດຄວາມສາມາດໃນການນໍາພາ, ບໍ່ມີວິໄສທັດໃນການພັດທະນາອົງກອນ ແລະ ບໍ່ມີຄວາມສາມາດໃນການເຄື່ອນໄຫວວຽກງານໂຄສະນາອົບຮົມ, ເວົ້າບໍ່ເປັນ, ຂຽນບໍ່ເປັນ, ບໍ່ກ້າເຮັດ-ກ້າທໍາ ແລະ ບໍ່ກ້າຮັບຜິດຊອບ ແນ່ນອນກອງປະຊຸມໃຫຍ່ຄັ້ງນີ້ ຈະບໍ່ສາມາດສ້າງການຫັນປ່ຽນໄດ້.

ຂ່າວໂດຍ: ທອນ ພົມທິກອນ

ບົດຄວາມໜ້າສົນໃຈ

Leave a Reply

Your email address will not be published. Required fields are marked *