ຂ່າວສານ

ການລະບາດ ຂອງໂຄວິດ-19 ບໍ່ສາມາດຢຸດການຮຽນ-ການສອນໄດ້

             ປັດຈຸບັນການລະບາດຂອງພະຍາດໂຄວິດ-19 ແມ່ນມີທ່າອ່ຽງເພີ່ມທະວີຄວາມຮຸນແຮງຂຶ້ນໃນຂອບເຂດທົ່ວໂລກ, ສໍາລັບປະເທດເຮົາການລະບາດໃນຊຸມຊົນກໍແຜ່ອອກເປັນບໍລິເວນກວ้າງ ແລະ ລັດຖະບານກໍໄດ້ວາງມາດຕະການ ຄວບຄຸມ-ປ້ອງກັນຢ່າງເຂັ້ມງວດ; ແນ່ນອນອາດຈະສົ່ງຜົນກະທົບຕໍ່ທຸກຂະແໜງການ ແລະ ການດໍາລົງຊີວິດປະຈໍາວັນຂອງປະຊາຊົນໃນນີ້ຂະແໜງການສຶກສາ ໂດຍສະເພາະແມ່ນການເປີດສົກຮຽນໃໝ່ (2021-2022) ຈະຕ້ອງໄດ້ດໍາເນີນຕາມວາລະ ແລະ ບໍ່ສາມາດຢຸດການຮຽນ-ການສອນໄດ້ ເຊິ່ງຈະໄດ້ນໍາໃຊ້ຮູບແບບການຮຽນ-ການສອນແບບໃໝ່, ການສຶກສາ ຂອງປະເທດເຮົາສະແດງໃຫ້ເຫັນວ່າ ການສຶກສາບໍ່ເຄີຍຢຸດຕິ ບໍ່ວ່າຈະຢູ່ໃນຍຸກສົງຄາມ ຫຼື ຍຸກສັນຕິພາບ. ເພາະສະນັ້ນ ໃນວັນທີ 6 ກັນຍາ 2021 ກະຊວງສຶກສາທິການ ແລະ ກິລາ ຈຶ່ງໄດ້ຈັດພິທີເປີດສົກຮຽນໃໝ່ 2021-2022 ແບບທາງໄກທົ່ວເທດຢ່າງເປັນທາງການ ເຊິ່ງມີຜູ້ບໍລິຫານການສຶກສາ ແລະ ຄູ-ອາຈານ ຈາກບັນດາແຂວງໃນທົ່ວປະເທດເຂົ້າຮ່ວມ.

             ໃນພິທີດັ່ງກ່າວ, ທ່ານ ຮສ. ປອ. ພຸດ ສີມມາລາວົງ ກໍາມະການສູນກາງພັກ, ລັດຖະມົນຕີກະຊວງສຶກສາທິການ ແລະ ກິລາ ໄດ້ກ່າວວ່າ: ການໄຂສົກຮຽນໃໝ່ປີນີ້ ເປັນສິ່ງທີ່ທ້າທາຍ ແລະ ທົດສອບພວກເຮົາສົມຄວນ, ເນື່ອງຈາກຍັງມີການແຜ່ລະບາດ ຂອງພະຍາດອັກເສບປອດຈາກເຊື້ອຈຸລະໂຣກສາຍພັນໃໝ່ (ໂຄວິດ-19) ຢູ່ໃນຊຸມຊົນເປັນບໍລິເວນກວ້າງ; ເຖິງຢ່າງໃດກໍຕາມພວກເຮົາຢືນຢັນນຳກັນວ່າ ການຮຽນ-ການສອນ ແມ່ນຈະໄດ້ສືບຕໍ່ດຳເນີນການເປັນປົກກະຕິ ເພື່ອຮັບປະກັນໃຫ້ການຮຽນຮູ້ຂອງລູກຫຼານປະຊາຊົນລາວບັນດາເຜົ່າ ທີ່ຈະສືບທອດເປັນຊັບພະຍາກອນມະນຸດທີ່ເຂັ້ມແຂງ ຂອງຊາດໃນອະນາຄົດ. ເພື່ອຮັບປະກັນຄຸນນະພາບ ຂອງການສຶກສາ ແລະ ຄວາມປອດໄພຂອງລູກຫຼານນັກຮຽນ ທ່ານ ລັດຖະມົນຕີກະຊວງສຶກສາທິການ ແລະ ກິລາ ໄດ້ໃຫ້ທິດຊີ້ນໍາດັ່ງນີ້:

             ໜຶ່ງ: ການໄຂສົກໃໝ່ແມ່ນເປັນເອກະພາບກັນທົ່ວປະເທດ ແຕ່ຊັ້ນການສຶກສາກ່ອນໄວຮຽນຈົນຮອດການສຶກສາຊັ້ນສູງ, ແຕ່ເວລາການເປີດຮຽນຂອງສະຖາບັນການສຶກສາແຕ່ລະແຫ່ງ, ແຕ່ລະທ້ອງຖິ່ນຈະແຕກຕ່າງກັນ ຂຶ້ນກັບສະຖານະການ ແລະ ການພິຈາລະນາ ຂອງຄະນະສະເພາະກິດຕ້ານພະຍາດໂຄວິດ-19 ແຕ່ລະແຫ່ງ.

             ສອງ: ການໄຂສົກຮຽນໃໝ່ປີນີ້, ອະນຸຍາດໃຫ້ເປີດການຮຽນການສອນຢູ່ໂຮງຮຽນ ສະເພາະແຂວງ, ເມືອງ ແລະ ທ້ອງຖິ່ນ ທີ່ບໍ່ມີການແຜ່ລະບາດ ຂອງໂຄວິດ-19 ຢູ່ໃນຊຸມຊົນໃນ 14 ວັນຜ່ານມາ. ສຳລັບທ້ອງຖິ່ນໃດ ທີ່ຍັງມີຄວາມສ່ຽງຫຼາຍ ແມ່ນຈະໄດ້ໂຈະການເປີດຮຽນໄວ້ກ່ອນ, ຢູ່ໃນສະຖານການສຶກສາ ສາມາດຈັດການຮຽນການສອນ ດ້ວຍຫຼາຍຊ່ອງທາງ ເຊັ່ນ: ຮຽນທາງໄກ ຜ່ານຊ່ອງທາງเອເລັກໂຕຣນິກຕ່າງໆ, ໂທລະພາບ, ແອັບຄັງປັນຍາລາວ, ຄູ ແລະ ນັກຮຽນພົບເປັນກຸ່ມນ້ອຍ, ໃຫ້ຄູປະສານນໍາພໍ່ແມ່ຜູ້ປົກຄອງ ຊ່ວຍລູກຮຽນຢູ່ເຮືອນ ຫຼື ຄູ ໄປແນະນຳນັກຮຽນກັບເຮືອນ.

             ສາມ: ເພື່ອສ້າງຄວາມໝັ້ນໃຈໃຫ້ແກ່ສັງຄົມນັ້ນ, ຜູ້ບໍລິຫານການສຶກສາ ແລະ ຄູ-ອາຈານ ທຸກທ່ານ ຈະຕ້ອງໄດ້ຮັບການສັກວັກຊິນຄົບໂດສ, ສະຖານການສຶກສາຕ້ອງມີມາດຕະການປ້ອງກັນ ແລະ ຄວບຄຸມໂຄວິດ-19 ທີ່ເຂັ້ມງວດ ເຊັ່ນ: ມີການກວດອຸນຫະພູມທຸກຄົນທີ່ເຂົ້າມາໃນໂຮງຮຽນ, ໃສ່ຜ້າອັດປາກ-ອັດດັງ, ປະຕິບັດມາດຕະການຮັກສາໄລຍະຫ່າງ, ໝັ່ນລ້າງມືໃສ່ສະບູ ແລະ ໃຊ້ເຈວຂ້າເຊື້ອເປັນປົກກະຕິ.

             ສີ່: ຜູ້ບໍລິຫານການສຶກສາ ແລະ ກິລາ ທຸກຂັ້ນ, ຄູ-ອາຈານ, ພໍ່ແມ່ຜູ້ປົກຄອງ ແລະ ນັກຮຽນ-ນັກສຶກສາ ຕ້ອງເພີ່ມທະວີບົດບາດ ຂອງຕົນເອງ ໃນການຮັກສາສະພາບແວດລ້ອມການຮຽນຮູ້ທີ່ປອດໄພ ແລະ ຮັບປະກັນການຮຽນ-ການສອນໃຫ້ຕໍ່ເນື່ອງ ຜ່ານຊ່ອງທາງຕ່າງໆ.

             ຫ້າ: ທ້ອງຖິ່ນໃດທີ່ສາມາດສອນແບບອອນລາຍ ຫຼື ແບບທາງໄກ ທີ່ຮັບປະກັນທັງຜູ້ສົ່ງ ແລະ ຜູ້ຮັບ ສາມາດສື່ສານຫາກັນໄດ້ ແມ່ນໃຫ້ປະຕິບັດຕາມຄໍາແນະນໍາ ຂອງກົມວິຊາການ ທີ່ໄດ້ອອກລະບຽບການສະເພາະ.

             ຫົກ: ທ້ອງຖິ່ນ ແລະ ສະຖານການສຶກສາໃດ ທີ່ບໍ່ສາມາດຮຽນທາງອອນລາຍ ແມ່ນໃຫ້ຄູມອບວຽກບ້ານໃຫ້, ມີການນັດພົບເປັນກຸ່ມນ້ອຍເປັນບາງຄັ້ງ ເພື່ອກວດວຽກບ້ານ ແລະ ມອບວຽກບ້ານຕໍ່ໄປ, ປະກອບປຶ້ມແບບຮຽນໃຫ້ນັກຮຽນໃຫ້ຄົບ ເພື່ອສະດວກໃນການຮຽນຢູ່ເຮືອນ, ແນະນຳພໍ່ແມ່ ຊ່ວຍແນະນຳລູກຫຼານຢູ່ເຮືອນຕື່ມອີກ.

             ການສຶກສາ ແມ່ນການພັດທະນາຊັບພະຍາກອນມະນຸດ ທີ່ມີຄວາມສໍາຄັນຕໍ່ອະນາຄົດ ຂອງປະເທດຊາດ ເຊິ່ງບໍ່ສາມາດຢຸດການຮຽນ-ການສອນໄດ້ ບໍ່ວ່າຈະຕ້ອງຢູ່ໃນສະພາບຫຍຸ້ງຍາກປານໃດກໍຕາມ; ແຕ່ວ່າການປ້ອງກັນ ແລະ ຄວບຄຸມ ການແຜ່ລະບາດ ຂອງພະຍາດໂຄວິດ-19 ກໍແມ່ນສິ່ງທີ່ຈໍາເປັນ ແລະ ເດັດຂາດ. ສະນັ້ນ ການດໍາເນີນການຮຽນ-ການສອນ ໃນສົກຮຽນນີ້ທີ່ພວມຢູ່ໃນຄວາມສ່ຽງຕໍ່ການລະບາດ ຂອງພະຍາດຮ້າຍ ຈະເຮັດແນວໃດເພື່ອຮັບປະກັນການສົ່ງຄວາມຮູ້ໃຫ້ແກ່ນັກຮຽນ ແລະ ຮັບປະກັນການປ້ອງກັນພະບາດໂຄວິດ-19 ໄດ້ນັ້ນ ແມ່ນຂຶ້ນກັບຜູ້ບໍລິຫານການສຶກສາ ແຕ່ລະແຫ່ງ ຈະຈັດຕັ້ງຜັນຂະຫຍາຍທິດນໍາຂອງທ່ານ ລັດຖະມົນຕີ ກະຊວງສຶກສາທິການ ແລະ ກິລາ ແນວໃດ ຈຶ່ງຈະສອດຄ່ອງ ແລະ ມີປະສິດທິຜົນ.

 

ຂ່າວ: ສອນທິ  ພາບ: ຂປລ

 

ບົດຄວາມໜ້າສົນໃຈ

Leave a Reply

Your email address will not be published. Required fields are marked *