ຂ່າວເດັ່ນ-ປະເດັນດັງ

ກະຊວງສາທາລະນະສຸກ ສຳເລັດການຝຶກອົບຮົມວຽກງານ ສັງລວມ-ຫາງສຽງສັງຄົມ ຄັ້ງທີ III

         ກະຊວງສາທະລະນະສຸກ ສົມທົບກັບຄະນະໂຄສະນາອົບຮົມສູນກາງພັກ ໂດຍສະເພາະແມ່ນກົມສັງລວມ ໄດ້ເປີດຊຸດຝຶກອົບຮົມວຽກງານສັງລວມ-ຫາງສຽງສັງຄົມ ໃຫ້ແກ່ພະນັກງານ ໃນຂົງເຂດສາທາລະນະສຸກ; ການຈັດຕັ້ງຝຶກອົບຮົມໃນຄັ້ງນີ້ ເປັນຄັ້ງທີ III ເຊິ່ງໄດ້ດໍາເນີນມາຕັ້ງແຕ່ ວັນທີ 28-30 ກໍລະກົດ 2021 ຈຶ່ງປິດລົງ ແລະ ໄດ້ຮັບຜົນສໍາເລັດອັນຈົບງາມ.

          ໃນພິທີປິດຊຸດຝຶກອົບຮົມ ໃນຄັ້ງນີ້ ເປັນກຽດເຂົ້າຮ່ວມທັງເປັນປະທານ ໂດຍ ທ່ານ ລາວປາວຊົ່ງ ນະວົງໄຊ ກຳມະການສູນກາງພັກ, ຮອງຫົວໜ້າຄະນະໂຄສະນາອົບຮົມສູນກາງພັກ ແລະ ທ່ານ ດຣ ໄພວັນ ແກ້ວປະເສີດ ກຳມະການປະຈຳພັກ, ປະທານກວດກາພັກ, ຫົວໜ້າກົມກວດກາ ກະຊວງສາທາລະນະສຸກ, ມີຄະນະຮັບຜິດຊອບຊຸດຝຶກອົບຮົມ, ວິທະຍາກອນ ຈາກກົມສັງລວມ ຂອງ ຄອສພ  ແລະ ນັກຝຶກອົບຮົມເຂົ້າຮ່ວມທັງໝົດ 40 ກວ່າທ່ານ. ໃນພິທີດັ່ງກ່າວ ທ່ານ ນາງ ດຣ ແສງຈັນ ຈັນທະສຸກ ຫົວໜ້າຫ້ອງການກະຊວງສາທາລະນະສຸກ, ຄະນະຮັບຜິດຊອບຊຸດຝຶກອົບຮົມ ໄດ້ສະຫຼຸບໝາກຜົນຂອງການຈັດຝຶກອົບຮົມໃນຄັ້ງນີ້ ເຊິ່ງທ່ານໄດ້ສັງລວມໃຫ້ຮູ້ວ່າ: ການຈັດຝຶກອົບຮົມໃນຄັ້ງນີ້ ກໍເພື່ອຈັດຕັ້ງຜັນຂະຫຍາຍແຜນການ ຍົກລະດັບຄວາມຮູ້-ຄວາມສາມາດ ຂອງພະນັກງານ ກ່ຽວກັບວຽກງານຄົ້ນຄວ້າສັງລວມ ແລະ ການເກັບກຳສະພາບແນວຄິດຫາງສຽງສັງຄົມ ທີ່ມີຕໍ່ຂະແໜງສາທາລະນະສຸກ ເພື່ອເປັນເສນາທິການໃຫ້ແກ່ຄະນະພັກນຳພາ-ຊີ້ນຳ ຢ່າງສອດຄ່ອງ ແລະ ແກ້ໄຂທັນເວລາ; ເນື້ອໃນການຝຶກອົບຮົມໃນຄັ້ງນີ້: ປະກອບມີ 4 ບົດຄືື: ບັນຫາພື້ນຖານກ່ຽວກັບວຽກງານສັງລວມ-ຫາງສຽງສັງຄົມ, ວີທີການເກັບກຳ ແລະ ການນຳໃຊ້ຫາງສຽງສັງຄົມ ເຂົ້າໃນວຽກງານການເມືອງ-ແນວຄິດ, ຕາໜ່າງເພື່ອນຮ່ວມວຽກງານ ແລະ ວຽກງານຄົ້ນຄວ້າສັງລວມ; ຜ່ານການຝຶກອົບຮົມເຫັນວ່າ: ວິທະຍາກອນ ມີຄວາມຈິງໃຈຖ່າຍທອດຄວາມຮູ້, ນັກຝຶກອົບຮົມ ກໍມີຄວາມສົນໃຈຢາກຮັບເອົາຄວາມຮູ້ ຈຶ່ງເຮັດໃຫ້ການຝຶກອົບຮົມຄັ້ງນີ້ ມີບັນຍາກາດ ແລະ ບັນລຸຕາມຄາດໝາຍທີ່ວາງໄວ້.

          ໃນໂອກາດດັ່ງກ່າວ ທ່ານ ລາວປາວຊົ່ງ ນະວົງໄຊ ໄດ້ໃຫ້ກຽດມອບໃບຢັ້ງຢືນ ໃຫ້ແກ່ນັກຝຶກອົບຮົມຈຳນວນ 41 ທ່ານ ແລະ ໄດ້ໂອ້ລົມ ເຊິ່ງທ່ານໄດ້ຍົກໃຫ້ເຫັນຫຼາຍບັນຫາ ໃນນີ້ ທ່ານໄດ້ເນັ້ນ ກົນອຸບາຍຫັນປ່ຽນໂດຍສັນຕິ ຂອງກຳລັງປໍລະປັກ ທີ່ປັ່ນປ່ວນແນວຄິດ ຂອງພະນັກງານ, ສະມາຊິກພັກ ແລະ ປະຊາຊົນພວກເຮົາ; ສະນັ້ນ ວຽກງານເກັບກໍາສະພາບແນວຄິດ-ຫາງສຽງສັງຄົມ ມີຄວາມສໍາຄັນຫຼາຍ ໃນສະພາບການໃໝ່; ການຝຶກອົບຮົມໃນຄັ້ງນີ້ ສະແດງໃຫ້ເຫັນເຖິງຄວາມເອົາໃຈໃສ່ ຂອງການນຳ ກະຊວງສາທາລະນະສຸກ ຕໍ່ວຽກງານການເມືອງ-ແນວຄິດ ແລະ ຫວັງວ່າ ນັກຝຶກອົບຮົມ ຈະນຳເອົາຄວາມຮູ້ທີ່ໄດ້ຮັບໃນຄັ້ງນີ້ ໄປຈັດຕັ້ງຜັນຂະຫຍາຍໃຫ້ເກີດຜົນເປັນຈິງ.

ພາບ-ຂ່າວ ໂດຍ: ບຸນປະຄອຍ ດວງມະໂນ

ບົດຄວາມໜ້າສົນໃຈ

Leave a Reply

Your email address will not be published. Required fields are marked *