ຂ່າວເດັ່ນ-ປະເດັນດັງ

ເຊັນສັນຍາຮ່ວມມື ສອງຄະນະໂຄສະນາອົບຮົມລາວ-ຫວຽດນາມ

       ເພື່ອສືບຕໍ່ເສີມຂະຫຍາຍມູນເຊື້ອ ການພົວພັນຮ່ວມມື ລະຫວ່າງ ຄະນະໂຄສະນາອົບຮົມສູນກາງພັກປະຊາຊົນປະຕິວັດລາວ ກັບ ຄະນະໂຄສະນາສຶກສາສູນກາງພັກກອມມູນິດຫວຽດນາມ ທີ່ມີມາຢ່າງຍາວນານ; ດັ່ງນັ້ນ ໃນວັນທີ 25 /4/2022 ຈຶ່ງໄດ້ຈັດພິທີເຊັນສັນຍາຮ່ວມມືສອງຝ່າຍໄລຍະ 5 ປີ 2022-2026 ຢູ່ທີ່ໂຮງແຮມເມືອງແທັງ, ນະຄອນຫຼວງວຽງຈັນ; ຝ່າຍຫວຽດນາມ ນໍາໂດຍ ສະຫາຍ ຫງວຽນຈ້ອງເງ້ຍ ເລຂາທິການສູນກາງພັກ, ຫົວໜ້າຄະນະໂຄສະນາສຶກສາສູນກາງພັກກອມມູນິດຫວຽດນາມ, ຝ່າຍລາວນໍາໂດຍ ສະຫາຍ ຄໍາພັນ ເຜີຍຍະວົງ ເລຂາທິການສູນກາງພັກ ຫົວໜ້າຄະນະໂຄສະນາອົບຮົມສູນກາງພັກ ປະຊາຊົນປະຕິວັດລາວ.

          ໃນໂອກາດທີ່ຜູ້ແທນຂັ້ນສູງ ຂອງຄະນະໂຄສະນາສຶກສາສູນກາງພັກກອມມູນິດຫວຽດນາມ  ຢ້ຽມຢາມ ສ ປປ ລາວ ຕາມຄໍາເຊີນ ຂອງຄະນະໂຄສະນາອົບຮົມສູນກາງພັກປະຊາຊົນປະຕິວັດລາວ ນັບແຕ່ວັນທີ 24-27/4/2022. ການມາຢ້ຽມຢາມ ສປປ ລາວ ໃນຄັ້ງນີ້ ຈຸດປະສົງຕົ້ນຕໍ  ແມ່ນພົບປະສອງຝ່າຍ ລະຫວ່າງ ສອງຄະນະໂຄສະນາອົບຮົມລາວ-ຫວຽດນາມ ເພື່ອພ້ອມກັນສັງເກດຕີລາຄາ ໝາກຜົນ ຂອງການຮ່ວມມືໃນໄລຍະ 5 ປີຜ່ານມາ ແລະ ເຊັນສັນຍາຮ່ວມມືໃນ 5 ປີຕໍ່ໜ້າ. ພິທີພົບປະສອງຝ່າຍ ໂດຍຫົວໜ້າຄະນະທັງສອງຝ່າຍ ໄດ້ແຈ້ງສະພາບໂດຍລວມທີ່ພົ້ນເດັ່ນຢູ່ພາຍໃນປະເທດຕົນ ແລະ ສະພາບການເຄື່ອນໄຫວວຽກງານໂຄສະນາອົບຮົມ ໃຫ້ກັນຊາບ  ພ້ອມທັງແລກປ່ຽນບົດຮຽນທາງດ້ານວິຊາການ ຂອງທັງສອງຝ່າຍ; ຈາກນັ້ນ ກໍມີພິທີເຊັນສັນຍາຮ່ວມມືໃນໄລຍະ 5 ປີຕໍ່ໜ້າ 2022-2026 ລະຫວ່າງສອງຄະນະໂຄສະນາ ລາວ-ຫວຽດນາມ. ສ່ວນເນື້ອໃນສັນຍາຮ່ວມມື ຈະສະເໜີຢູ່ໃນວາລະສານໂຄສະນາສະບັບສິ່ງພິມປະຈໍາເດືອນ 4/2022.

          ການມາຢ້ຽມຢາມ ສ ປປ ລາວ ຢ່າງເປັນທາງການ ຂອງຄະນະຜູ້ແທນຂັ້ນສູງ ຄະນະໂຄສະນາສຶກສາສູນກາງພັກກອມມູນິດຫວຽດນາມ ໃນຄັ້ງນີ້ ນອກຈາກພົບປະສອງຝ່າຍ ກັບຄະນະໂຄສະນາອົບຮົມສູນກາງພັກປະຊາຊົນປະຕິວັດລາວ ແລະ ເຊັນສັນຍາຮ່ວມມືສອງຝ່າຍແລ້ວ ຄະນະຜູ້ແທນຂັ້ນສູງ ສສ ຫວຽດນາມ ຍັງໄດ້ເຂົ້າຢ້ຽມຂໍ່ານັບ ສະຫາຍ ທອງລຸນ ສີສຸລິດ ເລຂາທິການໃຫຍ່, ປະທານປະເທດ ແຫ່ງ ສປປ ລາວ, ສະຫາຍພົນເອກ ຈັນສະໝອນ ຈັນຍາລາດ, ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນປະເທດ, ສະຫາຍ ໄຊສົມພອນ ພົມວິຫານ ປະທານສະພາແຫ່ງຊາດ ແລະ ຢ້ຽມຢາມລັດຖະມົນຕີກະຊວງຖະແຫຼງຂ່າວ-ວັດທະນາທໍາ ແລະ ທ່ອງທ່ຽວ; ພ້ອມນີ້ ຍັງໄດ້ເດີນທາງໄປທ່ຽວຊົມແຂວງຫຼວງພະບາງ ເມືອງມໍລະດົກໂລກ ແລະ ສະຖານທີ່ທ່ອງທ່ຽວຈໍານວນໜຶ່ງຢູ່ນະຄອນຫຼວງວຽງຈັນ.

          ການມາຢ້ຽມຢາມ ສປປ ລາວ ຂອງຄະນະຜູ້ແທນຂັ້ນສູງ ຂອງ ສສ ຫວຽດນາມໃນຄັ້ງນີ້ ສະຫາຍ ຫງວຽນຈ້ອງເງ້ຍ ເລຂາທິການສູນກາງພັກ, ຫົວໜ້າຄະນະໂຄສະນາສຶກສາກອມມູນິດຫວຽດນາມ ໄດ້ຕາງໜ້າໃຫ້ຄະນະໂຄສະນາສຶກສາສູນກາງພັກກອມມູນິດຫວຽດນາມ ມອບຄອມພີວເຕີຈໍານວນ 20 ຊຸດໃຫ້ແກ່ ຄະນະໂຄສະນາອົບຮົມສະນາກາງພັກ ປະຊາຊົນປະຕິວັດລາວ ອີກດ້ວຍ.

          ພາບ-ຂ່າວ: ທອນ ພົມທິກອນ

ບົດຄວາມໜ້າສົນໃຈ

Leave a Reply

Your email address will not be published.