ຂ່າວເດັ່ນ-ປະເດັນດັງ

ສະຫາຍ ເລຂາທິການໃຫຍ່, ປະ​ທານ​ປະ​ເທດ​ຢືນ​ຢັນທັດສະນະ ​ຕໍ່ວັນສ້າງຕັ້ງສາຍພົວພັນການທູດ ລາວ-ຫວຽດນາມ ຄົບຮອບ 60 ປີ

ໃນ​ວັນ​ທີ 5 ກັນ​ຍາ 2022 ສະຫາຍ ທອງລຸນ ສີສຸລິດ ເລຂາທິການໃຫຍ່, ປະທານປະເທດ ໄດ້​ໃຫ້​ສຳ​ພາດ​ຕໍ່​ສື່ມວນ​ຊົນ ກ່ຽວ​ກັບ​ຄວາມ​ໝາຍ​ສຳ​ຄັນ ຂອງ​ການ​ສ້າງ​ຕັ້ງ​ສາຍ​ພົວ​ພັນ​ການ​ທູດ ​ລະ​ຫວ່າງ ລາວ-ຫວຽດນາມ ເຊິ່ງ​ ສະ​ຫາຍ ໄດ້​ມີ​ຄຳ​ເຫັນ ໂດຍ​ສັງ​ລວມ​ວ່າ: ລະ​ຫວ່າງສອງປະເທດ ລາວ-ຫວຽດນາມ ເປັນບ້ານໃກ້ເຮືອນຄຽງຕິດຈອດກັນ ດ້ວຍສາຍພູ, ສາຍນໍ້າທາງທໍ​າມະຊາດ, ປະຊາຊົນສອງຊາດ ໄດ້ດໍາລົງຊີວິດຢູ່ຮ່ວມກັນຢ່າງສັນຕິສຸກມາແຕ່ດຶກດຳບັນ; ນັບແຕ່ທ້າຍສະຕະວັດທີ 19 ຫາຕົ້ນສະຕະວັດທີ 20 ສອງປະເທດໄດ້ຕົກຢູ່ໃນຊາຕາກໍາອັນດຽວກັນ ຄື: ປະເທດຊາດສູນເສຍເອກະລາດ, ປະຊາຊົນຖືກກົດຂີ່ຂູດຮີດແສນສາຫັດ ພາຍໃຕ້ແອກປົກຄອງ ຂອງພວກຈັກກະພັດຕ່າງດ້າວ. ນັບແຕ່ພັກກອມມູນິດອິນດູຈີນ ໄດ້ກຳເນີດເກີດຂຶ້ນ ໂດຍມີ ປະທານ ໂຮ່ຈິມິນ ຜູ້ຍິ່ງໃຫຍ່ ເປັນຜູ້ກໍ່ຕັ້ງ, ຕໍ່ມາກໍໄດ້ເກີດມີພັກກອມມູນິດຫວຽດນາມ, ພັກປະຊາຊົນປະຕິວັດລາວ ແລະ ພັກປະຊາຊົນກໍາປູເຈຍ ທັງ​ສາມ​ພັກ ກໍ​ຄື​ ສາມ​ປະ​ເທດ ໄດ້ຄຽງບ່າຄຽງໄຫຼ່ກັນ ຕໍ່ສູ້ຕ້ານສັດຕູໂຕດຽວກັນ ຢ່າງດຸເດືອດ, ຂ້ຽວຂາດ ແລະ ໄດ້ຍາດເອົາເອກະລາດແຫ່ງຊາດ ແລະ ສິດເສລີພາບ ມາໃຫ້ປະຊາຊົນສາມຊາດ ອິນດູຈີນ ໄດ້ຢ່າງສົມບູນ. ສຳລັບຢູ່ປະເທດລາວ, ພາຍໃຕ້ການນຳພາ ຂອງພັກປະຊາຊົນລາວ ໃນເມື່ອກ່ອນ ອັນມີ ປະທານ ໄກສອນ ພົມວິຫານ ເປັນຜູ້ນຳພາ ບໍ່ວ່າຍາມໃດ ກໍໄດ້ຖືມິດຕະພາບອັນຍິ່ງໃຫຍ່, ຄວາມສາມັກຄີພິເສດ, ການຮ່ວມສຳພັນສູ້ຮົບ ກັບພັກກອມມູນິດຫວຽດນາມ, ກອງທັບຫວຽດນາມ ແລະ ປະຊາຊົນຫວຽດນາມ ເປັນກຳລັງແຮງຕັດສິນທຸກໄຊຊະນະຂອງຕົນ. ດັ່ງນັ້ນ, ມັນຈຶ່ງເປັນບໍ່ເກີດແຫ່ງມິດຕະພາບທີ່ຍິ່ງໃຫຍ່, ຄວາມສາມັກຄີພິເສດ ຂອງສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດ ນາມ, ຫວຽດນາມ-ລາວ ​ແລະ ກ້​າວ​ໄປ​ເຖິງການສ້າງຕັ້ງສາຍພົວພັນການທູດນຳ​ກັນ ໃນ​ວັນ​ທີ 5 ກັນ​ຍາ 1962 ເຊິ່ງເປັນເຫດການປະຫວັດສາດ ທີ່ມີ​ຄວາມໝາຍສໍາຄັນຕໍ່ການພົວພັນ ລະຫວ່າງສອງປະເທດ.  

ໃນໂອກາດຄົບ​ຮອບ 60 ປີ ວັນສ້າງຕັ້ງສາຍພົວພັນການທູດ ລະຫວ່າງ ລາວ-ຫວຽດນາມ (5 ກັນຍາ 1962-5 ກັນຍາ 2022) ສະຫາຍ ທອງລຸນ ສີສຸລິດ ເລຂາທິການໃຫຍ່ ຄະນະບໍລິຫານງານສູນກາງພັກ ປະຊາຊົນປະຕິວັດລາວ, ປະທານປະເທດ ແຫ່ງ ສປປ ລາວ ກໍ​ໄດ້​ຢືນ​ຢັນທັດສະນະ ຕໍ່​ວັນ​ສຳ​ຄັນ​ດັ່ງ​ກ່າວ​ວ່າ: ຄວາມສຳພັນທີ່ຫາຍາກ, ຄວາມສາມັກຄີພິເສດ ແລະ ການຮ່ວມມືຮອບດ້ານ ຂອງ​ສອງ​ປະ​ເທດ ລາວ-ຫວຽດ​ນາມ ຈະ​ຕ້ອງສືບຕໍ່ດຳລົງຄົງຢູ່ ແລະ ພັດທະນາຕໍ່ໄປ ໂດຍ​ສະ​ເພາະ​ໃນ​ເງື່ອນ​ໄຂ​ປັດ​ຈຸ​ບັນ ຕ້ອງ​ໄດ້​ສືບ​ຕໍ່​ຜັນ​ຂ​ະ​ຫຍາຍ​ວຽກ​ງານ​ສຳ​ຄັນ ດັ່ງ​ນີ້:  

ໜຶ່ງ: ລາວ-ຫວຽດນາມ ຈະສືບຕໍ່ຈັບມືກັນແໜ້ນ, ພ້ອມກັນກ້າວເດີນ, ສືບຕໍ່ຊ່ວຍເຫຼືອ, ສະໜັບສະໜູນ ເຊິ່ງກັນ ແລະ ກັນ, ເຕີມເຕັມໃຫ້ແກ່ກັນ ທາງດ້ານບົດຮຽນ, ປະສົບການ, ຄວາມຮູ້, ຄວາມສາມາດ ໃຫ້ແກ່ກັນ, ສ້າງເງື່ອນໄຂໃຫ້ແກ່ກັນ ແລະ ກັນ ເພື່ອພັດທະນາເສດຖະກິດ-ສັງຄົມ ຂອງແຕ່ລະປະເທດ, ນຳໃຊ້ທ່າແຮງ ແລະ ຈຸດພິເສດຂອງແຕ່ລະປະເທດ ເພື່ອຂຸດຄົ້ນອອກມາ ນຳໄປສູ່ຄວາມຈະເລີນກ້າວໜ້າ ຮ່ວມກັນ ເພື່ອຜົນປະໂຫຍດ ຂອງປະຊາຊົນຂອງພວກເຮົາ ທັງສອງປະເທດ.

ສອງ: ສືບຕໍ່ຜັນຂະຫຍາຍ ບັນດາຂໍ້ຕົກລົງຂອງການນຳ ຂອງສອງພັກ, ຂໍ້ຜູກພັນ ແລະ ສັນຍາ ຂອງ ສອງລັດຖະບານແຕ່ລະໄລຍະໃຫ້ເປັນຮູບປະທຳ ນຳເອົາຜົນປະໂຫຍດຕົວຈິງມາສູ່ສອງປະເທດ ແລະ ພະຍາຍາມສ້າງກຳລັງແຮງທາງດ້ານການຮ່ວມມືຮອບດ້ານ ທາງດ້ານເສດຖະກິດ ໃຫ້ມີປະສິດທິຜົນສູງຂຶ້ນເລື້ອຍໆ.

ສາມ: ສືບຕໍ່ເອົາໃຈໃສ່ໃນການຮ່ວມມືດ້ານວັດທະນະທຳ-ສັງຄົມ, ຍົກລະດັບຄຸນນະພາບ ການຮ່ວມມືດ້ານການກໍ່ສ້າງຊັບພະຍາກອນມະນຸດ, ຮ່ວມມືກັນແກ້ໄຂບັນດາໜໍ່ແໜງ ທີ່ຈະພາໃຫ້ເກີດປະກົດການຫຍໍ້ທໍ້ ຕາມຊາຍແດນຂອງສອງປະເທດ, ເຮັດໃຫ້ເປັນຊາຍແດນແຫ່ງສັນຕິພາບ, ມີຄວາມສະຫງົບສຸກ, ສ້າງເງື່ອນໄຂໃຫ້ປະຊາຊົນຢູ່ລຽບຕາມຊາຍແດນ ມີການພັດທະນາ, ໃຫ້ປະຊາຊົນສອງປະເທດ ໄປມາຫາສູ່ກັນ ແລະ ທຳມາຫາກິນຮ່ວມກັນ.

ສີ່: ສືບຕໍ່ໃຫ້ຄວາມຮູ້, ຄວາມເຂົ້າໃຈຢ່າງເລິກເຊິ່ງ ເຖິງປະຫວັດຄວາມເປັນມາຂອງນໍ້າໃຈມິດຕະພາບ, ຄວາມສາມັກຄີ ທີ່ບໍລິສຸດຜຸດຜ່ອງຂອງສອງຊາດ ແລະ ໃຫ້ມະຫາຊົນຂອງສອງປະເທດ ເປັນຜູ້ປົກປັກຮັກສາໄວ້ໃຫ້ໝັ້ນຄົງຍາວນານ.

ໃນໂອກາດນີ້, ສະຫາຍ ເລຂາທິການໃຫຍ່, ປະ​ທານ​ປະ​ເທດ ຍັງໄດ້ເຊີນຊວນປະຊາຊົນລາວ ແລະ ປະຊາຊົນຫວຽດນາມທຸກຊັ້ນຄົນ ຈົ່ງພ້ອມກັນສານຕໍ່ພາລະກິດ ຂອງບັນພະບູລຸດ, ຄົນຮຸ່ນກ່ອນ, ອອກແຮງເພີ່ມພູນຄູນສ້າງສາຍພົວພັນພິເສດລາວ-ຫວຽດນາມ ໃຫ້ແຕກດອກອອກຜົນ ແລະ ຂຽວສົດງົດງາມຕະຫຼອດໄປ; ຂໍໃຫ້ໄວໜຸ່ມ ລາວ-ຫວຽດນາມ ຈົ່ງເປັນຜູ້ສືບທອດທີ່ດີ, ເປັນຜູ້ພິທັກປົກປ້ອງ, ຖະນຸຖະໜອມ ສາຍພົວພັນພິເສດລາວ-ຫວຽດນາມ ໃຫ້ໝັ້ນຄົງຈົນເທົ່າໃດໆ; ຈົ່ງຮ່ວມມື, ຮ່ວມແຮງ, ຮ່ວມໃຈກັນ, ຮັກແພງສາມັກຄີ, ຊ່ວຍເຫຼືອ ເຊິ່ງກັນ ແລະ ກັນ ບົນຈິດໃຈ ສະຫາຍອ້າຍນ້ອງ, ພ້ອມກັນປົກປັກຮັກສາໝາກຜົນຂອງການປະຕິວັດ, ພ້ອມກັນສ້າງສາພັດທະນາປະເທດຊາດໃຫ້ຮັ່ງມີ, ເຂັ້ມແຂງ ຕາມເປົ້າໝາຍອຸດົມການຂອງສອງພັກ; ຈົ່ງຮ່ວມກັນສ້າງຂະບວນການ ປະກອບສ່ວນເຂົ້າໃນບັນດາກິດຈະກໍາສະເຫຼີມສະຫຼອງ ປີສາມັກຄີມິດຕະພາບ ລາວ-ຫວຽດນາມ ປີ 2022 ໃຫ້ມີເນື້ອໃນເລິກເຊິ່ງ ແລະ ປະສົບຜົນສໍາເລັດຢ່າງຈົບງາມ; ຂໍອວຍພອນໃຫ້ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລາວ-ຫວຽດນາມ, ຫວຽດນາມ-ລາວ ຈົ່ງໝັ້ນຄົງຂະໜົງແກ່ນ ແລະ ສວຍສົດງົດງາມຕະຫຼອດກາລະນານ.

ຂ່າວ: ຫົງລືດີ, ຮູບ: ໜັງສືພິມປະຊາຊົນ

ບົດຄວາມໜ້າສົນໃຈ

Leave a Reply

Your email address will not be published.