ຂ່າວເດັ່ນ-ປະເດັນດັງ

ສະພາແຫ່ງຊາດ ຮັບຮອງເອົາການສະເໜີຂອງລັດຖະບານ ກ່ຽວກັບການແຕ່ງຕັ້ງ ແລະ ຍົກຍ້າຍສະມາຊິກລັດຖະບານຈໍານວນໜຶ່ງ

ກອງປະຊຸມ ສະໄໝສາມັນເທື່ອທີ່ 3 ຂອງສະພາແຫ່ງຊາດ ຊຸດທີ IX ໄດ້ໄຂຂຶ້ນທ່າມກາງທີ່ປະເທດພວກເຮົາ ພວມປະເຊີນກັບຄວາມຫຍຸ້ງຍາກ ທາງດ້ານເສດຖະກິດຢ່າງໜັກໜ່ວງ ໂດຍສະເພາະແມ່ນບັນຫາເງິນເຟີ້, ລາຄານໍ້າມັນເຊື້ອໄຟແພງ ທັງຂາດແຄນ ແລະ ລາຄາສິນຄ້າທຸກປະເພດ ພຸ່ງຂຶ້ນສູງ ສົ່ງຜົນກະທົບຕໍ່ຊີວິດການເປັນຢູ່ ຂອງທຸກຊັ້ນຄົນໃນສັງຄົມ; ສະນັ້ນ ກອງປະຊຸມສະພາແຫ່ງຊາດ ໃນຄັ້ງນີ້ ມີຄວາມສໍາຄັນຫຼາຍ ຕໍ່ການພິຈາລະນາ, ປະກອບຄໍາຄິດຄໍາເຫັນ ແລະ ຮັບຮອງເອົາແຜນງານຕ່າງໆ ຂອງລັດຖະບານ ເປັນຕົ້ນແມ່ນ ການແກ້ໄຂວິກິດການທາງດ້ານເສດຖະກິດ ທີ່ຢູ່ຂັ້ນ ເຕືອນໄພອັນຕະລາຍ.

ໃນວາລະດໍາເນີນກອງປະຊຸມ ໃນວັນທີ 20 ມິຖຸນາ 2022 ສະມາຊິກສະພາແຫ່ງຊາດ ໄດ້ພິຈາລະນາ ແລະ ປະກອບຄໍາເຫັນຢ່າງກົງໄປກົງມາ ຕໍ່ກັບໜັງສືສະເໜີ ຂອງທ່ານນາຍົກລັດຖະມົນຕີ ເຊິ່ງມີ 2 ສະບັບຄື: ສະບັບ1 ເລກທີ 33/ນຍ ລົງວັນທີ 17/6/2022 ວ່າດ້ວຍການພິຈາລະນາ ຮັບຮອງເອົາການແຕ່ງຕັ້ງ ຮອງນາຍົກລັດຖະມົນຕີ ແລະ ສະບັບທີ 2 ແມ່ນສະບັບເລກທີ 34/ນຍ ລົງວັນທີ 17/6/2022 ວ່າດ້ວຍການພິຈາລະນາ ການຍົກຍ້າຍ ແລະ ແຕ່ງຕັ້ງ ສະມາຊິກລັດຖະບານຈໍານວນໜຶ່ງ; ເຊິ່ງຜ່ານການຄົ້ນຄວ້າພິຈາລະນາ, ປະກອບຄຳຄິດຄຳເຫັນ ຂອງບັນດາສະມາຊິກສະພາແຫ່ງຊາດ ແລະ ໄດ້ເຫັນດີເປັນເອກະພາບ ຮັບຮອງເອົາການສະເໜີ ຂອງທ່ານ ນາຍົກລັດຖະມົນຕີ ຄື: ແຕ່ງຕັ້ງ ທ່ານ ພົນເອກ ວິໄລ ຫຼ້າຄຳຟອງ ເປັນຮອງນາຍົກລັດຖະມົນຕີ ທັງເປັນລັດຖະມົນຕີກະຊວງປ້ອງກັນຄວາມສະຫງົບ ແລະ ແຕ່ງຕັ້ງ ທ່ານ ສະເຫຼີມໄຊ ກົມມະສິດ ເປັນຮອງນາຍົກລັດ ຖະມົນຕີ ທັງເປັນລັດຖະມົນຕີກະຊວງການຕ່າງປະເທດ; ພ້ອມດຽວກັນນີ້ ຍັງໄດ້ຄົ້ນຄ້ວາພິຈາລະນາ ແລະ ເຫັນດີເປັນເອກະພາບ ກັບການສະເໜີຂອງ ທ່ານນາຍົກ ເຫັນດີຍົກຍ້າຍ ທ່ານ ຄຳແພງ ໄຊສົມແພງ ລັດຖະມົນຕີກະຊວງອຸດສາຫະກຳ ແລະ ການຄ້າ ໄປເປັນລັດຖະມົນຕີ ປະຈຳຫ້ອງວ່າການສຳນັກງານນາຍົກລັດຖະມົນຕີ, ທ່ານ ສອນໄຊ ສິດພະໄຊ ຜູ້ວ່າການທະນາຄານແຫ່ງ ສປປ ລາວ ໄປເປັນລັດຖະມົນຕີ ປະຈຳຫ້ອງວ່າການສຳນັກງານນາຍົກລັດຖະມົນຕີ; ແຕ່ງຕັ້ງ ທ່ານ ມະໄລທອງ ກົມມະສິດ ປະທານອົງການກວດສອບແຫ່ງລັດ ໄປເປັນລັດຖະມົນຕີກະຊວງອຸດສາຫະກຳ ແລະ ການຄ້າ, ແຕ່ງຕັ້ງ ທ່ານ ບຸນເຫລືອ ສິນໄຊວໍລະວົງ ຮອງລັດຖະມົນກະຊວງການເງິນ ໄປເປັນຜູ້ວ່າການທະນາຄານແຫ່ງ ສປປ ລາວ ແລະ ແຕ່ງຕັ້ງ ທ່ານ ວຽງທະວີສອນ ເທບພະຈັນ ຮອງເຈົ້າແຂວງສະຫວັນນະເຂດ ເປັນປະທານກວດສອບແຫ່ງລັດ.

ການແຕ່ງຕັ້ງ ແລະ ຍົກຍ້າຍສັບຊ້ອນ ສະມາຊິກລັດຖະບານ ຖືວ່າເປັນຫຼັກການຂອງພັກເຮົາ ໂດຍສະເພາະແມ່ນ ການຈັດວາງພະນັກງານນໍາພາຄຸ້ມຄອງຂັ້ນຍຸດທະສາດ ຍິ່ງມີຄວາມສໍາຄັນຫຼາຍ ເພື່ອໃຫ້ແທດເໝາະກັບຄວາມຮູ້-ຄວາມສາມາດ ຂອງແຕ່ລະຄົນ ຈຶ່ງສາມາດຂັດທ້າຍເຮືອໃຫ້ໄປສູ່ຈຸດໝາຍໄດ້. ການແຕ່ງຕັ້ງ ແລະ ຍົກຍ້າຍ ສະມາຊິກລັດຖະບານໃນຄັ້ງນີ້ ສະມາຊິກສະພາແຫ່ງຊາດ ກໍໄດ້ຝາກຝັງໄວ້ກັບບັນດາສະຫາຍທີ່ຖືກແຕ່ງຕັ້ງ ຈະສຸມທຸກສະຕິປັນຍາ, ເຫື່ອແຮງ ແລະ ຄວາມຮູ້-ຄວາມສາມາດ ເຂົ້າໃນການປະຕິບັດໜ້າທີ່ ຂອງຕົນ ໃຫ້ດີທີ່ສຸດ ໂດຍສະເພາະແມ່ນການແກ້ໄຂບັນຫາທີ່ປະເທດພວກເຮົາພວມປະເຊີນຢູ່ທຸກມື້ນີ້.

ຂ່າວ ສອນທິ ວົງບຸນຄໍາ

ບົດຄວາມໜ້າສົນໃຈ

Leave a Reply

Your email address will not be published.