ຂ່າວເດັ່ນ-ປະເດັນດັງ

ສະພາທິດສະດີສູນກາງພັກ ຈັດສໍາມະນາ “ຊີວິດ ແລະ ພາລະກິດປະຕິວັດ ຂອງປະທານໄກສອນ ພົມວິຫານ’’

      ສະພາທິດສະດີສູນກາງພັກ, ຄະນະຮັບຜິດຊອບການຄົ້ນຄວ້າ ແນວຄິດໄກສອນ ພົມວິຫານ, ສະຖາບັນການເມືອງ ແລະ ການປົກຄອງແຫ່ງຊາດ ສົມທົບກັບແຂວງສະຫວັນນະເຂດ ຈັດກອງປະຊຸມສຳມະນາວິທະຍາສາດຂຶ້ນ ໃນຕອນເຊົ້າ ຂອງວັນທີ 01 ມີນາ 2022, ທີ່ຫ້ອງປະຊຸມ ຫໍວັດທະນະທຳໄກສອນ ພົມວິຫານ ແຂວງສະຫວັນນະເຂດ , ພາຍໃຕ້ຫົວຂໍ້: “ຊີວິດ ແລະພາລະກິດປະຕິວັດ ຂອງ ປະທານ ໄກສອນ ພົມວິຫານ ໄລຍະກ່ອນປີ 1955”. ໃຫ້ກຽດເປັນປະທານຊີ້ນຳກອງປະຊຸມ ໂດຍ ສະຫາຍ ປອ. ຄໍາພັນ ເຜີຍຍະວົງ ເລຂາທິການສູນກາງພັກ, ຫົວໜ້າຄະນະໂຄສະນາອົບຮົມສູນກາງພັກ, ປະທານສະພາທິດສະດີສູນກາງພັກ, ຫົວໜ້າຄະນະຮັບຜິດຊອບການຄົ້ນຄວ້າ ແນວຄິດໄກສອນ ພົມວິຫານ ແລະ ໃຫ້ກຽດເປັນຄະນະປະທານຮ່ວມ ມີ ສະຫາຍ ສົມສະຫວາດ ເລັ່ງສະຫວັດ ທີ່ປຶກສາສະພາທິດສະດີສູນກາງພັກ, ທີ່ປຶກສາຄະນະຮັບຜິດຊອບການຄົ້ນຄວ້າ ແນວຄິດໄກສອນ ພົມວິຫານ; ສະຫາຍ ສັນຕິພາບ ພົມວິຫານ ກໍາມະການສູນກາງພັກ, ເລຂາພັກແຂວງ, ເຈົ້າແຂວງສະຫວັນນະເຂດ; ສະຫາຍ ຮສ ພູວົງ ອຸ່ນຄຳແສນ, ກຳມະການສູນກາງພັກ, ຫົວໜ້າສະຖາບັນການເມືອງ ແລະ ການປົກຄອງແຫ່ງຊາດ, ຮອງປະທານສະພາທິດສະດີສູນກາງພັກ, ຜູ້ປະຈຳການຄະນະຮັບຜິດຊອບການຄົ້ນຄວ້າ ແນວຄິດ ໄກສອນ ພົມວິຫານ ແລະ ສະຫາຍ ປອ ສອນທະນູ ທຳມະວົງ ກໍາມະການສູນກາງພັກ, ຫົວໜ້າສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ,  ຮອງປະທານສະພາທິດສະດີສູນກາງພັກ. ນອກຈາກນີ້ ຍັງມີບັນດາສະຫາຍນັກວິທະຍາສາດ, ນັກຄົ້ນຄວ້າ ແລະ ພະນັກງານການນຳຫຼັກແຫຼ່ງອ້ອມຂ້າງແຂວງ, ຄູ-ອາຈານ ແລະ ນັກສຶກສາພາຍໃນໂຮງຮຽນການເມືອງ ແລະການປົກຄອງແຂວງສະຫວັນນະເຂດ ເຂົ້າຮ່ວມທັງໝົດ 170 ກວ່າຄົນ.

   

      ຈຸດປະສົງໃນການຈັດກອງປະຊຸມໃນຄັ້ງນີ້ ກໍແມ່ນເພື່ອສືບຕໍ່ຜັນຂະຫຍາຍມະຕິ ຂອງກົມການເມືອງສູນກາງພັກ ສະບັບເລກທີ 058/ກມສພ ລົງວັນທີ 13 ທັນວາ 2018 ວ່າດ້ວຍການຄົ້ນຄວ້າ ແນວຄິດໄກສອນ ພົມວິຫານ ແລະ ເປັນການສ້າງຂະບວນການສະເຫຼີມສະຫຼອງ ວັນເກີດ ຂອງ ປະທານ ໄກສອນ ພົມວິຫານ ຄົບຮອບ 101 ປີ ເເລະ ວັນສະຖາປະນາ ສປປ ລາວ ຄົບຮອບ 46 ປີ, ຂ່ຳນັບຮັບຕ້ອນ ວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 67 ປີ ແລະ ເປັນການຜັນຂະຫຍາຍເນື້ອໃນຈິດໃຈ ຂອງມະຕິກອງປະຊຸມໃຫຍ່ຄັ້ງທີ ຄັ້ງທີ XI ຂອງພັກປະຊາຊົນປະຕິວັດລາວ ໃຫ້ປະກົດຜົນເປັນຈິງ.

      ໃນກອງປະຊຸມອັນມີຄວາມໝາຍສຳຄັນນີ້ ສະຫາຍ ສັນຕິພາບ ພົມວິຫານ ຕາງໜ້າຄະນະພັກ ອຳນາດການປົກຄອງແຂວງ ກໍໄດ້ກ່າວຕ້ອນຮັບດ້ວຍຄວາມອົບອຸ່ນ ພ້ອມດ້ວຍຍົກໃຫ້ເຫັນຄວາມໝາຍຄວາມສຳຄັນ ຂອງກອງປະຊຸມ ໃນການຄົ້ນຄວ້າສະໜອງຂໍ້ມູນຕົວຈິງ ໃນການເຄື່ອນໄຫວພາລະກິດປະຕິວັດ ຂອງ ປະທານ ໄກສອນ ພົມວິຫານ ແລະ ລາຍງານໂດຍສັງເຂບສະພາບ ຂອງແຂວງສະຫວັນນະເຂດ.

      ກອງປະຊຸມໄດ້ຮັບຟັງການນຳສະເໜີ 05 ຫົວຂໍ້ຍ່ອຍ ເຊັ່ນ: ສະພາບແວດລ້ອມ ຂອງແຂວງສະຫວັນນະເຂດ ບ້ານເກີດ ຂອງປະທານ ໄກສອນ ພົມວິຫານ; ສະພາບຄອບຄົວ ຂອງປະທານ ໄກສອນ ພົມວິຫານ; ຊີວິດໄວໜຸ່ມ ຂອງ ປະທານ ໄກສອນ ພົມວິຫານ; ປະທານ ໄກສອນ ພົມວິຫານ ກ້າວເປັນນັກຕໍ່ສູ້ກູ້ຊາດ (1945-1948) ແລະ ພາລະກິດການນໍາພາຂະບວນການຕໍ່ສູ້ ຢູ່ລາວໃນໄລຍະ (1949-1955).  ໃນຕອນທ້າຍ ຂອງກອງປະຊຸມສຳມະນາ ໄດ້ຮັບຟັງການສະຫຼຸບລາຍງານຜົນ ຂອງກອງປະຊຸມໂດຍ ສະຫາຍ ປອ. ຄໍາພັນ ເຜີຍຍະວົງ ເລຂາທິການສູນກາງພັກ, ຫົວໜ້າຄະນະໂຄສະນາອົບຮົມສູນກາງພັກ, ປະທານສະພາທິດສະດີສູນກາງພັກ, ຫົວໜ້າຄະນະຮັບຜິດຊອບການຄົ້ນຄວ້າ ແນວຄິດໄກສອນ ພົມວິຫານ ເຊິ່ງໄດ້ຕີລາຜົນໄດ້ຮັບໃນເບື້ອງຕົ້ນ ທີ່ນັກວິທະຍາສາດໄດ້ຄົ້ນຄວ້າຢ່າງເລິກເຊິ່ງ ແລະຈະແຈ້ງກ່ຽວກັບຊີວິດ ແລະ ພາລະກິດປະຕິວັດ ຂອງ ປະທານ ໄກສອນ ພົມວິຫານ  ແລະໄດ້ເນັ້ນໜັກໃຫ້ພະນັກງານ, ສະມາຊິກພັກ, ປະຊາຊົນລາວບັນດາເຜົ່າສືບ​ຕໍ່​ຝຶກຝົນຫລໍ່ຫຼອມ ແລະ ຮ່ຳຮຽນເອົາແບບແຜນດຳລົງຊີວິດ ແລະ ພາລະກິດປະຕິວັດ ຂອງ ປະທານ ໄກສອນ ພົມວິຫານ ໃນ​ຕໍ່​ໜ້າ.

      ການຄົ້ນຄວ້າແນວຄິດໄກສອນ ພົມວິຫານ ນັບຕັ້ງແຕ່ກອງປະຊຸມໃຫຍ່ຄັ້ງທີ X ຂອງພັກເປັນຕົ້ນມາ ໄດ້ດຳເນີນໄປຢ່າງເປັນລະບົບ ພາຍໃຕ້ການຊີ້ນຳໂດຍກົງ ຂອງກົມການເມືອງສູນກາງພັກ, ຄະນະເລຂາທິການສູນກາງພັກ. ຕະຫຼອດໄລຍະ 3 ປີຜ່ານມາ ຄະນະຮັບຜິດຊອບການຄົ້ນຄວ້າ ແນວຄິດ ໄກສອນ ພົມວິຫານ ສາມາດດຳເນີນການຄົ້ນຄວ້າສຳເລັດທັງໝົດ 8 ຫົວຂໍ້ ລະດັບຊາດໃນຂົງເຂດການປ່ຽນແປງໃໝ່ ທາງດ້ານເສດຖະກິດ, ວຽກພັກ – ພະນັກງານ; ວຽກງານວັດທະນະທຳ, ສັງຄົມ; ວຽກງານຂົງເຂດອຳນາດລັດ, ວຽກງານປ້ອງກັນຊາດ, ວຽກງານປ້ອງກັນຄວາມສະຫງົບ ແລະ ການຕ່າງປະເທດ; ວຽກງານແນວໂຮມ ແລະ ອົງການຈັດຕັ້ງມະຫາຊົນ, ກ່ຽວກັບຄຸນສົມບັດສິນທຳປະຕິວັດ ຂອງ ປະທານ ໄກສອນ ພົມວິຫານ, ຄະນະຮັບຜິດຊອບຄົ້ນຄວ້າແນວຄິດ ໄກສອນ ພົມວິຫານ ຍັງໄດ້ດຳເນີນການເກັບກຳຂໍ້ມູນ ເພື່ອກະກຽມໃຫ້ແກ່ການສ້າງນິພົນຄົບຊຸດ ໄກສອນ ພົມວິຫານ, ເຊິ່ງມາ ຮອດປັດຈຸບັນ ສາມາດຮີບໂຮມເອກະສານຕ່າງໆ ໄດ້ 1.000 ກວ່າສະບັບ ແລະ ດຳເນີນການຕີພິມ ໄດ້ແລ້ວ 4.350 ກວ່າໜ້າ; ສຳລັບປີ 2021 ໄດ້ດຳເນີນການຄົ້ນຄວ້າຈຳນວນ 4 ຫົວຂໍ້ໃຫຍ່: ຊີວິດ ແລະ ພາລະກິດປະຕິວັດ ຂອງ ປະທານ ໄກສອນ ພົມວິຫານ ໄລຍະກ່ອນ ປີ 1955; ແນວຄິດ ໄກສອນ ພົມວິຫານ ກ່ຽວກັບການປະຕິວັດຊາດ ປະຊາທິປະໄຕກ້າວຂຶ້ນສູ່ສັງຄົມນິຍົມ; ແນວຄິດໄກສອນ ພົມວິຫານ ກ່ຽວກັບວຽກງານຊາວໜຸ່ມ ແລະ ແນວຄິດ ໄກສອນ ພົມວິຫານ ກ່ຽວກັບວຽກງານແມ່ຍິງ; ບັນດາຫົວຂໍ້ຕ່າງໆເຫຼົ່ານັ້ນ ຈະໄດ້ຕັ້ງສໍາມະນາຕາມດໍາດັບໃນໃນມໍ່ນີ້.

ຂ່າວ: ສອນທິ ວົງບຸນຄໍາ – ພາບ: ຄອນສະໄໝ

ບົດຄວາມໜ້າສົນໃຈ

Leave a Reply

Your email address will not be published.