ຂ່າວສານ

ນາຍົກລັດຖະມົນຕີ ສໍາເລັດການເຂົ້າຮ່ວມກອງປະຊຸມ ສຸດຍອດອາຊຽນ-ອາເມລິກາ ສະໄໝພິເສດ

     ໃນລະຫວ່າງວັນທີ 12-13 ພຶດສະພາ 2022 ຜ່ານມາ, ທ່ານ ພັນຄຳ ວິພາວັນ ນາຍົກລັດຖະມົນຕີ ແຫ່ງ ສປປ ລາວ ໄດ້ນຳພາຄະນະຜູ້ແທນ ເຂົ້າຮ່ວມກອງປະຊຸມສຸດຍອດອາຊຽນ-ສະຫະລັດ ສະໄໝພິເສດ ທີ່ນະຄອນຫຼວງ ວໍຊິງຕັນ ດີຊີ, ສະຫະລັດອາເມລິກາ ເພື່ອສະເຫຼີມສະຫຼອງການພົວພັນອາຊຽນ-ອາເມລິກາ ຄົບຮອບ 45 ປີ ນັບແຕ່ສອງຝ່າຍໄດ້ສ້າງຕັ້ງສາຍພົວພັນຄູ່ເຈລະຈານໍາກັນ ໃນປີ 1977.

ກອງປະຊຸມດໍາເນີນເປັນເວລາ 2 ວັນ,  ໃນມື້ທຳອິດ ທ່ານນາຍົກລັດຖະມົນຕີ ພັນຄຳ ວິພາວັນ ພ້ອມດ້ວຍຜູ້ນຳບັນດາປະເທດສະມາຊິກອາຊຽນ ໄດ້ພົບປະກັບປະທານສະພາຕໍ່າ ແລະ ບັນດາຜູ້ແທນສະມາຊິກສະພາ ສ.ອາເມລິກາ ແລະ ພາກທຸລະກິດຂອງ ສ.ອາເມລິກາ. ໂອກາດດັ່ງກ່າວ, ທ່ານ ພັນຄໍາ ວິພາວັນ ໄດ້ຕີລາຄາບົດບາດອັນສໍາຄັນຂອງສະມາຊິກສະພາ ສ.ອາເມລິກາ ໃນການຊຸກຍູ້ ແລະ ຮັບຮອງເອົາການຊ່ວຍເຫລືອໃຫ້ແກ່ ສປປ ລາວ ໃນຫຼາຍໆດ້ານ ເປັນຕົ້ນແມ່ນດ້ານສາທາລະນະສຸກ, ການເກັບກູ້ລະເບີດທີ່ບໍ່ທັນແຕກ ແລະ ອື່ນໆ. ໃນຕອນແລງວັນດຽວກັນ, ບັນດາຜູ້ນຳອາຊຽນ ກໍໄດ້ເຂົ້າຮ່ວມງານລ້ຽງຕ້ອນຮັບ ເຊິ່ງຈັດໂດຍ ທ່ານ ໂຈ ໄບເດັນ ປະທານາທິບໍດີ ແຫ່ງ ສະຫະລັດອາເມລິກາ ຢູ່ທີ່ທຳນຽບຂາວ ​ເຊິ່ງບັນດາຜູ້ນຳອາຊຽນ ແລະ ອາເມລິກາ ກໍໄດ້ມີໂອກາດພົບປະສັງສັນ ແລະ ແລກປ່ຽນຄວາມຄິດເຫັນກ່ຽວກັບການຮ່ວມມືອາຊຽນ-ອາເມລິກາ ໃນໄລຍະຜ່ານມາ ແລະ ທິດທາງການພົວພັນໃນອະນາຄົດ.

ໃນມື້ທີສອງວັນທີ 13 ພຶດສະພາ 2022,ທ່ານ ພັນຄຳ ວິພາວັນ ນາຍົກລັດຖະມົນຕີແຫ່ງ ສປປ ລາວ ພ້ອມດ້ວຍຄະນະ ແລະຜູ້ນຳບັນດາປະເທດສະມາຊິກອາຊຽນໄດ້ພົບປະປຶກສາຫາລືກັບ ທ່ານ ໂຈ ໄບເດັນ ປະທານາທິບໍດີ ແລະ ທ່ານ ນາງ ຄາມາລາ ແຮຣິດສ໌ ຮອງປະທານາທິບໍດີ ແຫ່ງ ສະຫະລັດ ອາເມລິກາ ແລະ ບັນດາລັດຖະມົນຕີ ຂະແໜງການທີ່ກ່ຽວຂ້ອງ ຂອງ ສ.ອາເມລິກາ. ໃນການພົບປະ ບັນດາທ່ານຜູ້ນໍາ ໄດ້ພ້ອມກັນແລກປ່ຽນທັດສະນະກ່ຽວກັບບັນຫາພາກພື້ນ ແລະ ສາກົນທີ່ພົ້ນເດັ່ນ, ຂົງເຂດສາທາລະນະສຸກ, ການປ່ຽນແປງສະພາບດິນຟ້າອາກາດ, ການຫັນໄປສູ່ພະລັງງານສະອາດ ແລະ ການພັດທະນາພື້ນຖານ ໂຄງລ່າງແບບຍືນຍົງ ເຊິ່ງໃນຂົງເຂດສາທາລະນະສຸກ, ສອງຝ່າຍເຫັນດີຮັດ     ແໜ້ນການຮ່ວມມື ເພື່ອຄວບຄຸມ ແລະ ສະກັດກັ້ນການແພ່ລະບາດ ຂອງພະຍາດໂຄວິດ-19 ກໍຄື ພະຍາດລະບາດ ທີ່ອາດຈະເກີດຂຶ້ນໃໝ່ ໃນອະນາຄົດ; ພ້ອມນີ້, ສ.ອາເມລິກາ ກໍໄດ້ຢຶນຢັນຈະສືບຕໍ່ຊ່ວຍເຫຼືອອາຊຽນ ເພື່ອສ້າງຄວາມເຂັ້ມແຂງ ດ້ານສາທາລະນະສຸກ ເພື່ອຟື້ນຕົວທາງດ້ານເສດຖະກິດຈາກການແພ່ລະບາດ ຂອງພະຍາດໂຄວິດ-19 ແລະ ສົ່ງເສີມຄວາມໝັ້ນຄົງດ້ານສຸຂະພາບ. ໃນໂອກາດເຂົ້າຮ່ວມກອງປະຊຸມໃນຄັ້ງນີ້ ທ່ານນາຍົກລັດຖະມົນຕີ ພັນຄຳ ວິພາວັນ ໄດ້ຖືໂອກາດນີ້ ສະແດງຄວາມຂອບໃຈ ຕໍ່ລັດຖະບານ ອາເມລິກາ ທີ່ໄດ້ໃຫ້ການຊ່ວຍເຫລືອທັງວັກຊິນ ແລະ ອຸປະກອນການແພດ ໃຫ້ແກ່ບັນດາປະເທດ ອາຊຽນ ລວມທັງ ສປປ ລາວ ພ້ອມທັງສະເໜີໃຫ້ອາຊຽນ ແລະ ອາເມລິກາ ເພີ່ມທະວີການຮ່ວມມື ໃນການຄົ້ນຄວ້າ ແລະ ຜະລິດວັກຊິນ , ຢາປິ່ນປົວພະຍາດໂຄວິດ-19 ເພື່ອຮັບປະກັນການສະໜອງວັກຊິນ ຕ້ານໂຄວິດ-19 ຢູ່ພາກພື້ນອາຊຽນໃຫ້ທົ່ວເຖິງ, ພຽງພໍ ແລະ ສະເໝີພາບ; ໃນດ້ານການປ່ຽນແປງສະພາບດິນຟ້າອາກາດ, ອາຊຽນ ແລະ ສ.ອາເມລິກາ ໄດ້ຢໍ້າຄືນຄວາມໝາຍໝັ້ນ ຕໍ່ການປະຕິບັດພັນທະຂອງຕົນ ພາຍໃຕ້ສົນທິສັນຍາ ປາຣີ ວ່າດ້ວຍການປ່ຽນແປງ ສະພາບດິນຟ້າອາກາດ, ສ່ວນການຫັນປ່ຽນໄປສູ່ພະລັງງານສະອາດ ແລະ ຄວາມເຂັ້ມແຂງດ້ານພະລັງງານສອງຝ່າຍເຫັນດີຮ່ວມມືກັນ ເພື່ອສົ່ງເສີມການນຳໃຊ້ພະລັງງານທົດແທນ ໂດຍການມີສ່ວນຮ່ວມຂອງພາກລັດ-ພາກເອກະຊົນ, ການນຳໃຊ້ເຕັກໂນໂລຊີ ທັນສະໄໝ ແລະ ການສົ່ງເສີມຕາໜ່າງໄຟຟ້າອາຊຽນ; ສໍາລັບການຮ່ວມມືດ້ານພື້ນຖານໂຄງລ່າງ, ສອງຝ່າຍເຫັນດີ ເພີ່ມທະວີການເຊື່ອມຈອດໃນທຸກດ້ານ:ທາງບົກ, ທາງນໍ້າ ແລະ ທາງອາກາດ.

ໃນກອງປະຊຸມສຸດຍອດຄັ້ງນີ້, ຜູ້ນຳອາຊຽນ ແລະ ສ.ອາເມລິກາ ໄດ້ເຫັນດີໃນດ້ານຫຼັກການຍົກລະດັບການພົວພັນອາຊຽນ-ອາເມລິກາ ຂຶ້ນເປັນຄູ່ຮ່ວມຍຸດທະສາດຮອບດ້ານເຊິ່ງຈະຮັບຮອງເອົາຢ່າງເປັນທາງການ ໃນກອງປະຊຸມສຸດຍອດອາຊຽນ-ອາເມລິກາ ຄັ້ງທີ 10 ທີ່ຈະຈັດຂຶ້ນໃນເດືອນພະຈິກ 2022 ແລະ ກໍໄດ້ຮັບຮອງເອົາຖະແຫຼງການວິໄສທັດຮ່ວມອາຊຽນ-ອາເມລິກາ ເພື່ອເປັນພື້ນຖານໃຫ້ແກ່ການຮ່ວມມືໃນຕໍ່ໜ້າ; ພ້ອມດຽວກັນນີ້ ລັດຖະບານ ສ.ອາເມລິກາ ຍັງໄດ້ຕົກລົງໃຫ້ການຊ່ວຍເຫຼືອ ອາຊຽນ ໃຫ້ວົງເງິນ 150 ລ້ານ ໂດລາສະຫະລັດ ອີກດ້ວຍ.

ບົດຄວາມໜ້າສົນໃຈ

Leave a Reply

Your email address will not be published.