ວຽກງານໂຄສະນາອົບຮົມ

ຍົກລະດັບຄວາມຮູ້ພື້ນຖານວຽກງານໂຄສະນາປາຖະກະຖາ ໃຫ້ສະມາຊິກຊາວໜຸ່ມ ຄອສພ

ໂດຍປະຕິບັດຕາມແຜນການ ກໍ່ສ້າງພະນັກງານ ໜຸ່ມ ໃຫ້ມີຄຸນນະພາບ ໂດຍຕິດພັນກັບການ ກໍ່ສ້າງພະນັກງານສືບທອດ ທີ່ມີຄຸນະພາບ ຂອງຄະນະໂຄສະນາອົບຮົມສູນກາງພັກ; ດັ່ງນັ້ນໃນລະຫວ່າງວັນທີ 2-7 ມີຖຸນາ 2022 ຄະນະບໍລິຫານງານຊາວໜຸ່ມຄະນະໂຄສະນາອົບຮົມສູນກາງພັກຈຶ່ງໄດ້ສົມທົບກັບ ກົມໂຄສະນາ ຂອງຄະນະໂຄສະນາອົບຮົມສູນກາງພັກ ຮ່ວມກັນຈັດຊຸດຝຶກອົບຮົມຄວາມຮູ້ພື້ນຖານວຽກງານໂຄສະນາ-ປາຖະກະຖາ ໃຫ້ສະມາຊິກຊາວໜຸ່ມ ຄອສພ ແລະ ໄດ້ຈັດຂຶ້ນຢູ່ທີ່ຫ້ອງປະຊຸມຊັ້ນ 5 ຂອງຄະນະໂຄສະນາອົບຮົມສູນກາງພັກ,ໂດຍມີຜູ້ເຂົ້າຮ່ວມທັງໝົດ 30 ສະຫາຍ, ຍິງ 19 ສະຫາຍ,ໃນນີ້ ມາຈາກສູນກາງຊາວໜຸ່ມປະຊາຊົນປະຕິວັດລາວ 5 ສະຫາຍ, ຍິງ 3 ສະຫາຍ.

ຈຸດປະສົງ ຂອງການຈັດຝຶກອົບຮົມໃນຄັ້ງນີ້ ແມ່ນເພື່ອເປັນການຍົກລະດັບຄວາມຮູ້-ຄວາມສາມາດ ທາງດ້ານວິຊາສະເພາະ ໃຫ້ແກ່ພະນັກງານໜຸ່ມນ້ອຍ ໂດຍສະເພາະແມ່ນ ສະມາຊິກຊາວໜຸ່ມ ຄອສພ ເພື່ອແນໃສ່ກໍ່ສ້າງພະນັກງານໜຸ່ມ ໃຫ້ມີຄວາມສາມດໃນວຽກງານໂຄສະນາ-ປາຖະກະຖາ ທັງເປັນການສ້າງພະນັກງານສືບທອດ ທີ່ມີຄຸນນະພາບ. ດັ່ງນັ້ນ ຄະນະບໍລິຫານງານຊາວໜຸ່ມ ຄອສພ ຈຶ່ງໄດ້ສົມທົບກັບກົມໂຄສະນາ ພ້ອມກັນຈັດຊຸດຝຶກອົບຮົມ ດັ່ງກ່າວນີ້ຂຶ້ນ; ເນື້ອ ຂອງການຝຶກອົບຮົມ ປະກອບມີ 6 ບົດຄື: ບົດທີ1: ບັນຫາພື້ນຖານວຽກງານໂຄສະນາ; ບົດທີ2: ວິທີຂຽນເອກະສານຕ່າງໆ; ບົດທີ3: ຄຸນລັກສະນະ ແລະ ສິລະປະການເວົ້າ; ບົດທີ4: ວຽກງານໂຄສະນາເຄື່ອນທີ່; ບົດທີ5: ວຽກງານໂຄສະນາຜ່ານສື່ ແລະ ບົດທີ6: ບັນດານິຕິກຳ ແລະ ບາງບົດຮຽນໃນການເຄື່ອນໄຫວວຽກງານໂຄສະນາ ແລະ ນັກວິທະຍາກອນ ແມ່ນມາຈາກ ຄອສພ . ສຳລັບຮູບແບບການຝຶກອົບຮົມ ແມ່ນນັກນັກວິທະຍາກອນ ສະເໜີທິດສະດີ ແລະ ເຕັກນິກຕ່າງໆ ຈາກນັ້ນ ນັກຝຶກອົບຮົມ ທົດລອງປະຕິບັດຕົວຈິງ. ຜ່ານການຝຶກອົບຮົມໃຊ້ເວລາພຽງ 5 ວັນ ເຫັນວ່າການຝຶກອົບຮົມໃນຄັ້ງນີ້ ມີບັນຍາກາດ ແລະ ນັກຝຶກອົບຮົມກໍ່ໄດ້ຮັບບົດຮຽນ, ຄວາມຮູ້ໃໝ່ ໃນວຽກງານໂຄສະນາ-ປາຖະກະຖາ ສາມາດນຳໄປຈັດຕັ້ງປະຕິບັດ ໃນວຽກງານວິຊາສະເພາະ ຂອງຕົນ.

ໃນພິທີປິດຊຸດອົບຮົມ ທ່ານ ນາງ ວິລະວອນ ພັນທະວົງ ຄະນະປະຈໍາພັກ, ຮອງຫົວໜ້າ ຄອສພ, ຜູ້ຊີ້ນໍາອົງການຈັດຕັ້ງມະຫາຊົນ ກໍ່ໄດ້ໃຫ້ກຽດເຂົ້າຮ່ວມພ້ອມທັງມອບໃບຢັ້ງຢືນ ແລະ ໃຫ້ກຽດໂອ້ລົມຕໍ່ນັກຝຶກອົບຮົມຕື່ມອີກ ເຊິ່ງກອ່ນອື່ນໝົດ ທ່ານໄດ້ສະແດງຄວາມຍ້ອງຍໍຊົມເຊີຍ ຕໍ່ຄະນະຮັບຜິດຊອບ ກໍຄື ນັກວິທະຍາກອນ ທີ່ໄດ້ທຸ້ມເທສະຕິປັນຍາຖ່າຍທອດບົດຮຽນ ແລະ ສົ່ງຄວາມຮູ້ຢ່າງສ້າງສັນ ເຮັດໃຫ້ຜູ້ເຂົ້າຮ່ວມຝຶກອົບຮົມໃນຄັ້ງນີ້ ມີຄວາມຮັບຮູ້, ເຂົ້າໃຈ ກ່ຽວກັບວຽກງານໂຄສະນາ-ປາຖະກະຖາຫຼາຍຂຶ້ນ ພ້ອມດຽວກັນນີ້ທ່ານ ຍັງໄດ້ຮຽກຮ້ອງໃຫ້ນັກສຳມະນາກອນ ຈົ່ງນຳເອົາຄວາມຮູ້ໄປໝູນໃຊ້ເຂົ້າໃນວຽກງານຕົວຈິງ ຂອງຕົນໃຫ້ເກີດດອກອອກຜົນຫຼາຍທີ່ສຸດ.


ຂ່າວ: ພັດ ລໍວັນໄຊ – ພາບ ຫົງລືດີ

ບົດຄວາມໜ້າສົນໃຈ

Leave a Reply

Your email address will not be published.