ຂ່າວເດັ່ນ-ປະເດັນດັງ

ຄອສພ ຍ້ອງຍໍຜົນງານປະຈໍາປີ 2021

      ຕອນບ່າຍ ວັນທີ 5 ພຶດສະພາ 2022 ຄະນະໂຄສະນາອົບຮົມສູນກາງພັກ (ຄອສພ) ໄດ້ຈັດພິທີມອບໃບຢັ້ງຢືນໜ່ວຍພັກປອດໃສ, ເຂັ້ມແຂງ, ໜັກແໜ້ນ ແລະ ມອບໃບຍ້ອງຍໍຜົນງານປະຈໍາປີ 2021 ໃຫ້ແກ່ພະນັກງານລັດຖະກອນທົ່ວ ຄອສພ; ພິທີດັ່ງກ່າວເປັນກຽດເຂົ້າຮ່ວມຂອງ ທ່ານ ລາວປາວຊົ່ງ ນະວົງໄຊ ກໍາມະການສູນກາງພັກ, ຮອງເລຂາຄະນະພັກ, ຮອງຫົວໜ້າຄະນະໂຄສະນາອົບຮົມສູນກາງພັກ. ມີຄະນະພັກ ແລະ ພະນັກງານລັດຖະກອນເຂົ້າຮ່ວມ.

 ໃນພິທີ ທ່ານ ລາວປາວຊົ່ງ ນະວົງໄຊ ໄດ້ທົບທວນຄືນດຳລັດ ວ່າດ້ວຍຈັນຍາບັນ ຂອງພະນັກງານ, ລັດຖະກອນ ສະບັບເລກທີ 184/ບລ, ລົງວັນທີ 26 ມີຖຸນາ 2019, ເຊິ່ງດໍາລັດລະບັບດັ່ງກ່າວມີຄວາມສໍາຄັນຫຼາຍຕໍ່ການຝຶກຝົນຫຼໍ່ຫຼອມຄຸນທາດການເມືອງ, ຄຸນສົມບັດສິນທໍາປະຕິວັດ ຂອງພະນັກງານ ເພື່ອກໍ່ສ້າງພະນັກງານໃຫ້ມີຄວາມຮັບຜິດຊອບສູງຕໍ່ໜ້າທີ່ການເມືອງຂອງຕົນ, ມີສະຕິເຄົາລົບ ແລະ ປະຕິບັດລະບຽບ, ກົດໝາຍຢ່າງເຂັ້ມງວດ, ເຮັດສໍາເລັດໜ້າທີ່ພັກ ແລະ ປະຊາຊົນມອບໝາຍໃຫ້. ໃນໂອກາດດັ່ງກ່າວ ທ່ານ ລາວປາວຊົ່ງ ນະວົງໄຊ ຍັງໄດ້ເນັ້ນໜັກໃຫ້ພະນັກງານ, ລັດຖະກອນ ພາຍໃນ ຄອສພ ຕ້ອງຖືສໍາຄັນ ແລະ ເອົາໃຈໃສ່ຝຶກຝົນຫຼໍ່ຫຼອມຕົນເອງໃຫ້ກາຍເປັນພະນັກງານທີ່ດີ, ມີຄວາມຊື່ສັດບໍລິສຸດ, ບໍ່ສະແຫວ່ງຫາຜົນປະໂຫຍດທີ່ບໍ່ຖືກຕ້ອງ, ຕ້ອງເຄົາລົບ ແລະ ມີສະຕິຕໍ່ການຈັດຕັ້ງ, ມີຄວາມຮັບຜິດຊອບສູງຕໍ່ໜ້າທີ່ວຽກງານທີ່ໄດ້ຮັບມອບໝາຍ, ປະຕິບັດລະບຽບວິໃນຢ່າງເຂັ້ມງວດ ແລະ ພ້ອມກັນຂະຫຍາຍດ້ານຕ້ງໜ້າ, ແກ້ໄຂຂໍ້ບົກຜ່ອງໃນປີຜ່ານມາ ເພື່ອຍາດໃຫ້ໄດ້ຜົນງານໃຫຍ່ຫຼວງກວ່າເກົ່າ ໃນປີ 2022.

     ຫຼັງຈາກນັ້ນ ທ່ານ ອານົງສັກ ອິນທະວົງ ຄະນະພັກ, ຫົວໜ້າກົມຈັດຕັ້ງພະນັກງານ ກໍໄດ້ຂຶ້ນຜ່ານຄໍາແນະນໍາໂດຍຫຍໍ້ ກ່ຽວກັບການຈັດຕັ້ງປະຕິບັດດໍາລັດວ່າດ້ວຍຈັນຍາບັນ ຂອງພະນັກງານ-ລັດຖະກອນ ແລະ ຜ່ານບົດສະຫຼຸບກ່ຽວກັບວຽກງານການປະເມີນກວດກາໜ່ວຍພັກປອດໃສ, ເຂັ້ມແຂງ, ໜັກແໜ້ນ ແລະ ບົດສະຫຼຸບປະເມີນວຽກງານພະນັກງານ-ລັດຖະກອນປະຈໍາປີ 2021; ພ້ອມທັງຜ່ານມະຕິຕົກລົງ ຂອງຄະນະພັກ ຄອສພ ວ່າດ້ວຍການຢັ້ງຢືນໜ່ວຍພັກປອດໃສ, ເຂັ້ມແຂງ, ໜັກແໜ້ນ ແລະ ຂໍ້ຕົກລົງວ່າດ້ວຍການຍ້ອງຍໍຜົນງານ ຂອງພະນັກງານ ປະຈໍາປີ 2021 ຕອນທ້າຍຂອງກອງປະຊຸມ ທ່ານ ລາວປາວຊົ່ງ ນະວົງໄຊ ກໍາມະການສູນກາງພັກ, ຮອງຫົວໜ້າ ຄອສພ ແລະ ທ່ານ ນາງ ວິລະວອນ ພັນທະວົງ ຄະນະປະຈໍາພັກ, ຮອງຫົວໜ້າ ຄອສພ ໄດ້ໃຫ້ກຽດມອບໃບຢັ້ງຢືນ ໜ່ວຍພັກປອດໃສ, ເຂັ້ມແຂງ, ໜັກແໜ້ນໃຫ້ 8 ໜ່ວຍພັກ ແລະ ມອບໃບຍ້ອງຍໍໃຫ້ແກ່ພະນັກງານ ຜູ້ທີ່ມີຜົນງານດີເດັ່ນ ປະຈໍາປີ 2021 ອີກດ້ວຍ.

ຂ່າວ-ພາບ: ສອນທິ ວົງບຸນຄໍາ

ບົດຄວາມໜ້າສົນໃຈ

Leave a Reply

Your email address will not be published.