ຂ່າວເດັ່ນ-ປະເດັນດັງ

ຄອສພ ຈັດປະຖະກະຖາກ່ຽວກັບສະຖານະການທີ່ພົ້ນເດັ່ນ ຢູ່ປະເທດເຮົາໃນປັດຈຸບັນ

ໃນຕອນເຊົ້າຂອງວັນທີ 27 ພຶດສະພາ 2022, ທີ່ຄະນະໂຄສະນາອົບຮົມສູນກາງພັກ ໄດ້ຈັດປະຖະກະຖາ ໃນຫົວຂໍ້: ການຄຸ້ມຄອງດ້ານການເງິນ-ເງິນຕາ ແລະ ການຄຸ້ມຄອງລາຄາສິນຄ້າອຸປະໂພກ-ບໍລິໂພກ ຂຶ້ນເຊິ່ງຖືວ່າເປັນສະຖານະການທີ່ພົ້ນເດັ່ນຢູ່ປະເທດເຮົາໃນປັດຈຸບັນ; ໂດຍໃຫ້ກຽດປະຖະກະຖາ ຂອງ ທ່ານ ສອນໄຊ ສິດພະໄຊ, ຜູ້ວ່າການທະນາຄານ ແຫ່ງ ສປປ ລາວ ແລະ ທ່ານ ນາງ ຈັນສຸກ ແສງພະຈັນ, ຮອງລັດຖະມົນຕີກະຊວງອຸດສາຫະກໍາ ແລະ ການຄ້າ, ເຂົ້າຮ່ວມພິທີມີທ່ານ ນາງ ວິລະວອນ ພັນທະວົງ, ຮອງຫົວໜ້າຄະນະໂຄສະນາອົບຮົມສູນກາງພັກ, ມີຜູ້ຕາງໜ້າຄະນະພັກກະຊວງ-ອົງການ, ສູນກາງແນວລາວສ້າງຊາດ, ສະຫະພັນນັກຮົບເກົ່າ, ອົງການຈັດຕັ້ງມະຫາຊົນຂັ້ນສູນກາງ, ຕາງໜ້າບັນດາສື່ມວນຊົນອ້ອມຂ້າງສູນກາງ ແລະ ພະນັກງານຫຼັກແຫຼ່ງ ຄະນະໂຄສະນາອົບຮົມສູນກາງພັກ ເຂົ້າຮ່ວມຢ່າງພ້ອມພຽງ.

ຈຸດປະສົງການປະຖະກະຖາໃນຄັ້ງນີ້ ກໍເພື່ອເປັນການໂຄສະນາ, ສຶກສາອົບຮົມການເມືອງ-ແນວຄິດຕໍ່ສະພາບການຄຸ້ມຄອງດ້ານການເງິນ-ເງິນຕາ ແລະ ການຄຸ້ມຄອງລາຄາສິນຄ້າອຸປະໂພກ-ບໍລິໂພກ ກໍຄືສະພາບອັດຕາແລກປ່ຽນເງິນຕາຕ່າງປະເທດ (ໄພເງິນເຟີ້) ຕະຫຼອດຮອດລາຄາຊື້-ຂາຍທອງຄໍາ ແລະ ນໍ້າມັນເຊື້ອໄຟ ທີ່ມີການປັບສູງຂຶ້ນນັບມື້ ເຊິ່ງໄດ້ສົ່ງຜົນກະທົບຕໍ່ຊີວິດການເປັນຢູ່ ຂອງພໍ່ແມ່ປະຊາຊົນຢ່າງໜັກໜ່ວງ, ເຮັດໃຫ້ຕົ້ນທຶນການຜະລິດ ແລະ ຄ່າຂົນສົ່ງສູງຂຶ້ນ, ຄ່າຄອງຊີບກໍສູງຂຶ້ນເປັນເງົາຕາມໂຕ.

ໂອກາດນີ້, ທ່ານຜູ້ວ່າການທະນາຄານ ແຫ່ງ ສປປ ລາວ ແລະ ທ່ານຮອງລັດຖະມົນຕີກະຊວງອຸດສາຫະກໍາ ແລະ ການຄ້າ ກໍໄດ້ຊີ້ແຈງເຖິງບັນຫາຄວາມຫຍຸ້ງຍາກ ແລະ ສະຖານະການທີ່ພົ້ນເດັ່ນ ຢູ່ປະເທດເຮົາໃນປັດຈຸບັນພ້ອມທັງຍົກໃຫ້ເຫັນສາເຫດຕົ້ນຕໍ ຂອງບັນຫາ ແລະ ຕອບແກ້ຄໍາຖາມຂອງສື່ມວນຊົນ ກໍຄື ຜູ້ທີ່ເຂົ້າຮ່ວມຕັ້ງຂຶ້ນຕໍ່ສະພາບການຄຸ້ມຄອງດ້ານການເງິນ-ເງິນຕາ ແລະ ການຄຸ້ມຄອງລາຄາສິນຄ້າອຸປະໂພກ-ບໍລິໂພກ. ໃນຕອນທ້າຍ ທ່ານ ສອນໄຊສິດພະໄຊ ຍັງໄດ້ຮຽກຮ້ອງໃຫ້ຜູ້ເຂົ້າຮ່ວມທັງໝົດ ກໍຄື ປະຊາຊົນລາວ ທົ່ວປະເທດ ຈົ່ງເຊື່ອໝັ້ນວ່າ ໂດຍພາຍໃຕ້ການຊີ້ນໍາ-ນໍາພາຂອງພັກ ກໍຄືການຄຸ້ມຄອງຂອງລັດຖະບານ ຈະສາມາດແກ້ໄຂຄວາມຫຍຸ້ງຍາກດັ່ງກ່າວນີ້ໄດ້ໂດຍໄວດ້ວຍແນວທາງທີ່ຖືກຕ້ອງ ແລະ ສອດຄ່ອງພ້ອມທັງຮຽກຮ້ອງໃຫ້ໝົດທຸກຄົນ ຈົ່ງອົດທົນຜ່ານຜ່າຄວາມຫຍຸ້ງຍາກດັ່ງກ່າວນີ້ ໄປດ້ວຍກັນໃຫ້ໄດ້.

ພາບ: ຫົງລຶດີ, ຂ່າວ: ມີໄຊ

ບົດຄວາມໜ້າສົນໃຈ

Leave a Reply

Your email address will not be published.