ຂ່າວເດັ່ນ-ປະເດັນດັງ

ຄອສພ ຈັດຕັ້ງປະຖະກະຖາ ວັນກຳມະກອນສາກົນ ຄົບຮອບ 136 ປີ

     ໃນຕອນເຊົ້າ ຂອງວັນທີ 6/5/2022 ທີ່ຜ່ານມາ ຢູ່ທີ່ຫ້ອງປະຊຸມໃຫຍ່ຄະນະໂຄສະນາອົບຮົມສູນກາງພັກ ຄອສພ (ຫຼັກ 6 ) ໄດ້ຈັດພິທີປະຖະກະຖາ ວັນກຳມະກອນສາກົນ ຄົບຮອບ 136 ປີ ( 1/5/1886 – 1/5/2022 ) ແລະ ສະຫຼຸບຜົນງານການເຄື່ອນໄຫວວຽກງານກໍາມະບານ ຄອສພ ປະຈໍາປີ  2021, ເປັນກຽດເຂົ້າຮ່ວມ ແລະ ເປັນປະທານ ຂອງ ທ່ານ ນາງ ວິລະວອນ ພັນທະວົງ ຄະນະປະຈຳພັກ, ຮອງຫົວໜ້າ ຄອສພ, ຜູ້ຊີ້ນຳວຽກງານອົງການຈັດຕັ້ງມະຫາຊົນ, ມີຄະນະພັກ, ຫົວໜ້າກົມ, ຮອງກົມ ແລະ ສະມາຊິກພັນກຳມະບານທົ່ວ ຄອສພ ເຂົ້າຮ່ວມ.

     ໃນພິທີ ທ່ານ ວັນຕຸລາ ຣັກນຸດ, ຄະນະພັກ, ປະທານສະຫະພັນກຳມະບານ ຄະນະໂຄສະນາອົບຮົມສູນກາງພັກ, ຫົວໜ້າກົມຂໍ້ມູນ-ຂ່າວສານ ໄດ້ຂຶ້ນຜ່ານບົດສະຫຼຸບຜົນງານການເຄື່ອນໄຫວວຽກງານກຳມະບານ ໃນໄລຍະ 1 ປີ ຜ່ານມາ (2021) ໂດຍສະເພາະແມ່ນ ຜົນສໍາເລັດຂອງການຈັດຕັ້ງປະຕິບັດເນື້ອໃນຂໍ້ແຂ່ງຂັນ 5 ເປັນເຈົ້າ ແລະ ພ້ອມທັງສະເໜີທິດທາງແຜນການເຄື່ອນໄຫວວຽກງານກໍາມະບານ ໃນປີ 2022, ຫຼັງຈາກນັ້ນ ກໍໄດ້ມີພິທີມອບໃບຢັ້ງຢືນ 5 ເປັນເຈົ້າປະຈໍາປີ 2021 ໃຫ້ແກ່ສະຫະພັນກໍາບານ ຄອສພ.

      ຫຼັງຈາກນັ້ນ, ສະມາຊິກກໍາມະບານ ຍັງໄດ້ຮັບຟັງປະຖະກະຖາກ່ຽວກັບວັນກໍາມະກອນສາກົນ ຄົບຮອບ 136 ປີ,ໃຫ້ກຽດປະຖະກະຖາໂດຍ ທ່ານ ນາງ ວິລະວອນ ພັນທະວົງ ຄະນະປະຈຳພັກ, ຮອງຫົວໜ້າ ຄອສພ, ຜູ້ຊີ້ນຳວຽກງານອົງການຈັດຕັ້ງມະຫາຊົນ ຄອສພ, ເຊິ່ງທ່ານໄດ້ຍົກໃຫ້ເຫັນຕົ້ນກໍາເນີດ ແລະ ຄວາມເປັນມາ ຂອງວັນກໍາມະກອນສາກົນໂດຍສະເພາະແມ່ນຂະບວນການເຄື່ອນໄຫວ ຂອງກໍາມະກອນສາກົນ ທີ່ຕໍ່ສູ້ກັບນາຍທຶນເພື່ອໃຫ້ຫຼຸດຊົ່ວໂມງເຮັດວຽກຈາກມື້ໜຶ່ງ 14-15 ຊົ່ວໂມງໃນເມື່ອກ່ອນໃຫ້ຍັງເຫຼືອ 8 ຊົ່ວໂມງຕໍ່ມື້ຈົນເທົ່າປັດຈຸບັນ, ນອກຈາກນັ້ນ ທ່ານຍັງໄດ້ຍົກໃຫ້ເຫັນບົດບາດ ຂອງອົງການກໍາມະບານລາວ ໃນຂະບວນການຕໍ່ສູ້ກູ້ຊາດ ກໍຄື ພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ, ການປົກປ້ອງສິດ ແລະ ຜົນປະໂຫຍດຊາວຜູ້ອອກແຮງງານ ໃຫ້ສົມຄູ່ກັບການຂະຫຍາຍຕົວ ຂອງເສດຖະກິດ-ສັງຄົມ ໃນແຕ່ລະໄລຍະ ພ້ອມນັ້ນ ທ່ານຍັງໄດ້ຮຽກຮ້ອງໃຫ້ກໍາມະກອນ ກໍຄື ກໍາມະບານລາວໂດຍສະເພາະແມ່ນ ກໍາມະບານ ຄອສພ ໃຫ້ເສີມຂະຫຍາຍມູນເຊື້ອອັນດີງາມ ຂອງກໍາມະກອນເຂົ້າໃນການດໍາລົງຊີວິດ ຂອງຕົນ ໃຫ້ແທດເໝາະກັບເງື່ອນໄຂໃໝ່, ຕັ້ງໜ້າຝຶກຝົນຫຼໍ່ຫຼອມຕົນເອງ, ຢຶດໝັ້ນທັດສະນະຊົນຊັ້ນກໍາມະກອນຢ່າງຈະແຈ້ງ ແລະ ເສີມຂະຫຍາຍມູນເຊື້ອອັນດີງາມ ຂອງກໍາມະກອນ ເຂົ້າໃນການປະຕິບັດໜ້າທີ່ວຽກງານ ທີ່ໄດ້ຮັບການມອບໝາຍໃຫ້ມີຜົນສໍາເລັດ.

 ພາບ ບຸນປະຄອຍ-ຂ່າວ ພັດ ລໍວັນໄຊ

ບົດຄວາມໜ້າສົນໃຈ

Leave a Reply

Your email address will not be published.