ຂ່າວເດັ່ນ-ປະເດັນດັງ ບັນຫາສິ່ງຫຍໍ້ທໍ້ ແລະ ບາງທັດສະນະ

ຄວາມເປັນຈິງ ຂອງໂຄງການເສັ້ນທາງລົດໄຟ ລາວ-ຈີນ ທີ່ບໍ່ແມ່ນຄືຫຼາຍຄົນຄິດ

      ພາຍຫຼັງມີຂ່າວກ່ຽວກັບຄວາມສໍາເລັດ ໃນການກໍ່ສ້າງທາງລົດໄຟລາວ-ຈີນ ແລະ ຂະບວນລົດໄຟ “ລ້ານຊ້າງ”​ ຂະບວນທໍາອິດ ໃນປະຫວັດສາດ ໄດ້ມາເຖິງນະຄອນຫຼວງວຽງຈັນ ໃນວັນທີ 16 ຕຸລາ 2021 ທີ່ຜ່ານມາ ເຮັດໃຫ້ສື່ສັງຄົມອອນລາຍ ທັງພາຍໃນ ແລະ ຕ່າງປະເທດ ໄດ້ອອກມາສະແດງຄວາມຄິດເຫັນ ຢ່າງຮືຮາ ແລະ ມີຫຼາຍບັນຫາ ທີ່ບໍ່ຖືກຕ້ອງຕາມຄວາມເປັນຈິງ; ຕາມກຳນົດໝາຍຂອງ ລັດຖະບານ,​ ເສັ້ນທາງລົດໄຟລາວ-ຈີນ ຈະເປີດການນຳໃຊ້ ຢ່າງເປັນທາງການໃນວັນທີ 2 ທັນວາ 2021 ທີ່ຈະມາເຖິງນີ້ ພໍດີກົງກັບວັນສະຖາປະນາ ສາທາລະນະລັດ ປະຊາທິປະໄຕ ປະຊາຊົນລາວ ຄົບຮອບ 46 ປີ.

      ໂຄງການກໍ່ສ້າງທາງລົດໄຟລາວ-ຈີນ ມີມູນຄ່າການກໍ່ສ້າງທັງໝົດ ເກືອບ 6 ຕື້ໂດລາສະຫະລັດ , ຈາກມູນຄ່າການກໍ່ສ້າງອັນມະຫາສານນັ້ນ ຈຶ່ງເຮັດໃຫ້ສັງຄົມ ວິພາກວິຈານ ໃນທາງລົບ ແລະ ທາງບວກ ເຊິ່ງມີກຸ່ມຄົນຈໍານວນບໍ່ໜ້ອຍ ເຂົ້າໃຈຜິດ ຄິດວ່າລັດຖະບານລາວສ້າງໜີ້ອັນມະຫາສານ ໃນໂຄງການດັ່ງກ່າວ ໂດຍບໍ່ສົມເຫດ ສົມຜົນ ແຖມຍັງໃສ່ຮ້າຍປ້າຍສີລັດຖະບານ ຕ່າງໆນາໆ ຄິດວ່າລັດຖະບານລາວ ກູ້ຢືມເງິນອັນມະຫາສານ ເພື່ອມາລົງທຶນ ເຂົ້າໃນໂຄງການດັ່ງກ່າວ ເຊິ່ງຈະສ້າງໜີ້ສິນ ໃຫ້ແກ່ປະເທດຢ່າງມະຫາສານ ໂດຍບໍ່ຮູ້ວ່າປານໃດ ຈຶ່ງສາມາດປົດໜີ້ໄດ້. ຕໍ່ກັບບັນຫາດັ່ງກ່າວ, ທ່ານ ສົມສະຫວາດ ເລັ່ງສະຫວັດ, ອະດີດຮອງນາຍົກລົດຖະມົນຕີ, ອະດີດລັດຖະມົນຕີກະຊວງການຕ່າງປະເທດ, ທີ່ປຶກສາຄະນະບໍລິຫານງານສູນກາງພັກ ກໍໄດ້ອອກມາຊີ້ແຈງກັບສື່ມວນຊົນລາວ ເມື່ອບໍ່ດົນມານີ້ວ່າ: ຄວາມເປັນຈິງ ຂອງໂຄງການກໍ່ສ້າງທາງລົດໄຟລາວ-ຈີນ ມັນບໍ່ແມ່ນຄືຫຼາຍຄົນຄິດ ໂດຍສະເພາະຫາງສຽງ ກ່ຽວກັບລາວເຮົາຖືກກັບດັກໜີ້ສິນກ້ອນໃຫຍ່ຈາກຈີນ, ຕໍ່ບັນຫາດັ່ງກ່າວ ຢາກຂໍຊີ້ແຈງໂດຍຫຍໍ້ ກ່ຽວກັບງົບປະມານໂຄງການກໍ່ສ້າງເສັ້ນທາງລົດໄຟ ລາວ-ຈີນ ໃນມູນຄ່າປະມານເກືອບ 6 ຕື້ໂດລາສະຫະລັດ ເຊິ່ງໄດ້ແຍກອອກເປັນ 2 ບ້ວງ ບ້ວງທີໜຶ່ງ 40 % ຂອງມູນຄ່າໂຄງການທັງໝົດເປັນຕົ້ນທຶນ ໂດຍຝ່າຍລາວຖືຮຸ້ນ 30% ແລະ ຝ່າຍຈີນ ຖືຮຸ້ນ 70% ໃນຂະນະທີ່ບ້ວງທີສອງ 60% ຂອງມູນຄ່າໂຄງການທັງໝົດ ບໍລິສັດເສັ້ນທາງລົດໄຟ ລາວ-ຈີນ ກູ້ຢືມກັບທະນາຄານນະໂຍບາຍຂອງ ສປ ຈີນ ໃນອັດຕາດອກເບ້ຍຕໍ່າ ໂດຍເອົາໂຄງການດັ່ງກ່າວ ຄໍ້າປະກັນ ໃນໄລຍະ 50 ປີ. ໝາຍຄວາມວ່າ ລັດຖະບານລາວ ບໍ່ໄດ້ລົງທຶນເຂົ້າໃນໂຄງການດັ່ງກ່າວ ຄືດັ່ງຫາງສຽງ ວິພາກວິຈານ ແລະ ບໍ່ໄດ້ສ້າງໜີ້ສິນກ້ອນໃຫຍ່ ຄືຫຼາຍຄົນຄິດ.

      ແຕ່ສິ່ງທີ່ ລາວເຮົາຈະໄດ້ຈາກໂຄງການທາງລົດໄຟ ລາວ-ຈີນ ກໍຄືຈະຊ່ວຍບັນລຸຄວາມໃຝ່ຝັນ, ຍົກລະດັບ ສປປ ລາວ ສູ່ເວທີສາກົນ ແລະ ເປັນການລິເລີ່ມ 1 ແລວ 1 ເສັ້ນທາງ ເຊື່ອມຈອດກັບບັນດາປະເທດໃນພາກພື້ນ ເພາະວ່າໂຄງການທາງລົດໄຟ ລາວ-ຈີນ ນອກຈາກຈະເປັນຂະບວນລົດໄຟ ເພື່ອຂົນສົ່ງຜູ້ໂດຍສານ ແລະ ສິນຄ້າແລ້ວ, ຍັງເປັນໂຄງການທີ່ມີຄວາມໝາຍ ຄວາມສຳຄັນ ທີ່ສະແດງເຖິງຄວາມສາມັກຄີແບບຍຸດທະສາດລະຫວ່າງ ສອງພັກ-ສອງລັດ ກໍຄືປະຊາຊົນສອງຊາດ ລາວ-ຈີນ ທີ່ມີມາຢ່າງຍາວນານຕື່ມອີກ ແລະ ເປັນການເປີດສັກກະລາດໃໝ່ ແຫ່ງການເຊື່ອມໂຍງດ້ານການຄ້າ, ການຂົນສົ່ງ ຂອງ ສປປ ລາວ ກັບບັນດາປະເທດເພື່ອນບ້ານ, ອະນຸພາກພື້ນ ແລະ ສາກົນ ເຊິ່ງເປັນປະເທດດຽວໃນ ອາຊຽນ ທີ່ບໍ່ມີຊາຍແດນຕິດຈອດກັບທະເລ. ພາຍຫຼັງເປີດການນຳໃຊ້ ຢ່າງເປັນທາງການ, ຂະບວນລົດໄຟລາວ-ຈີນ ຈະບໍລິການຮັບໃຊ້ຜູ້ໂດຍສານ ແລະ ສິນຄ້າ ລະຫວ່າງ ສປປ ລາວ ແລະ ສປ ຈີນ ພ້ອມກັນນີ້, ຍັງເປັນເສັ້ນທາງລົດໄຟເຊື່ອມຕໍ່ຢູ່ໃນອະນຸພາກພື້ນຕື່ມອີກ.

      ທະນາຄານໂລກ ໄດ້ລະບຸວ່າ: ເມື່ອ ສປປ ລາວ ມີທາງລົດໄຟ ລາວ-ຈີນ ແລ້ວ ຈະມີລາຍໄດ້ເຂົ້າປະເທດຕື່ມອີກ 21%, ເປັນໂຄງການທີ່ຈະເພີ່ມລາຍໄດ້ໄລຍະຍາວ ແລະ ເປັນການສ້າງວິໄສທັດ ໃຫ້ກັບລາວເຮົາ, ​ເປັນຕົ້ນແມ່ນແນວຄິດກາຍເປັນປະເທດເຊື່ອມຈອດການຂົນສົ່ງໃນພາກພື້ນ, ກາຍເປັນເສັ້ນທາງໃໝ່ ສາມາດຫຼຸດຕົ້ນທຶນ ການຂົນສົ່ງສິນຄ້າ, ການເດີນທາງ ລະຫວ່າງປະເທດ ຈາກ ສປ ຈີນ ສູ່ບັນດາປະເທດສະມາຊິກກຸ່ມອາຊຽນ ແລະ ເປັນການດຶງດູດນັກທ່ອງທ່ຽວ ຈາກຈີນສູ່ອາຊຽນ ລວມໄປເຖິງການເປີດປະຕູການທ່ອງທ່ຽວສູ່ ສປປ ລາວ ແລະ ບັນດາປະເທດໃນອະນຸພາກພື້ນ ຢ່າງມີປະສິດທິຜົນ. ນອກຈາກນັ້ນ ກໍຍັງເປັນການສ້າງວຽກເຮັດງານທໍາ ໃຫ້ແກ່ປະຊາຊົນລາວບັນດາເຜົ່າ ທີ່ອາໄສຢູ່ລຽບຕາມ 2 ຟາກຝັ່ງແຄມເສັ້ນທາງລົດໄຟລາວ-ຈີນຜ່ານ, ໃນຂະນະທີ່ການຂົນສົ່ງຜ່ານທາງລົດໄຟ ກໍມີລາຄາຖືກກວ່າການຂົນສົ່ງທາງນໍ້າ  ແລະ ທາງອາກາດ ຈຶ່ງເປັນການຊ່ວຍກະຕຸ້ນດຶງດູດການລົງທຶນພາຍໃນ ຂອງນັກລົງທຶນຕ່າງປະເທດ ໄດ້ດີກວ່າເກົ່າ.

ບົດໂດຍ: ມີໄຊ

ພາບຈາກ: ອິນເຕີເນັດ

ບົດຄວາມໜ້າສົນໃຈ

Leave a Reply

Your email address will not be published.