ບັນຫາສິ່ງຫຍໍ້ທໍ້ ແລະ ບາງທັດສະນະ

ຄວາມຫຍຸ້ງຍາກ, ຜົນກະທົບ ແລະ ການປະຕິບັດໜ້າທີ່ວຽກງານ ຂອງພະນັກງານທຸກຂັ້ນ

      ຄືພວກເຮົາຮູ້ນໍາກັນ ໃນໄລຍະ 2 ປີກວ່າຜ່ານມາ ນັບຕັ້ງແຕ່ທ້າຍປີ 2019 ເປັນຕົ້ນມາ ບັນດາປະເທດໃນໂລກ ໄດ້ຮັບຜົນກະທົບຢ່າງຮ້າຍແຮງ ຈາກການລະບາດ ຂອງພະຍາດໂຄວິດ-19 ຈົນເທົ່າປັດຈຸບັນ ກໍຍັງສຶບຕໍ່ລະບາດເປັນວົງກວ້າງ; ສຳລັບປະເທດລາວພວກເຮົາ ຍິ່ງພວມຢູ່ໃນໄລຍະທີ່ມີຄວາມຫຍຸ້ງຍາກທາງດ້ານເສດຖະກິດ-ການເງິນ ເຊິ່ງລັດຖະບານ ໄດ້ກຳນົດໃຫ້ເປັນ “ວາລະແຫ່ງຊາດ” ແລະ ຍັງໄດ້ຮັບຜົນກະທົບຈາກການລະບາດ ຂອງພະຍາດໂຄວິດ-19 ເຮັດໃຫ້ກະທົບເຖິງການຈັດຕັ້ງປະຕິ ບັດບັນດາຄາດໝາຍສູ້ຊົນ ຂອງລັດຖະບານ ກໍຄື ຂະແໜງການ ແລະ ທ້ອງຖິ່ນຕ່າງໆ ລວມເຖິງການດຳລົງຊີວິດ ຂອງປະຊາຊົນ ແລະ ຊັ້ນຄົນຕ່າງໆ; ໃນມໍ່ໆມານີ້ ໄດ້ເກີດສົງຄາມ ລະຫວ່າງ ຣັດເຊຍ ກັບ ອູ​ແກ​ຣນ ຍິ່ງໄດ້ຮັບຜົນກະທົບຂຶ້ນຕື່ມ ເປັນຕົ້ນ: ລາຄານ້ຳມັນ, ຄ່າຄອງຊີບ ແລະ ອັດຕາເງິນເຟີ້ສູງຂຶ້ນ ຢ່າງບໍ່ເຄີຍມີມາກ່ອນ ເຮັດໃຫ້ກະທົບຢ່າງຮ້າຍແຮງຕໍ່ການເຄື່ອນໄຫວທຸກດ້ານໃນສັງຄົມ ລວມທັງການປະຕິບັດໜ້າທີ່ ຂອງພະນັກງານລັດ.

          ໃນບົດຄວາມສັ້ນນີ້ ຢາກສື່ສານເຖິງທຸກຊັ້ນຄົນໃນສັງຄົມ ຈົ່ງພ້ອມກັນອົດທົນຜ່ານຜ່າວິກິດການໃນຄັ້ງນີ້ໄປໃຫ້ໄດ້ ດ້ວຍຮູບການຍົກສູງຈິດໃຈເພິ່ງຕົນເອງ, ກຸ້ມຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ ເຊິ່ງພັກ ແລະ ລັດຖະບານ ກໍໄດ້ຊອກຫາທຸກວິທີທາງ ເພື່ອແກ້ໄຂຄວາມຫຍຸ້ງຍາກດັ່ງກ່າວ; ເຖິງຈະມີຄວາມຫຍຸ້ງຍາກປານໃດກໍຕາມ ສຳລັບພະນັກງານ-ລັດຖະກອນທຸກຂັ້ນ ກໍຕ້ອງໄດ້ຍົກສູງນ້ຳໃຈເສຍສະ ຫຼະ, ມີຄວາມຮັບຜິດຊອບຕໍ່ໜ້າທີ່ວຽກງານ ທີ່ໄດ້ຮັບການມອບໝາຍ ເພື່ອເຮັດໃຫ້ບັນດາແຜນການ ແລະ ຄາດໝາຍສູ້ຊົນ ທີ່ລັດຖະບານ ກໍຄື ຂະແໜງການ ແລະ ທ້ອງຖິ່ນ ກຳນົດອອກນັ້ນ ບັນລຸຜົນເປັນຈິງ. ໃນທ່າມກາງສະພາບແວດລ້ອມຄວາມຫຍຸ້ງຍາກທາງດ້ານເສດຖະກິດ ທີ່ຫຼຸດໂຕນກັນຫຼາຍ ລະຫວ່າງ ລາຍຮັບ ກັບ ລາຍຈ່າຍ ໂດຍສະເພາະ ແມ່ນມະນຸດເງິນເດືອນ ທີ່ໄດ້ຮັບຜົນກະທົບແຮງ ເພື່ອຄວາມຢູ່ລອດ ແລະ ສາມາດຜ່ານຜ່າຄວາມຫຍຸ້ງຍາກນີ້ໄປໄດ້ ທຸກຄົນຕ້ອງໄດ້ຫັນປ່ຽນແບບແຜນການດຳລົງຊີວິດໃໝ່ ດ້ວຍຈິດໃຈປະຢັດມັດທະຍັດທຸກຮູບແບບ ແລະ ມີແຜນຄອບຄົວຢ່າງຊັດເຈນ ເຮັດແນວໃດໃຫ້ສາມາດກຸ້ມຕົນເອງຫຼາຍທີ່ສຸດ ເພື່ອຫຼຸດຜ່ອນລາຍຈ່າຍພາຍໃນຄອບຄົວ.

          ສຳລັບພະນັກງານ-ລັດຖະກອນ ນອກຈາກຫຍຸ້ງຍາກກັບຊີວິດການເປັນຢູ່ປະຈຳວັນ ຂອງຄອບຄົວແລ້ວ ຍັງຕ້ອງມີຄວາມຮັບຜິດຊອບຕໍ່ໜ້າທີ່ວຽກງານ ຂອງຕົນ ທີ່ໄດ້ຮັບການມອບໝາຍ ເພື່ອປະກອບສ່ວນເຮັດໃຫ້ການຈັດຕັ້ງປະຕິບັດ ມະຕິ XI ບັນລຸຜົນສຳເລັດຕາມຄາດໝາຍ; ໃນນີ້ ໜ້າທີ່ຕົ້ນຕໍແມ່ນພ້ອມກັນສຸມໃສ່ ຈັດຕັ້ງປະຕິບັດ 2 ວາລະແຫ່ງຊາດ ໃຫ້ສຳເລັດຜົນ; ສຳລັບວຽກງານອັນຮີບດ່ວນ ຂອງບັນດາກະຊວງ, ອົງການ ແລະ ທ້ອງຖິ່ນ ນອກຈາກສຸມໃສ່ປະຕິບັດແຜນການ ຂອງຂະແໜງການຕົນແລ້ວ ແມ່ນການເຄື່ອນໄຫວສະເຫຼີມສະຫຼອງປີສາມັກຄີມິດຕະພາບ ລາວ-ຫວຽດນາມ 2022 ເຊິ່ງຄະນະຮັບຜິດຊອບລະດັບຊາດ ໄດ້ກຳນົດແຜນເຄື່ອນໄຫວໂດຍລວມ ຂອງຂັ້ນຕ່າງໆຢ່າງລະອຽດແລ້ວ; ສະນັ້ນ ແຕ່ລະຂະແໜງການ, ແຕ່ລະຂັ້ນ ຕ້ອງສ້າງແຜນເຄື່ອນໄຫວ ສ້າງກິດຈະກຳຕ່າງໆ ເພື່ອສະເຫຼີມສະຫຼອງປີສາມັກຄີມິດຕະພາບ ລາວ-ຫວຽດນາມ ໃຫ້ເປັນຂະບວນການຟົດຟື້ນ ແລະ ມີເນື້ອໃນເລິກເຊິ່ງ ຕາມເງື່ອນໄຂ ແລະ ຈຸດພິເສດ ຂອງທ້ອງຖິ່ນຕົນ.

          ສຳລັບວຽກງານໂຄສະນາອົບຮົມ ກໍໄດ້ສຳເລັດການສ້າງເອກະສານປາຖະກະຖາ ແລະ ຄຳຖາມ-ຄຳຕອບ ກ່ຽວກັບປີສາມັກຄີມິດຕະພາບ ລາວ-ຫວຽດ​ນາມ 2022 ພ້ອມທັງແຈ້ງການ ໃຫ້ບັນດາກະຊວງ, ອົງການ ແລະ ທ້ອງຖິ່ນ ຈັດຕັ້ງຜັນຂະຫຍາຍ; ນອກນີ້ ຄະນະໂຄສະນາອົບຮົມ ແຕ່ລະແຂວງ ຕ້ອງເອົາ ໃຈໃສ່ສະຫຼຸບຕີລາຄາ ສະພາບແນວຄິດ ຂອງສະມາຊິກພັກ, ພະນັກງານ ແລະ ປະຊາຊົນທົ່ວແຂວງ ຢ່າງພາວະວິໄສ, ຊອກໃຫ້ເຫັນສາເຫດ ຂອງບັນຫາຫຍໍ້ທໍ້ ແລະ ວິທີແກ້ໄຂ ເພື່ອເປັນຂໍ້ມູນໃຫ້ແກ່ ການປັບປຸງ ເນື້ອໃນກອງປະຊຸມວຽກງານການເມືອງ-ແນວຄິດທົ່ວປະເທດ ຄັ້ງທີ V ແລະ ດຳເນີນການປັບປຸງກົງຈັກ ການຈັດຕັ້ງ ຂອງຄະນະໂຄສະນາອົບຮົມແຂວງ, ເມືອງ ເພື່ອກຽມຄວາມພ້ອມໃຫ້ແກ່ການປັບປຸງພາລະບົດບາດ ຂອງຄະນະໂຄສະນາອົບຮົມ ແຕ່ລະຂັ້ນ ໃນອະນາຄົດອັນໃກ້ນີ້.

ໂດຍ: ບກ

ບົດຄວາມໜ້າສົນໃຈ

Leave a Reply

Your email address will not be published.