ພື້ນຖານແນວຄິດ-ທິດສະດີ ຂອງພັກ

ຄວາມສາມາດນໍາພາຂອງພັກ ໃນຖານະພັກກໍາອໍານາດ ຄວນສະແດງອອກແນວໃດ?

ທ່ານ ເລນິນ ເວົ້າວ່າ: “ພັກກໍາອໍານາດ ແມ່ນໄລຍະທີ່ພັກກໍາໄດ້ອໍານາດການປົກຄອງແລ້ວ ແລະ ນໍາໃຊ້ອໍານາດດັ່ງກ່າວ ເປັນເຄື່ອງມື ຂອງຊົນຊັ້ນ ແນໃສ່ປະຕິບັດຈຸດໝາຍໄຊຊະນະຂອງຊົນຊັ້່ນ”, ສໍາລັບ ພັກປະຊາຊົນ ປະຕິວັດລາວ ແມ່ນພັກກໍາອໍານາດ ໃນລະບອບປະຊາທິປະໄຕ ປະຊາຊົນ ເຊິ່ງຖືກບັນຍັດໄວ້ໃນລັດຖະທໍາມະນູນ ແຫ່ງ ສປປ ລາວ ອັນນັ້ນ ທັງແມ່ນກຽດສັກສີ ແລະ ທັງແມ່ນຄວາມຮັບຜິດຊອບອັນສູງສົ່ງ ຂອງພັກ. ເນື້ອແທ້ຂອງພັກກໍາອໍານາດ ແມ່ນການຮັກສາອໍານາດຂອງພັກ, ສະນັ້ນ ໃນເມື່ອເປັນພັກກໍາອໍານາດແລ້ວ ພັກຕ້ອງຖືສໍາຄັນການເຕົ້າໂຮມກໍາລັງແຮງ ຂອງທຸກຊັ້ນຄົນໃນສັງຄົມ ເຂົ້າໃນການພັດທະນາໃຫ້ມີຜົນສໍາເລັດ.

ໃນຍຸກເສດຖະກິດຕະຫຼາດ ທີ່ມີທັງດ້ານດີ ແລະ ດ້ານຫຍໍ້ທໍ້ ທີ່ເປັນທັງກາລະໂອກາດ ທັງເປັນຊ່ອງວ່າງ ໃຫ້ພະນັກງານ, ສະມາຊິກພັກ ຈໍານວນໜຶ່ງ ສວຍໃຊ້ໜ້າທີ່ຕໍາແໜ່ງ, ຫຼິ້ນກິນຟຸມເຟືອຍ, ຫາຜົນປະໂຫຍດສ່ວນຕົວ, ກຸ່ມກ້ອນ, ພັກພວກ ແລະ ອື່ນໆ. ບັນດາປະກົດການຫຍໍ້ທໍ້ດັ່ງກ່າວ ເປັນສິ່ງທີ່ເອື້ອອໍານວຍ ໃຫ້ແກ່ກໍາລັງປໍລະປັກ ມ້າງເພ ທໍາລາຍພັກ ພວກເຮົາ, ສິ່ງເຫຼົ່ານັ້ນ ທັງເປັນໄພອັນຕະລາຍ ແລະ ທັງເປັນສິ່ງທ້າທາຍ ທົດສອບ ແກ່ພັກເຮົາ… ດັ່ງນັ້ນ, ຄວາມສາມາດນໍາພາຂອງພັກ ໃນຖານະພັກກໍາອໍານາດ ຄວນສະແດງອອກ 8 ບັນຫາ ຄື:

ໜຶ່ງ ຄວາມສາມາດໃນການກໍານົດນະໂຍບາຍການເມືອງຕ່າງໆຂອງພັກ ເຊິ່ງສະແດງໃຫ້ເຫັນເຖິງຄວາມຢຶດໝັ້ນໃນຈຸດໝາຍຂອງການປະຕິວັດ, ເນື້ອໃນຂອງນະໂຍບາຍຕ້ອງບົນພື້ນຖານການຄາດຄະເນລ່ວງໜ້າ ແລະ ທ່າອ່ຽງ ຂອງຍຸກສະໄໝຢ່າງຊັດເຈນ ທັງຢູ່ພາຍໃນ ແລະ ຕ່າງປະເທດ.

ສອງ ຄວາມສາມາດໃນການນໍາພາລັດ ສ້າງລັດໃຫ້ເປັນລັດ ແຫ່ງກົດໝາຍຂອງປະຊາຊົນ ໂດຍປະຊາຊົນ ແລະ ເພື່ອຜົນປະໂຫຍດຂອງປະຊາຊົນ, ສະມາຊິກພັກ ຕ້ອງມີກໍາລັງພຽງພໍ ເພື່ອແບກຫາບ 2 ໜ້າທີ່ສໍາຄັນ (ຄື: ທັງແມ່ນຜູ້ນໍາພາ ແລະ ທັງແມ່ນຜູ້ຮັບໃຊ້ ທີ່ຈົງຮັກພັກດີ ຂອງປະຊາຊົນ).

ສາມ ຄວາມສາມາດໃນການປ່ຽນແປງໃໝ່ ໂດຍໝູນໃຊ້ແບບແຜນວິທີນໍາພາທີ່ສອດຄ່ອງກັບເນື້ອໃນ ແລະ ເງື່ອນໄຂ, ພັກນໍາພາຢ່າງມີພິບໄຫວ, ສາມາດລົບລ້າງລະບອບເຮັດວຽກ ຫຼື ປ່ອຍປະລະເຫຼີງ ໃນການນໍາພາ, ຢູ່ບ່ອນໃດມີການເຄື່ອນໄຫວ ຂອງມະຫາຊົນ ຢູ່ບ່ອນນັ້ນ ຕ້ອງມີການນໍາພາຂອງພັກ.

ສີ່ ຄວາມສາມາດໃນການກໍ່ສ້າງພະນັກງານໃຫ້ພຽງພໍ ທາງດ້ານຈໍານວນ ແລະ ໂຄງປະກອບ, ມີລະດັບຄວາມຮູ້-ຄວາມສາມາດ, ມີຄຸນທາດການເມືອງ, ຄຸນສົມບັດສິນທໍາປະຕິວັດ, ມີແບບແຜນດໍາລົງຊີວິດທີ່ຖືກຕ້ອງ ເຊິ່ງຕ້ອງສະແດງໃຫ້ເຫັນໃນພຶດຕິກໍາຕົວຈິງ ຈຶ່ງສາມາດຕີລາຄາຄຸນນະພາບ ຂອງພະນັກງານໄດ້ຢ່າງຖືກຕ້ອງ.

ຫ້າ ຄວາມສາມາດໃນການຕິດຕາມ ກວດກາ ການປະຕິບັດລະບຽບ ວິໄນຂອງພັກ ໂດຍສະເພາະຄະນະພັກແຕ່ລະຂັ້ນ ກໍຄືການຈັດຕັ້ງພັກຂັ້ນຕ່າງໆ ຕ້ອງເປັນເຈົ້າການ ເກັບກໍາຂໍ້ມູນຕ່າງໆ ໂດຍສະເພາະຂໍ້ມູນກ່ຽວກັບການລະເມີດກົດລະບຽບຂອງພັກ ພ້ອມທັງຂຶ້ນແຜນກວດກາ ແລະ ແກ້ໄຂຢ່າງທັນການ.

ຫົກ ຄວາມສາມາດໃນການຕອບຕ້ານບັນດາກົນອຸບາຍຫັນປ່ຽນໂດຍສັນຕິ ຂອງກໍາລັງປໍລະປັກ ທີ່ຫວັງທໍາລາຍ ມ້າງເພ ລະບອບໃໝ່ຂອງພວກເຮົາ ທັງເປັນເຈົ້າການໂຄສະນາ ຊວນເຊື່ອ ໂດຍສົມທົບກັບບັນດາກໍາລັງໃນທົ່ວລະບົບການເມືອງ ເຮັດໃຫ້ສະພາບແນວຄິດພາຍໃນພັກ ແລະ ທົ່ວສັງຄົມມີຄວາມສະຫງົບ.

ເຈັດ ຄວາມສາມາດໃນການເສີມຂະຫຍາຍບົດບາດ ຂອງແນວໂຮມ ແລະ ບັນດາອົງການຈັດຕັ້ງການເມືອງ-ສັງຄົມ ເພື່ອເຕົ້າໂຮມຄວາມສາມັກຄີໃນທົ່ວສັງຄົມ ໃຫ້ກາຍເປັນກໍາລັງແຮງສັງລວມ ແລະ ມີຄວາມເປັນເອກະພາບກັບແນວທາງຂອງພັກ ທັງຈັດຕັ້ງຜັນຂະຫຍາຍຢ່າງມີປະສິດທິຜົນ.

ແປດ ຄວາມສາມາດໃນການຫັນປ່ຽນຢ່າງຕັ້ງໜ້າດ້ານເສດຖະກິດ-ສັງຄົມ, ສາມາດນໍາພາຈັດຕັ້ງປະຕິບັດ ບັນດາຄາດໝາຍສູ້ຊົນ ທີ່ກອງປະຊຸມໃຫຍ່ຂອງພັກວາງອອກ ຢ່າງມີຜົນສໍາເລັດ…

(ປທ ອໍາໄພ ອັກຄະລາດ ຄັດຈາກສະບັບສິ່ງພິມເດືອນ 5/2021)

ບົດຄວາມໜ້າສົນໃຈ

Leave a Reply

Your email address will not be published.