ບົດຮຽນທາງດ້ານທິດສະດີ ແລະ ພຶດຕິກຳ

ຄວາມສາມັກຄີພິເສດ ລາວ-ຫວຽດນາມ ແມ່ນຊັບສົມບັດອັນລໍ້າຄ່າ ທີ່ຜູ້ນໍາ ແລະ ປະຊາຊົນສອງຊາດສ້າງຂຶ້ນ

            ສປປ ລາວ ແລະ ສສ ຫວຽດນາມ ເປັນສອງປະເທດ ທີ່ມີຊາຍແດນຕິດຈອດກັນ ແຕ່ເໜືອຮອດໃຕ ້ຫຼາຍກວ່າ 2.000 ກິໂລແມັດ, ມີພາສາປາກເວົ້າແຕກຕ່າງກັນ ແຕ່ວ່າປະຊາຊົນສອງຊາດ ມີມູນເຊື້ອສາມັກຄີຮັກແພງຊ່ວຍເຫຼືອເຊິ່ງກັນ ແລະ ກັນ, ຜູກພັນສະໜິດແໜ້ນ ແບບບ້ານໃກ້ເຮືອນຄຽງ, ບ້ານພີ່ເມືອງນ້ອງ, ບ້ານແກ່ວເຮືອນດອງ, ໄປພຸ້ນກິນປາ- ມາພີ້ກິນເຂົ້າ, ຮ່ວມດື່ມນ້ຳສາຍດຽວ, ກິນປາຮ່ວມຫ້ວຍ ກິນກ້ວຍຮ່ວມຫວີ ແລະ ມີວັດທະນະທຳຮີດຄອງປະເພນີ ລວມທັງແບບແຜນການດຳລົງຊີວິດຄ້າຍຄືກັນ ແລະ ຮ່ວມຊະຕາກຳອັນດຽວກັນ; ເພາະສະນັ້ນ ຄວາມສາມັກຄີລະຫວ່າງ ລາວ-ຫວຽດນາມ-ລາວ ຈຶ່ງກາຍເປັນມູນເຊື້ອປະຫວັດສາດທີ່ມີມາຢ່າງຍາວນານ ແລະ ໄດ້ຮັບການເພີ່ມພູນຄູນສ້າງຜ່ານແປວໄຟປະຕິວັດ ໂດຍຜູ້ນຳສອງຊາດເປັນຜູ້ນຳພາ  ເສີມສ້າງ ແລະ ຖະນຸຖະໜອມມູນເຊື້ອທີ່ເຄີຍມີມາ  ຈົນກາຍເປັນຄວາມສາມັກຄີແບບພິເສດ ທີ່ບໍ່ມີປະເທດໃດຄືຢູ່ໃນໂລກ.

            ຄວາມເປັນພີ່ນ້ອງທີ່ເລິກເຊິ່ງ ຂອງ 2 ຊາດ ລາວ-ຫວຽດນາມ ທີ່ຜູ້ນຳສອງຊາດ ໄດ້ພະຍາຍາມຮ່ວມກັນ ເພີ່ມພູນຄູນສ້າງ  ຈະເຫັນແຈ້ງຢູ່ໃນຂະບວນວິວັດແຫ່ງການຕໍ່ສູ້ປົດປ່ອຍຊາດ ຕ້ານກັບພວກຈັກກະພັດຜູ້ຮຸກຮານຕົວດຽວກັນ ຄື: ລ່າເມືອງຂຶ້ນຝຣັ່ງ, ຟາຊິດຍີ່ປຸ່ນ ແລະ ຈັກກະພັດ ອາເມຣິກາ. ເມື່ອທົບ ທວນຄືນປະຫວັດສາດ ຂອງສອງຊາດ ລາວ- ຫວຽດນາມ ນັບຕັ້ງແຕ່ສ້າງຕັ້ງພັກກອມມູນິດອິນດູຈີນ ໃນປີ 1930 ເປັນຕົ້ນມາ ໂດຍປະທານ ໂຮ່ຈິມິງ ເປັນ ຜູ້ກໍ່ຕັ້ງ, ຄວາມເປັນພີ່ນ້ອງ ລະຫວ່າງ ສອງຊາດ ມີ ຄວາມເລິກເຊິ່ງຂຶ້ນ ແລະ ໄດ້ຄຽງບ່າຄຽງໄຫຼ່ກັນ ຕໍ່ສູ້ກັບສັດຕູຢ່າງອົງອາດກ້າຫານ ພ້ອມກັນຜ່ານຜ່າຄວາມຫຍຸ້ງຍາກນາໆປະການ ດ້ວຍຈິດໃຈ ເສຍສະຫຼະອັນສູງສົ່ງ ຕາມຄຳສອນ ຂອງ ປະທານໂຮ່ຈີມິງ  ທີ່ວ່າ “ການຊ່ວຍເຫຼືອເພື່ອນ ປຽບເໝືອນການຊ່ວຍເຫຼືອຕົນເອງ”; ຜ່ານຂະບວນວິວັດແຫ່ງການຕໍ່ສູ້ອັນຍືດເຍື້ອຍາວນານ ທີ່ເຕັມໄປດ້ວຍນ້ຳໃຈສາມັກຄີມິດ ຕະພາບອັນຈິງໃຈ, ພ້ອມກັນຮ່ວມສຸກຮ່ວມທຸກ, ຮ່ວມຮົບໃນຂຸມຄອງດຽວກັນ ແລະ ຮ່ວມກັນເອົາຊະນະສັດຕູຜູ້ໂຫດຫ້ຽມ ແລະ ແຂງແກ່ນທີ່ສຸດ; ໃນທີ່ສຸດ ລາວ-ຫວຽດ ກໍສາມາດເຮັດສຳເລັດພາລະກິດການຕໍ່ສູ້ປົດປ່ອຍຊາດ ນຳເອົາຄວາມເປັນເອກະລາດ, ອິດສະຫຼະພາບມາສູ່ປະຊາຊົນສອງຊາດ; ຈາກພຶດຕິກຳຕົວຈິງ ໂດຍຜ່ານຂະບວນການຕໍ່ສູ້ອັນພິລະອາດຫານ ແລະ ຍອມເສຍສະຫຼະເພື່ອປະເທດຊາດ ຂອງນັກຮົບ ກໍຄື ປະຊາຊົນສອງຊາດ ລາວ-ຫວຽດນາມ ທີ່ຜ່ານໄລຍະເວລາຫຼາຍສິບປີ ແລະ ຜ່ານຫຼາຍເຫດການທີ່ສ່ຽງເປັນສ່ຽງຕາຍ ໄດ້ສ່ອງແສງໃຫ້ເຫັນເຖິງທາດແທ້ຄວາມສາມັກຄີ, ຄວາມເປັນພີ່ນ້ອງທີ່ຈິງໃຈ ຂອງສອງຊາດ ແມ່ນເລິກເຊິ່ງອີຫຼີ ທັງແມ່ນເຈຕະນາລົມ ຂອງຜູ້ນຳສອງຊາດ, ແມ່ນຄວາມຕ້ອງການ ຂອງປະຊາຊົນ ແລະ ເປັນປັດໄຈຕັດສິນໄຊ ຊະນະ ຂອງການປະຕິວັດສອງປະເທດ; ດັ່ງນັ້ນ ໃນໄລຍະການຕໍ່ສູ້ຕ້ານລັດທິລ່າເມືອງຂຶ້ນແບບໃໝ່  ໃນຊຸມປີ 1959-1960 ປະທານ ໂຮ່ຈີມິງ ຈຶ່ງໄດ້ຢັ້ງຢືນ ເຖິງສາຍພົວພັນ ລາວ-ຫວຽດນາມ ວ່າ: ສາຍພົວພັນ ລະຫວ່າງສອງພັກ ທີ່ມີອຸດົມການກອມມູນິດອັນດຽວກັນ, ເດີນຕາມເສັ້ນທາງສັງຄົມນິຍົມນຳກັນ ແລະ ຍັງມີສາຍພົວພັນອັນສະໜິດສະໜົມແບບເປັນກັນເອງ ເຊິ່ງບໍ່ຄືປະເທດຕ່າງໆໃນໂລກ ເພາະສະນັ້ນ ພວກເຮົາຕ້ອງເວົ້າວ່າ: “ສາຍພົວພັນພິເສດ” ຈຶ່ງຈະຖືກຕ້ອງ.

            ຈາກຄວາມເອົາໃຈໃສ່ ເພີ່ມພູນຄູນສ້າງຄວາມສາມັກຄີພິເສດ ລະຫວ່າງສອງຊາດ ຂອງຜູ້ນໍາທັງສອງປະເທດ ຈຶ່ງເຮັດໃຫ້ຄວາມສາມັກຄີ ລາວ- ຫວຽດນາມ ມີບາດກ້າວຂະຫຍາຍຕົວໃໝ່ທີ່ເລິກເຊິ່ງ ໂດຍສ້າງຂຶ້ນບົນພື້ນຖານການປະຕິວັດ ທີ່ຍຶດໝັ້ນລັດທິ ມາກ-ເລນິນ, ລັດທິຮັກຊາດອັນແທ້ຈິງ, ສົມທົບກັບລັດທິສາກົນກໍາມະຊີບອັນຜ່ອງໃສ, ນໍ້າໃຈມິດຕະພາບ ຂອງສອງປະເທດ ໄດ້ຖືກທົດສອບ ແລະ ຍິ່ງໃກ້ຊິດສະໜິດແໜ້ນກວ່າເກົ່າ ຈົນກາຍເປັນເຫງົ້າພະລັງແຮງອັນມະຫາສານ ເພື່ອຍາດເອົາໄຊຊະນະ ເປັນກ້າວໆມາ. ສາຍພົວພັນ ລາວ-ຫວຽດນາມ ນັບມື້ນັບໜັກແໜ້ນ, ເຂັ້ມແຂງເຖິງວ່າສະພາບການສາກົນມີການຜັນແປຢ່າງສັບສົນ ກໍຄື ໃນເວລາພົບຄວາມຫຍຸ້ງຍາກສັບສົນ ໃນການນໍາພາພາລະກິດປ່ຽນແປງໃໝ່ ຂອງການປະຕິວັດສອງປະເທດ ກໍຍັງສືບຕໍ່ໝັ້ນຄົງ ແລະ ນັບມື້ຂະຫຍາຍຕົວ.

            ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ລະຫວ່າງ ລາວ-ຫວຽດນາມ ຫວຽດນາມ-ລາວ ເປັນພາລະກິດລວມ ຂອງສອງພັກ, ສອງລັດ, ສອງກອງທັບ ແລະ ປະຊາຊົນສອງປະເທດ; ພາລະກິດດັ່ງກ່າວ ຕ້ອງໄດ້ປົກປັກຮັກສາ,  ເພີ່ມພູນຄູນສ້າງໃຫ້ຈະເລີນງອກງາມຍິ່ງຂຶ້ນ ເພື່ອພ້ອມກັນປົກປັກຮັກສາໝາກຜົນ ຂອງການປະຕິວັດ ແລະ ນໍາພາປະເທດຊາດກ້າວຂຶ້ນສັງຄົມນິຍົມທີ່ສີວິໄລ ຄືດັ່ງບົດກະວີທີ່ມີຊື່ສຽງ ຂອງ ປະທານໂຮ່ຈີມິງ  ເວົ້າວ່າ: “ຮັກຫອມກັນໝາຍໝັ້ນ ຫຼາຍສັນພູກໍປີນ ໄຕ່ ຫຼາຍນໍ້າໃຫຍ່ ແລະ ໂຄກຄ້ອຍຂວາງກັ້ນ ກໍດຸ່ງໄປ ສອງຊາດລາວ-ຫວຽດ ໄດ້ຝັງຄວາມຮັກຢູ່ໃນໃຈ ຮົ່ງຮາທັງແມ່ຂອງ ບໍ່ເລິກປຸນປານໄດ້”, ປະທານ ສຸພານຸວົງ ໄດ້ເວົ້າວ່າ: “ລາວ ແລະ ຫວຽດນາມ ເປັນປະເທດເພື່ອນບ້ານໃກ້ຄຽງ, ເປັນບ້ານພີ່ເມືອງນ້ອງ ທີ່ໃກ້ຊິດຕິດພັນກັນ ຮ່ວມສາຍພູຫຼວງອັນດຽວກັນ, ຮ່ວມແມ່ນໍ້າສາຍດຽວກັນ, ປະຊາຊົນສອງຊາດພວກເຮົາ ໄດ້ຮ່ວມສຸກຮ່ວມທຸກນໍາກັນ ມາຕັ້ງແຕ່ດົນນານ, ພວກເຮົາໄດ້ຮ່ວມຊາຕາກໍາອັນດຽວກັນ, ມີສັດຕູໂຕດຽວກັນ, ເຄີຍອູ້ມຊູຊ່ວຍເຫຼືອກັນໃນຍາມສ້າງຊາດ ກໍຄື ໃນຍາມກູ້ຊາດ. ມິດຕະພາບຖານພີ່ນ້ອງ ລະຫວ່າງ ລາວ-ຫວຽດນາມ ພວກເຮົາແມ່ນຍິ່ງໃຫຍ່ ແລະ ບໍ່ມີບົດເພງ ແລະ ກາບກອນໃດໆຈະພັນລະນາໃຫ້ຄົບຖວ້ນໄດ້, ມິດຕະພາບອັນນັ້ນສູງກວ່າຈອມພູ, ຍາວກ່ວາລໍາແມ່ນ້ຳ, ກວ້າງກວ່າມະຫາສະໝຸດ, ງາມກວ່າເດືອນເພັງ, ຫອມກ່ວາກິ່ນດອກໄມ້ທີ່ຫອມກວ່າເພິ່ນ. ມິດຕະພາບອັນສູງເດັ່ນນັ້ນ ປະຊາຊົນທັງສອງຊາດພວກເຮົາ ໄດ້ເສີມສ້າງຂຶ້ນ ດ້ວຍນ້ຳຈິດນ້ຳໃຈຂອງພວກເຮົາ; ສະນັ້ນ ມັນຈຶ່ງຈະບໍ່ມີສັດຕູມານຮ້າຍໃດໆ ຈະມາແຕະຕ້ອງມ້າງເພໄດ້”. ສະຫາຍ ເລຢວນ ເລຂາທິການໃຫຍ່ ພັກກອມມູນິດຫວຽດນາມ ໄດ້ກ່າວເຖິງສາຍພົວພັນຮ່ວມຮົບ ຂອງສອງຊາດ ລາວ-ຫວຽດນາມ ວ່າ: “ບໍ່ມີຜູ້ໃດສາມາດນັບໄດ້ວ່າ ມີພູທໍ່ໃດໜ່ວຍ, ມີຫ້ວຍນ້ຳທໍ່ໃດສາຍ ທີ່ບັນດານັກຮົບຜູ້ພິລະອາດຫານ ຂອງພວກເຮົາ ໄດ້ເຄື່ອນທັບຜ່ານໄປ ແລະ ກໍບໍ່ສາມາດແທກໄດ້ຄວາມເລິກ ຂອງສາຍໃຈ ຂອງສອງຊາດ ພວກເຮົາໄດ້ໃນຕະຫຼອດເສັ້ນທາງ ທີ່ແສນຍາວໄກ ກວ່າ 30 ປີ ຜ່ານມາ. ຈາກຮຸ່ນພໍ່ຕໍ່ຮຸ່ນລູກ, ຮຸ່ນຫຼານ  ຂອງປະຊາຊົນຫວຽດນາມ ແລະ ປະຊາຊົນລາວ ພ້ອມກັນກ້າວໄປໜ້າ, ມືຖືປືນແໜ້ນ, ພ້ອມກັນສູ້ຮົບ ຕ້ານສັດຕູໂຕດຽວກັນ ເພື່ອຍາດເອົາເອກະລາດ, ອິດສະຫຼະພາບ, ເລືອດ ແລະ ຢາດເຫື່ອ ຂອງຊາວໜຸ່ມ ສອງປະເທດ ບໍ່ຈັກວ່າເທົ່າໃດ ໄດ້ຫຼັ່ງລົງອາບຫາຜືນແຜ່ນດິນ ຕະຫຼອດເສັ້ນທາງຍາວໄກເຄື່ອນທັບອອກສູ່ສະໜາມຮົບ; ໝາກຫົວໃຈ ຂອງຜູ້ເປັນແມ່ຫວຽດນາມ ແລະ ລາວ ໄດ້ເຕັ້ນເປັນຈັງຫວະດຽວກັນ ເມື່ອລູກລະເບີດ, ລູກໂບມ ຂອງອາເມຣິກາ ເປັນລ້ານໆໂຕນ ຖອກລົງໃສ່ພູຜາປ່າດົງ ແລະ ທົ່ງນາ, ຮົ້ວສວນ ຂອງສອງປະເທດ ແລະ ໃນເມື່ອລູກ, ຜົວທີ່ແສນຮັກ ຂອງຕົນໄດ້ກອດຄໍກັນສູ້ຮົບ ແລະ ເສຍສະຫຼະຢູ່ໃນຂຸມຄອງດຽວກັນ, ດິນແຕ່ລະຕອນ, ຕົ້ນໄມ້ແຕ່ລະຕົ້ນ ຂອງປ່າດົງວົງກົດ ແຫ່ງສາຍພູຫຼວງສູງສະຫງ່າ ໄດ້ກາຍເປັນບ່ອນຈົດຈໍາ ແລະ ຝັງເລິກຄວາມຮັກແພງ, ຄວາມຜູກພັນອັນຜ່ອງໃສ ແລະ ສູງສົ່ງລະຫວ່າງ ຫວຽດນາມ-ລາວ ຕະຫຼອດໄປ.”

            ໃນປະຫວັດສາດ ແຫ່ງການຕໍ່ສູ້ ຕ້ານຈັກກະພັດຜູ້ຮຸກຮານ ໄດ້ຢັ້ງຢືນຢ່າງຈະແຈ້ງ ເຖິງສາຍພົວພັນມິດຕະພາບ ຄວາມສາມັກຄີແບບພິເສດ ລະຫວ່າງ ລາວ-ຫວຽດນາມ, ຫວຽດນາມ-ລາວ ໂດຍຜ່ານ ພຶດຕິກຳ ໃນຂະບວນການຕໍ່ສູ້ປົດປ່ອຍຊາດ ອັນຍືດ ເຍື້ອຍາວນານ ເຊິ່ງໄດ້ຮັບການຖະນຸຖະໜອມ ແລະ ເພີ່ມພູນຄູນສ້າງ ຈາກຜູ້ນໍາ ກໍຄື ປະຊາຊົນສອງຊາດ; ມູນເຊື້ອອັນດີງາມດັ່ງກ່າວ ໄດ້ສືບຕໍ່ເສີມຂະຫຍາຍ ນັບມື້ນັບເຂົ້າສູ່ລວງເລິກຢ່າງຮອບດ້ານ ສະແດງອອກໃນປີ 2021 ສສ ຫວຽດນນາມ ໄດ້ໃຫ້ທຶນ ຊ່ວຍເຫຼືອ ສປປ ລາວ ຈໍານວນ 719,3  ຕື້ດົງ ເພື່ອນໍາໃຊ້ເຂົ້າໃນໂຄງການຕ່າງໆ ຄື: ໂຄງການປຸກສ້າງຫໍສະພາແຫ່ງຊາດຫຼັງໃໝ່, ໂຄງການປັບປຸງສະຖານີວິທະຍຸ-ໂທລະພາບ ແຂວງບໍ່ແກ້ວ,  ໂຄງການປ່ຽນ ອຸປະກອນສະຖານີວິທະຍຸກະຈາຍສຽງແຫ່ງຊາດ,  ກໍ່ສ້າງໂຮງໝໍແຂວງຊຽງຂວາງ,  ແບ່ງເຂດຜະລິດກະສິກໍາ ຢູ່ແຂວງຫົວພັນ ແລະ ແຂວງຊຽງຂວາງ.

            ໃນໂອກາດຈັດຕັ້ງການສະເຫຼີມສະຫຼອງ ປີສາມັກຄີມິດຕະພາບ ລາວ-ຫວຽດນາມ, ຫວຽດ ນາມ-ລາວ ປີ 2022 ນີ້ ໃຫ້ເປັນຂະບວນການຟົດຟື້ນ  ແລະ ມີຄວາມໝາຍເລິກເຊິ່ງ ລັດຖະບານທັງສອງປະເທດ ກໍໄດ້ແຕ່ງຕັ້ງຄະນະຮັບຜິດຊອບລະດັບຊາດ ທັງສ້າງແຜນເຄື່ອນໄຫວ ສ້າງກິດຈະກໍາຕ່າງໆທີ່ ປິ່ນອ້ອມຢ່າງລະອຽດ, ທຸກຂະແໜງການຢູ່ສູນກາງ ແລະ ທ້ອງຖິ່ນ ກໍເລີ່ມເຄື່ອນໄຫວ ສ້າງກິດຈະກໍາຕ່າງໆ; ເພື່ອເຮັດໃຫ້ການສະເຫຼີມສະຫຼອງ ສອງວັນປະຫວັດສາດອັນສໍາຄັນດັ່ງກ່າວ ບັນລຸຕາມແຜນການ ຕ້ອງເພີ່ມທະວີ ວຽກງານການໂຄສະນາ ເພື່ອເປັນກະບອກສຽງອັນແຫຼມຄົມ ໃຫ້ແກ່ຄະນະພັກຂັ້ນ ຂອງຕົນ, ເອົາໃຈໃສ່ໂຄສະນາມູນເຊື້ອສາຍພົວພັນມິດຕະພາບ, ຄວາມສາມັກຄີພິເສດລະຫວ່າງລາວ-ຫວຽດນາມ, ສ້າງກິດຈະກໍາ ຖາມ-ຕອບ ຢູ່ເປົ້າໝາຍຕ່າງໆ ຢ່າງກວ້າງຂວາງ  ເຊິ່ງເນື້ອໃນທັງໝົດ ແມ່ນຄະນະໂຄສະນາອົບຮົມສູນກາງພັກ ໄດ້ສ້າງ ແລະ ສົ່ງໃຫ້ບັນດາກະຊວງ, ອົງການ ແລະ ທ້ອງຖິ່ນ ພ້ອມທັງແຈ້ງການແນະນໍາຢ່າງລະອຽດແລ້ວ; ສະນັ້ນ ຄະນະພັກແຕ່ລະຂັ້ນຄວນຍົກສູງ ຄວາມຮັບຜິດຊອບ ຂອງຕົນ ນໍາພາຈັດຕັ້ງປະຕິບັດຢ່າງເປັນຂະບວນການຟົດຟື້ນ ເຮັດໃຫ້ການສະເຫຼີມສະຫຼອງປີສາມັກຄີມິດຕະພາບ ລາວ-ຫວຽດນາມ 2022 ກາຍເປັນເຫດການ, ເປັນປາງບຸນໃຫຍ່ ຂອງສອງພັກ, ສອງລັດ ແລະ ປະຊາຊົນ ສອງຊາດ ຢູ່ບົນ ດິນແດນ ສປປ ລາວ ແລະ ສສ ຫວຽດນາມ.
ໂດຍ : ມິດແທ້

ບົດຄວາມໜ້າສົນໃຈ

Leave a Reply

Your email address will not be published.