ຂ່າວເດັ່ນ-ປະເດັນດັງ

ກ່າວເປີດຂະບວນການບັ້ນແຂ່ງຂັນກວດສອບ ບົດປະພັນວັນນະຄະດີ ເພື່ອສະເຫຼີມສະຫຼອງປີສາມັກຄີມິດຕະພາບ ລາວ-ຫວຽດນາມ

ເພື່ອເປັນການສ້າງຂະບວນການ ສະເຫຼີມສະຫຼອງ ປີສາມັກຄີມິດຕະພາບລາວ-ຫວຽດນາມ ປີ 2022 ໃຫ້ມີຄວາມໝາຍເລິກເຊິ່ງ, ມີເນື້ອໃນໜັກແໜ້ນ ຄະນະໂຄສະນາອົບຮົມສູນກາງພັກ ໄດ້ຮ່ວມກັບກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ແລະ ສະມາຄົມນັກປະພັນລາວ ໄດ້ຈັດກອງປະຊຸມເພື່ອປຸກລະດົມໃຫ້ທົ່ວສັງຄົມເຂົ້າຮ່ວມ ຂະບວນການແຂ່ງຂັນກວດສອບບົດປະພັນວັນນະຄະດີທົ່ວປະເທດຂຶ້ນ ໃນຕອນບ່າຍ ຂອງວັນທີ 16 ພຶດສະພາ 2022 ຢູ່ທີ່ຫ້ອງປະຊຸມໃຫຍ່ ຂອງຄະນະໂຄສະນາອົບຮົມສູນກາງພັກ  ໂດຍພາຍໃຕ້ການເປັນປະທານ ຂອງທ່ານ ປອ ຄຳພັນ ເຜີຍຍະວົງ ຄະນະເລຂາທິການສູນກາງພັກ, ຫົວໜ້າຄະນະໂຄສະນາອົບຮົມສູນກາງພັກ, ຮອງປະທານຄະນະຊີ້ນໍາລະດັບຊາດ ເພື່ອສະເຫຼີມສະຫຼອງປີສາມັກຄີມິດຕະພາບລາວ-ຫວຽດນາມ ປີ 2022 ,ມີຄະນະພັກ, ຄະນະນຳ ຄອສພ, ບັນດາຫົວໜ້າກົມ, ຕາງໜ້າສະຖານທູດຫວຽດນາມປະຈຳ ສປປລາວ, ນັກປະພັນ, ນັກກະວີ ແລະ ນັກສຶກສາພາກວິຊາວັນນະຄະດີ, ວິທະຍາໄລແຫ່ງຊາດ ເຂົ້າຮ່ວມ.

  ໃນພິທີ ທ່ານ ນາງ ຜິວລາວັນ ຫຼວງວັນນາ ຮອງປະທານ ສະມາຄົມນັກປະພັນ ລາວໄດ້ສະເໜີຈຸດປະສົງແລະແຜນການການຈັດຕັ້ງປະຕິບັດວ່າ: ເພື່ອເປັນການຫວນຄືນມູນເຊື້ອການພົວພັນມິດຕະພາບແບບພິເສດລາວ-ຫວຽດນາມ ກໍຄື: ຄວາມການຊ່ວຍເຫຼືອອັນຍິ່ງໃຫຍ່ ແລະ ລໍ້າຄ່າຂອງພັກ,ລັດ ແລະ ປະຊາຊົນຫວຽດນາມ ໃນພາລະກິດປະຕິວັດ ກໍຄືການປົກປັກຮັກສາ ແລະ ສາ້ງສາພັດທະນາປະເທດຊາດ ໂດຍ ໄດ້ຮັບການມອບໝາຍ  ຈາກຄະນະຊີ້ນຳລະດັບຊາດ ເພື່ອສະເຫຼີມສະຫຼອງປີສາມັກຄີມິດຕະພາບລາວ- ຫວຽດນາມປີ 2022, ສະມາຄົມນັກປະພັນລາວ ຂໍເຊີນຊວນບັນດານັກຂຽນ, ນັກປະພັນ, ນັກກະວີອາຊີບ ແລະ ສະໝັກຫຼິ້ນ ໃນຂອບເຂດທົ່ວປະເທດປະກອບສ່ວນຂຽນບົດ ສົ່ງເລື່ອງຍາວ, ເລື່ອງສັ້ນ, ບົດບັນທຶກ ແລະ ກະວີສົ່ງເຂົ້າຮ່ວມ ການແຂ່ງຂັນກວດສອບ ເພື່ອຊິງເອົາລາງວັນ, ເຊິ່ງບົດປະພັນທີ່ຈະສົ່ງເຂົ້າແຂ່ງຂັນຕ້ອງປະດິດແຕ່ງຂຶ້ນຈາກແຫຼ່ງຂໍ້ມູນທີ່ເປັນຈິງ, ມີຄວາມເຊື່ອຖື ແລະ ສາມາດກວດສອບໄດ້, ມີເນື້ອໃນສອດຄ່ອງກັບແນວທາງນະໂຍບາຍ ຂອງພັກ-ລັດ, ສ່ອງແສງມູນເຊື້ອແຫ່ງການພົວພັນມິດຕະພາບ, ຄວາມສາມັກຄີແບບພິເສດ ແລະ ການຮ່ວມມືືຮອບດ້ານລະຫວ່າງລາວ-ຫວຽດນາມ, ມີສິລະປະການຂຽນຕາມຫຼັກວິຊາການ ແລະ ເປັນຜົນງານທີ່ບໍ່ທັນເຄີຍລົງພິມຫຼື ແຂ່ງຂັນກວດສອບມາກ່ອນ, ບົດທີ່ຖືກຕັດສິນໄດ້ຮັບລາງວັນຈະໄດ້ຮັບການຈັດພິມເປັນປຶ້ມເພື່ອເຜີຍແຜ່, ໂດຍກຳນົດການສົ່ງບົດແຂ່ງຂັນເລີ່ມວັນທີ່ 16/5/2022 ເຖິງວັນທີ 16/8/2022, ວັນທີ 1/9/2022 ແມ່ນປະກາດຜົນລາງວັນ ແລະ ມອບລາງວັນເປັນທາງການ. ສ່ວນປະເພດລາງວັນຄື: ລາງວັນທີ 1 ມີ 2 ລາງວັນ, ລາງວັນລະ 5 ລ້ານກີບ ພ້ອມໃບກຽດຕິຄຸນ, ລາງວັນທີ 2 ມີ 4 ລາງວັນ, ລາງວັນລະ 4 ລ້ານກີບ ພ້ອມໃບກຽດຕິຄຸນ, ລາງວັນທີ 3 ມີ 6 ລາງວັນ, ລາງວັນລະ 3 ລ້ານກີບ ພ້ອມໃບກຽດຕິຄຸນ, ລາງວັນຊົມເຊີຍມີ 30 ລາງວັນ ລາງວັນລະ 1 ລ້ານກີບ ພ້ອມໃບກຽດຕິຄຸນ.

ໃນໂອກາດດັ່ງກ່າວ ທ່ານ ຄຳພັນເຜີຍຍະວົງ ກໍໄດ້ໂອ້ລົມວ່າ: ພັກເຮົາຍາມໃດກໍຖືວຽກງານວັນນະຄະດີ ສີລະປະກຳ ແມ່ນເຄື່ອງມືສຶກສາອົບຮົມວັດທະນະທຳແນວຄິດ, ເພື່ອເຮັດໃຫ້ຄົນຮຸ່ນປະຈຸບັນ ແລະ ອະນາຄົດ ໄດ້ຮັບຮູ້ ແລະ ເຂົ້າໃຈ, ສືບທອດ ແລະ ເສີມຂະຫຍາຍສາຍພົວພັນມິດຕະພາບແບບພິເສດອັນມີໜື່ງດຽວໃນໂລກ, ເປັນແບບຢ່າງແວ່ນແຍງອັນໃສແຈ້ງ, ເປັນມໍລະດົກອັນປະເສີດ ຂອງສອງຊາດ ມີຄວາມຈຳເປັນຕ້ອງໄດ້ທົບທວນຫວນຄືນບັນທຶກຈົດຈຳການພົວພັນດັ່ງກ່າວ ໃນຮູບແບບວັນນະຄະດີ, ຈັດພິມເປັນປຶ້ມເຜີຍແຜ່ໃຫ້ມວນຊົນໄດ້ສຶກສາ, ຮຽນຮູ້, ຜ່ານປາຍປາກກາຂອງນັກປະພັນ ຕ້ອງສ່ອງແສງຄວາມເປັນຈິງໝາກຜົນ ຂອງການພົວພັນຮ່ວມມືທຸກດ້ານ, ທຸກຂະແໜງການ ນັບຕັ້ງແຕ່ການຮ່ວມກັນສູ້ຮົບໃນໄລຍະຕໍ່ສູ້ກູ້ຊາດ ໄປເຖິງການພົວພັນຮ່ວມມືໃນໄລຍະປົກປັກຮັກສາ ແລະ ສ້າງສາພັດທະນາປະເທດຊາດ ໂດຍສະເພາະ ໃນໄລຍະດຳເນີນພາລະກິດປ່ຽນແປງໃໝ່ ຢູ່ແຕ່ລະປະເທດ, ບັນຫາສໍາຄັນ ບົດປະພັນວັນນະຄະດີ ຕ້ອງສ່ອງແສງໃຫ້ເຫັນເຖິງລັກສະນະຊາດ, ປະຊາຊົນ ແລະ ກ້າວໜ້າ, ແນໃສ່ສ້າງຄົນລາວໃຫ້ມີນໍ້າໃຈຮັກຊາດ, ຮັກລະບອບປະຊາທິປະໄຕປະຊາຊົນ, ມີທັດສະນະການເມືອງໜັກແໜ້ນ ແລະ ເປັນປະໂຫຍດແກ່ປະເທດຊາດ.

ບົດຄວາມໜ້າສົນໃຈ

Leave a Reply

Your email address will not be published.